E na Angaraoi Iroum?
Ti Kona ni Kaotiota Ara Kakaitau n te Kauring ae Imwaira
1. Tera te tai ae okoro are e kona n reke n te Kauring?
1 E reke te tai ae okoro n te Kauring n Eberi 14 ni karikirakea ao ni kaotiota te kakaitau ibukin raoiroin Iehova. E kaotaki n te rongorongo n Ruka 17:11-18 aron Iehova ao Iesu n iangoa te kakaitau. E kananokawaki bwa tii temanna mai buakoia aomata ake a katokaki reberaia are e reke ana tai ni kaota ana kakaitau. N te tai ae na roko, a na katokaki aeka ni kangaanga nako ao ni kaokaki te maiu ae koaua are aki toki rinanon te bwaintangira ae te karea ni kaboomwi! Akea te nanououa bwa ti nang katoabong ni kaitaua Iehova ibukini kakabwaia akanne. Ti na kanga ni kona ni kaotiota ara kakaitau i nanoni wiki aika imwaira?
2. Ti na kanga ni kona ni karikirakea te kakaitau ibukin te karea ni kaboomwi?
2 Karikirakean te Kakaitau: A a riki naano ni kakaitau man te iango. Ibukini buokara ni karikirakea ara kakaitau n te karea ni kaboomwi, ti kona n nora te kaetieti ibukin te wareware ae okoro n te Baibara ni kaineti ma te Kauring n taabo aika bati, n aron ae n te New World Translation, appendix B12 are e a tia ni manga rinanoaki. E na boni karinaki naba n te atureti ae jw.org imwain te Kauring. Bukin tera bwa kam aki iaiangoa te kaetieti anne n te utu? Ngkai ti kananoa ara iango ao n tataekina te bwai ae a a tia ni karaoia Iehova ao Iesu ibukira, e a kakorakoraaki riki ara kakaitau ibukin te karea ni kaboomwi. Ibukin anne, e na rotaki n te aro ae raoiroi aroarora.—2Kor. 5:14, 15; 1Ioa. 4:11.
3. N aaro raa aika ti kona ni kaotiota iai ara kakaitau?
3 Kaotiota te Kakaitau: E kakoauaaki te kakaitau n te mwakuri. (IKoro. 3:15) E kabanea korakorana te rebera are kakaitau arei ni kakaaea Iesu ao ni karabwaa. Akea te nanououa bwa e ingainga naba n tataekina kamarurungana n te aro ni kakai nakoia aomata. (Ruka 6:45) E kairira ara kakaitau ibukin te karea ni kaboomwi bwa ti na ingainga n uataboa te mwakuri ae okoro ni katanoataan te Kauring? Te auxiliary bwaiania ke kabatiaan ara tai n uataboa te mwakuri ni minita i nanon namwakainan te Kauring, bon te anga teuana ae raoiroi ibukini kaotiotan ara kakaitau. N tairikin te Kauring, e na kairira nanora ni kakaitau bwa ti na butimwaiia aomata ake a a roko ao ni katauraoira raoi bwa ti aonga ni kaekai aia titiraki.
4. Ti na kanga ni karika te Kauring aei bwa ti na aki uringaaba iai?
4 Aei ara kabanea ni kauring ibukini kaotiotan ara kakaitau? (1Kor. 11:26) Ti bon aki ataia. Ma ti ataia bwa n te tai are e nako iai, e a nako naba te tai ae okoro ibukini kaotiotan am kakaitau. E na angaraoi iroum te tai anne? A bia tangiraki ana taeka wira ni kakaitau ao iangoan nanora iroun Iehova ae tituaraoi are te tia Katauraoa te karea ni kaboomwi.—TaiAre. 19:14.