E Teimatoa n Aki Toki Ana Tangira te Atua

1, 2. E aera ngkai ko tangira Iehova ae te Atua?

KO TANGIRA te Atua? Ko bae n rangi n tangiria bwa ko a tia ni katabua maium nakoina. Ko bae n iangoia bwa bon Raoraom ae te kabanea n raoiroi. Ma e a kaman tangiriko Iehova imwain ae ko tangiria. Ti wareka ae kangai n te Baibara: “Ti kaotiota te tangira, ibukina bwa e tangirira moa te Atua.”​​—1 Ioane 4:19.

² Iangoi aanga nako ake e kaota iai tangirara Iehova. E anganira te aonnaba bwa mwengara ae tamaroa ao bwaai nako ake ti na kimwareirei iai ni maiura. (Mataio 5:​43-48; Te Kaotioti 4:11) E tangirira bwa ti na karekea te iraorao ae tamaroa ma ngaia ao e karekea angan ae ti na reiakina taekana. Ngkana ti wareware n te Baibara, ti ongora iai iroun Iehova. Ao ngkana ti tataro, e ongora iai iroura. (Taian Areru 65:2) E kairirira ao e kakorakoraira n taamneina ae raoiroi ae mwaaka. (Ruka 11:13) E kanakomaia naba Natina ae rangi n tangiraki irouna nakon te aonnaba, bwa e na kainaomataira man te bure ao te mate.​​—Wareka Ioane 3:16; I-Rom 5:8.

3. Ti na kangaa ni kateimatoa te iraorao ae tamaroa ma Iehova?

³ Iangoa moa raoraom ae ko rangi ni kaan ma ngaia, ae e a tia n raoniko n taai ni kakukurei ao ni kananokawaki. E tangira te kakorakora kateimatoaani korakoran te aeka n iraorao anne. Aei naba aron ara iraorao ma Iehova, ae Raoraora ae te kabanea ni kaan reitakira ma ngaia. E kona n teimatoa n aki toki ara iraorao ma ngaia. Ngaia are e tuangira te Baibara ni kangai: “Kawakiningkami n te aro ae kam na teimatoa n tangiraki iai iroun te Atua.” (Iuta 21) Ti na kangaa ni karaoa aei? E kaeka te Baibara ni kangai: “Bon aei tangiran te Atua, ae ti na kakairi n ana tua, ao a aki rawawata ana tua.”​​—1 Ioane 5:3.

“BON AEI TANGIRAN TE ATUA”

4, 5. (a) Tera ae e nanonaki n “tangiran te Atua”? (b) E kangaa ni moan reke tangiran Iehova iroum?

⁴ Tera ae e nanonaki n te Baibara ngke e taekinaki iai “tangiran te Atua”? E aki nanonaki n aei tangirara iroun te Atua, ma e nanona tangiran te Atua iroura. Ko uringa moan reken tangiran Iehova iroum?

⁵ Kauringa arom ngke ko moan ataia ae e tangiriko Iehova bwa ko na maiu n aki toki n ana aonnaba ae boou. Ko a atai baike e karaoi ni kabane bwa e aonga ni kona n reke anne, ao ko a ataa ana bwaintangira ae rangi ni kakawaki Iehova are anganira ngke e kanakomaia oin Natina nakon te aonnaba. (Mataio 20:28; Ioane 8:29; I-Rom 5:​12, 18) Ngkai ko a ataa korakoran tangiram iroun Iehova, e a rotaki nanom iai ao ko a tangiria naba.​​—Wareka 1 Ioane 4:​9, 10.

6. Tera ae e irekereke ma tangiran temanna? E kairiko tangiran te Atua bwa ko na karaoa tera?

⁶ Ma namakinan tangiran te Atua ai bon tibwa te moani mwaneka. N te katoto, ngkana ti tangira temanna ti na karaoa ae bati riki nakon ae tii taekinan ae “I tangiriko.” E kairira te tangira bwa ti na kani karaoi baika kakukureia te aomata anne. N aron anne, e kairiko tangiran Iehova bwa ko na kani maiuakina ae e na kukurei iai. Ngkana e a rikirake te tangira anne, ko na bae ni katabua maium nakoina ao ni bwabetitoaki. Ni karaoan anne, ko a berita iai bwa ko na toro irouna n aki toki. (Wareka I-Rom 14:​7, 8.) Ko na kangaa ni kateimatoa am berita anne?

“TI NA KAKAIRI N ANA TUA”

7. Tera ae ti na karaoia ngkana ti tangira Iehova? Baikara ana tua tabeua?

⁷ Ibukina bwa ti tangira Iehova, “ti na kakairi n ana tua.” Ti kangaa ni karaoa aei? Ti ongeaba irouna. Ti reiakina n te Baibara arora ni maiu ae e tangiria Iehova. N te katoto, e tuangira bwa e bure te koro ni manging, te iraa ke te kewe, te wene n taanga ma ae tiaki buura ni mare, ke n taromauria temanna ke te bwai teuana ao tiaki Iehova.​​—1 I-Korinto 5:11; 6:18; 10:14; I-Ebeto 4:28; I-Korote 3:9.

8, 9. Ti kangaa n ataa te bae e tangiria Iehova bwa ti na karaoia n taai ake akea iai te tua ae teretere n te Baibara? Aanga te katoto.

⁸ Ma e bati riki ae ti riai ni karaoia ibukini kakukureian Iehova, nakon ae tii te ongeaba n ana tua. E aki karinani ana tua nako nakoira ae e na boboto iai maiura. Ngaia are n tabetai ao akea te tua ae teretere n te Baibara ae e na tuangira te bae ti na karaoia. Ti na kangaa ni karaoi motinnano aika raraoi? (I-Ebeto 5:17) Iai booto n reirei n te Baibara, aika taiani koaua ake a reireinira aron Iehova n iangoi bwaai. Ao ngkai ti wareka te Baibara, ti a kinaa iai Iehova n aron ae te Aomata. Ti reiakina arona n iaiango, ao baika e tatangiri ao e riribai.​​—Wareka Taian Areru 97:10; Taeka N Rabakau 6:​16-19; nora Kabwarabwaraana 1.

⁹ N te katoto, ti kangaa ni bairea te bae ti na mataku iai n te TV ke n te Intanete? E aki tuangira Iehova te bwai raoi ae ti riai ni karaoia. Ma ti na buokaki ni booto n reirei ake e anganira, ni karaoi motinnano aika raraoi. A bati kaakibotu ngkai aika irekereke ma te iowawa ao te bwaitingako. E tuangira Iehova n te Baibara bwa “e riribaa ane e tangira te iowawa” ao “e na motiki taekaia taani wene ni bure.” (Taian Areru 11:5; Ebera 13:4) A kangaa booto n reirei aikai ni buokira ni karaoi motinnano aika raraoi? Ngkana ti a ataa te bae e ribaia Iehova ke ae e taraia bwa e kamwara, ti riai ni kararoaa.

10, 11. E aera ngkai ti ongeaba iroun Iehova?

¹⁰ E aera ngkai ti ongeaba iroun Iehova? Tiaki ibukina bwa ti rawa nakon te tuuaa ke te kangaanga ae reke mani karaoani motinnano aika bubuaka. (I-Karatia 6:7) Ma ti ongeaba iroun Iehova ibukina bwa ti tangiria. Ti kani kakukureia Tamara are i karawa, n aroia ataei aika kani kakukureia tamaia. Akea te bae raoiroi riki nakon ataakin ae e kukurei Iehova iroura!​​—Taian Areru 5:12; Taeka N Rabakau 12:2; nora Kabwarabwaraana 2.

¹¹ Ti aki tii ongeaba iroun Iehova ngkana e bebete ke ngkana ai akea riki ara anga. Ao ti aki rinerinei naba tuua ao kaetieti aika ti na irii ao aika ti na aki. (Te Tua-Kaua 12:32) Ma ti ongeaba raoi irouna, n aron te tia areru are kangai: “I tatangiri am kaetieti, eng, I tangiri.” (Taian Areru 119:47; I-Rom 6:17) Ti kani katotonga Noa are kaota tangiran Iehova n arona ni karaoi bwaai nako ake e tua Iehova bwa e na karaoi. E taku te Baibara bwa Noa e “boni karaoi n aron tuangana.” (Karikani Bwaai 6:22) Ko tangira Iehova bwa e na taekina anne ibukim?

12. Ti na kangaa ni kakukureia Iehova?

¹² Tera ana namakin Iehova ngkana ti ongeaba irouna? Ti ‘kakimwareireia nanona.’ (Taeka N Rabakau 11:20; 27:11) Iangoa moa anne! Ti kakukureia te tia Karikii bwaai ni kabane ngkana ti ongeaba irouna. Ma e bon aki imanonoira bwa ti na karaoa anne. Ma e anganira inaomatara. Nanon aei bwa iai inaomatara ni baireia bwa ti na karaoa ae eti ke ae kairua. E tangiria Iehova bwa ti na kairaki n tangirana bwa ti na karaoi motinnano aika raraoi ibukin reken te maiu ae te kabanea n raoiroi.​​—Te Tua-Kaua 30:​15, 16, 19, 20; nora Kabwarabwaraana 3.

“A AKI RAWAWATA ANA TUA”

13, 14. Ti kangaa n ataia bwa e bebete te ongeaba n ana tua te Atua? Taekina te kaikonaki ni kaineti ma aei.

¹³ Ma tera arora ngkana ti iangoi ana tua Iehova bwa e a rangi ni kangaanga te ongeaba iai ke a na anaa inaomatara? E katerea ni kangai te Baibara: “A aki rawawata ana tua.” (1 Ioane 5:3) Te taeka ni Kuriiti ibukin “rawawata” nanona “tinebu.” Ni kiibu tabeua riki ao e kabonganaaki te taeka aei ni kabwarabwarai tuua aika riao ke aomata aika kataia n taui aroia temwangina ao ni kammarakiia. (Mataio 23:4; Mwakuri 20:​29, 30) E kangai te New English Translation: “A aki karawawataira ana tua.” A aki “tinebu” ana tua Iehova ae taekan ae e bebete te ongeaba iai. E aki riao n taai nako te bae e tuangira.

¹⁴ N te katoto, iangoia bwa ko buoka raoraom ni mwaing nakon ana auti ae boou. E a tia ni karini ana bwai ni kabane i nanon taiani bwaoki. A bebete tabeua ao a kai uotaki, ma ake tabeua a rangi n tinebu ao a tangira ae a na tautaboaki. E na tuangko raoraom bwa ko na tabeka te bwaoki are rangi n tinebu n tii ngkoe? E na bon aki! Bukin tera? Bwa e aki kani kaikoakiko. N aron raoraom arei, e aki naba kona Iehova n tuangira bwa ti na karaoa te bae rangi ni kangaanga. (Te Tua-Kaua 30:​11-14) E ota Iehova iroura. E “atai . . . aroni karaoara, e uringira bwa taano ngaira.”​​—Taian Areru 103:14.

15. Ti kangaa n ataia raoi bwa bon ibukini kabwaiara ana tua Iehova?

¹⁵ E tuangia te natannaomata ae Iteraera Mote bwa ana tua Iehova, bon ibukin ‘teimatoani kabwaiaia’ ao a na “teimatoa ni maiu” n ongeabaia iai. (Te Tua-Kaua 5:​28-33; 6:24) Anne naba arora ngkai. Baike e tuangira Iehova bwa ti na karaoi, bon ibukini kanakoraoan riki maiura. (Wareka Itaia 48:17.) E ataa ae te kabanea n raoiroi ibukira Tamara ae Iehova. (I-Rom 11:33) E tuangira ni kangai te Baibara: “Te Atua bon te tangira.” (1 Ioane 4:8) Nanon aei bwa baike e taekin Iehova ao ni karaoi a bon nako man te tangira.

16. Ti kangaa n ataia bwa ti boni kona n ongeaba e ngae ngke ti aki kororaoi ao ti maeka n te aonnaba ae buakaka?

¹⁶ E aki bebete n taai nako iroura te ongeaba iroun te Atua. Ti maeka n te aonnaba ae buakaka, ae tautaekanaki iroun te Riaboro. E kataia ni kairaraangia aomata nakon te buakaka. (1 Ioane 5:19) Ti riai naba ni buakan ara iango aika aki kororaoi ao ara namakin, kioina ngkai a kona ni kairira bwa ti na aki ongeaba iroun te Atua. (I-Rom 7:​21-25) Ma e kakorakoraira tangiran Iehova bwa ti na karaoa ae eti. E nori ara kakorakora n ongeaba irouna, ao e buokira n anganira taamneina ae raoiroi ae mwaaka. (1 Tamuera 15:​22, 23; Mwakuri 5:32) E buokira te taamnei ae raoiroi bwa ti na karikirakei aroaro ake e na bebete iai ongeabara irouna.​​—I-Karatia 5:​22, 23.

17, 18. (a) Tera ae ti na reiakinna n te boki aei? (b) Tera ae ti na maroroakinna n te mwakoro ae imwina?

¹⁷ N te boki aei ao ti na reiakina arora ni maiuakina ae e kukurei iai Iehova. Ti na reiakina arora ni maiuakin ana boto n reirei ao ana kaetieti ibukin te aroaro ni maiu ae riai. Uringnga are e aki kona n imanonoira Iehova bwa ti na ongeaba irouna. Ngkana ti baireia bwa ti na ongeaba, e na nakoraoi riki maiura ao e na kakukurei n te tai ae e na roko. Ao ae moan te kakawaki, ongeabara e na oti iai nakon te Atua bwa korakorara tangirana iroura.​​—Nora Kabwarabwaraana 4.

¹⁸ Ibukini buokara n ataa ae eti ao ae kairua, e a tia Iehova ni katoaira ma mataniwin nanora. Ngkana ti kataneia mataniwin nanora, e kona ni buokira “ni kakairi n ana tua.” Ngaia are tera mataniwin nanora, ao ti na kangaa ni kataneia? Ti na noria.