MAIURA NI KRISTIAN
Boutokai Ana Kaetieti Iehova Ibukin te Aroaro ni Maiu ae Riai
Iai ana kaetieti Iehova ibukia aomata ni kaineti ma te aroaro ni maiu ae riai. N te katoto, e tua bwa e na riki te mare bwa katiteuanaakia n aki toki te mwaane ao te aine. (Mt 19:4-6, 9) E ribai aeka ni wene ni bure nako. (1Ko 6:9, 10) E katauraoi naba booto n reirei ibukin aroia ana aomata ni kunnikainia ao ni katamaroaia, ao a a kaokoro iai.—TTK 22:5; 1Ti 2:9, 10.
Ni boong aikai, a bati aika rawa nakon ana kaetieti Iehova. (Ro 1:18-32) A kariaia iango aika bwabwainaki bwa a na kairaraangaki iai n aia kunnikai, katamaroaaia, ao aroaroni maiuia. A bati aika a kamoamoaia n aia mwakuri aika aki raraoi, ao a kabuakakaia naake a maiuakina te kaetieti ae kaokoro ma are a maiuakinna.—1Be 4:3, 4.
Ngkai Ana Tia Kakoaua Iehova ngaira, ti riai n ninikoria ni boutokai ana kaetieti te Atua ibukin te aroaro ni maiu ae riai. (Ro 12:9) N te aro raa? Ti riai n taekina te baere e kukurei iai, ma te akoi. Ma ti riai naba ni kateimatoa aroaroni maiura ae rangi n tamaroa. N te katoto, ngkana ti kakaaei tein ara kunnikai ao katamaroaara, ti kona n titirakinira ni kangai: ‘I kaotia n au rinerine bwa I iaiangoi ana kaetieti Iehova ke te aonnaba? I kinaaki bwa te Kristian ae mamaaka te Atua n tein au kunnikai ao aroni katamaroaau?’ Ke ngkana ti rinea ara kaakibotu ke ara taamnei ae ti na mataku iai, ti kona n titirakinira ni kangai: ‘E kukurei Iehova iai? Antai ana kaetieti ibukin te aroaro ni maiu ae boutokaaki iai? E kona au rinerine n au kaokirii ni kakerikaaka kani kateimatoaani maiuakinan te aroaro ni maiu ae riai? (TA 101:3) E kona n riki bwa te bwai ni kabwakabwaka nakoia au utu ke tabemwaang?’—1Ko 10:31-33.
E aera bwa e rangi ni kakawaki boutokaan ana kaetieti Iehova ibukin te aroaro ni maiu ae riai? E na waekoa Kristo Iesu ni kamaunaia aomata ao te buakaka ni kabane. (Etk 9:4-7) Bon tii naake a kakaraoa nanon te Atua aika a na teimatoa n aki toki. (1Io 2:15-17) Ngaia are ti bia boutokai ana kaetieti Iehova ibukin te aroaro ni maiu ae riai, bwa a aonga n noraki aroaroni maiura aika raraoi ao n neboaki iai te Atua.—1Be 2:11, 12.
E oti bwa I maiuakina te kaetieti ibukin te aroaro ni maiu ae riai n tein au kunnikai ao katamaroaau?
MATAKU N TE TAAMNEI AE RIIKI BWA RAORAON IEHOVA—TEMANNA TE MWAANE, TEMANNA TE AINE, AO RINANOI TITIRAKI AIKAI:
E aera bwa ti wanawana ngkana ti maiuakin ana kaetieti Iehova?
E aera bwa a riai kaaro ni moana reireiaia natiia man uarerekeia ana kaetieti Iehova ibukin te aroaro ni maiu ae riai?
A na kangaa ataei ao naake a ikawai ni buokiia aomata bwa a na kakabwaiaaki man raoiroin te Atua?