E Eti ao E Kairua: Te Motinnano ae Ko Riai ni Karaoia
Te kaetieti ibukin te aroaro ni maiu ae riai ae ti motinnanoia bwa ti na maiuakinna, e boni kona n rangi n rotaki iai maiura. E ataa anne Iehova ae te Atua. Anne bukina ae e tangiria iai bwa ti na maiuakini ana kaetieti.
E tangiria Iehova bwa ti na karekea te maiu ae kakukurei ma n rau.
“Bon Iehova ngai ae Atuam, are Teuare reireiniko bwa ko aonga ni kabwaia, are Teuare kaiririko n te kawai ae ko riai n nakonako iai. Ko bia kaman irii nanon au tua! Ao e na riki raun nanom n ai aron te karaanga ao am raoiroi n ai aron naoni marawa.”—Itaia 48:17, 18.
E ataa te Atua maiura ae ti riai ni maiuakinna ae te kabanea n tamaroa ibukina bwa bon ara tia Karikiriki. E tangiria bwa ti na ira ana kairiri ibukina bwa boni kabwaiara. Ngkana ti toua mwin ana tua te Atua, ti na bon aki ngkanne raraoma bwa e na bon nakoraoi mwin te baere ti motinnanoia. Ti na boni karaoa n taai nako te motinnano ae eti, ae e na kairira nakon te rau ao te kukurei.
E aki tangiria Iehova bwa ti na karaoa are ti bon aki kona ni karaoia.
“E aki rangi ni kangaanga iroumi te tua aei ae I tua nakoimi n te bong aei, ao e aki naba riaon ami konaa.”—Te Tua-Kaua 30:11.
Maiuakinan ana kaetieti te Atua ibukin te aroaro ni maiu ae riai, e kona ni kainnanoaki iai ae ti na bita ara iango ao ara mwakuri. Ma e aki tangiria Iehova bwa ti na karaoa ae riaon ara konaa. Ngkai boni ngaia ara tia Karikiriki, e atai ara konabwai. Ao ngkana ti a ataa Iehova, ti na ataia iai ae e bon “aki rawawata ana tua.”—1 Ioane 5:3.
E berita Iehova bwa e na buokiia naake a motinnanoia bwa a na maiuakin ana kaetieti.
“I rawea baim ae te atai ngai ae Iehova ae Atuam, are Teuare kangai nakoim, ‘Tai maaku. N na buokiko.’”—Itaia 41:13.
Ti kona ni maiuakin ana kaetieti te Atua ibukin te aroaro ni maiu ae riai ibukina bwa e na boni buokira. E kona ni buokira rinanon ana Taeka ae te Baibara, ae reke mai iai kaungaakira ao ara kantaninga.
A a tia ni kunea aomata aika mirion ma mirion ni katobibia te aonnaba, bwa maiuakinan ana kaetieti te Baibara e boni kanakoraoa maiuia. E aera ko aki reiakin riki ana taeka n reirei aika raraoi te Baibara? Ko kona ni moanna man rinanoan te boroutia ae boto i aon te Baibara ae Ko Kona ni Kukurei n Aki Toki!, ae aki kabooaki ao e mena n jw.org. Iai reirei aikai i nanona:
E na Kangaa te Baibara ni Buokiko?
E Beritana te Kantaninga ae Kakukurei te Baibara
Ko Kona n Onimakina te Baibara?
Ngkana ko nenera Ana Taeka te Atua ae te Baibara, ko na noria bwa e bon tuai ni bane taina; e kona n “onimakinaki n taai nako, ngkai ao n aki toki.” (Taian Areru 111:8) Touani mwin te kaetieti ibukin te aroaro ni maiu ae riai ae n te Baibara, boni ngaia te reirei ae te kabanea n tamaroa ibukini kanakoraoani maiura. Ma e bon aki kona ni kairoroira te Atua bwa ti na karaoa anne. (Te Tua-Kaua 30:19, 20; Iotua 24:15) Bon te motinnano ae ti riai ni karaoia ngaira n tatabemanira nako.