Karikirakean Rabakaura n te Mwakuri ni Minita​—E Karekea te Anga Ibukini Manga Okiraia Aomata

Bukini Kakawakina: Ngkana ti kaitiboo ma temanna ae kaotiota te kan ongora, ti riai ni manga okiria n te aro are ti kona n teboka koraan te koaua are ti a tia n unikia. (1 Kor. 3:6) Imwaini kitanan te aomata ao e kainnanoaki n taai nako karekean te anga ibukini manga okirana ni kakaaean te tai ae ti na manga okiria iai. Irarikin anne, e raoiroi katukan te titiraki ae ti na maroroakinna n okira are imwina. Ti kona iai ni kaingaingaa nanoni kaain te auti n rokora are i mwina ao ngkana e kaekaaki te titiraki anne n te boki are ti katikua irouna, e bae n rangi ni kani warekia. Karekean te anga ibukin te maroro are imwina, e kona ni bebete iai te manga oki ibukina bwa e a tia n rineaki te reirei ae na maroroakinaki, ao e ataa naba te bae e na maroroakinaki imwina kaain te auti. Ni kaitiboora are imwina, ti kona ni kabwarabwaraa bukin okirana bwa ti na kaekaa te titiraki are ti katikua n ae nako ao ni maroroakinna ma ngaia.