Ti Rangi n Tangira Iehova ae Tamara

1-2. E aera Iehova ngkai e katauraoa te anga ae ti kona iai n riki bwa raoraona, ao e kangaa ni karaoia?

E KAOIRA Iehova bwa ti na riki bwa kaain ana utu ae kaainaki irouia taan taromauria. Ai tamaroara te kakao anne! E kaainaki ara utu irouia aomata ake a a tia ni katabui maiuia nakon te Atua, ao a onimakina ana karea ni kaboomwi Natina. Bon te utu ae kakukurei. Iai manenani maiura ngkai, ao ti kimwareirei ngkai ti kakantaningaa te maiu are aki toki i karawa, ke n te Bwaretaiti i aon te aba.

² Ibukin ana tangira Iehova, e katauraoa te anga ae ti kona n riki iai bwa kaain ana utu, e ngae ngke e rinanon te rawawata iai. (Ioa. 3:16) Ti “kabooaki n te bwai ae rangi ni kakawaki.” (1Kor. 6:20) E katauraoa te kaboomwi Iehova are ti a kona iai ni karekea ara iraorao ae kaan ma ngaia. Ti kakabwaiaaki ngkai ti kona n atonga te Aomata ae te kabanea ni kakannato n te iuniweeti bwa Tamara. Ao n aron ae ti noria n te kaongora are mai mwaina, Iehova bon te Tama ae akea n ai arona.

3. Baikara titiraki aika ti kona n titirakinira iai? (Nora naba te bwaoki ae “E Mutiakinai Iehova?”)

³ N aron te tia korea te Baibara temanna, ti kona naba n titiraki ni kangai: “Tera ae N na angan Iehova bwa booni bwaai ni kabane aika raraoi ake e karaoi ibukiu?” (TaiAre. 116:12) Kaekaan anne, ti bon aki kona ni kabooa mwin te baere e karaoia Tamara are i karawa. Ma ti kairaki iai bwa ti na tangiria. E korea aei te abotoro Ioane: “Ti kaotiota te tangira, ibukina bwa e tangirira moa te Atua.” (1Ioa. 4:19) N aaro raa ake ti kona ni kaota iai tangiran Tamara are i karawa?

TEIMATOA NI KAANIA IEHOVA

4. Ni kaineti ma Iakobo 4:​8, e aera bwa ti riai ni kakorakoraira ni kaania Iehova?

⁴ E tangirira Iehova bwa ti na kaania ao ni mamaroro ma ngaia. (Wareka Iakobo 4:8.) E kaumakira bwa ti na “botumwaaka n tataro,” ao e tatauraoi n taai nako. (IRom 12:12) E aki kona n tabetabe ke ni kua n te aro are e a aki kona n ongoraei ara tataro. Ti kakauongo irouna mani warekan ana Taeka ae te Baibara ao booki ake a buokira n ota iai. Ti ongora naba irouna ngkana ti kakauongo raoi n taiani bobotaki ni Kristian. A kaaniaki naati ma aia karo rinanon te mamaroro. N aron anne, ti na kaaniaki naba ma Iehova ngkana ti mamaroro ma ngaia.

5. Ti na kangaa ni kanakoraoa riki ara tataro?

⁵ Iangoia bwa tera aron reitakim ma te Atua. E tangiria Iehova bwa ti na bunrii nanora nakoina n te tataro. (TaiAre. 62:8) Ti karaoa ae riai ngkana ti titirakinira ni kangai: ‘Titeboo au tataro ma te reta ae kaeweaki taekana, ke te reta ae nako raoi mai nanou taekana?’ Akea te nanououa bwa ko rangi n tangira Iehova, ao ko kani kateimatoa am iraorao ma ngaia. Ibukini karaoan anne, ko riai ni katoatai ni maroro ma ngaia. Bunra nanom nakoina. Taekini baika ko kukurei iai ao aika ko rawawata iai. Kakoauaa raoi ae ko boni kona ni kawaria ibukini buokam.

6. Tera ae ti riai ni karaoia bwa ti aonga n teimatoa ni kaan ma Tamara are i karawa?

⁶ Ngkana ti na teimatoa ni kaan ma Tamara are i karawa, ti riai ni kateimatoa te nano ni kakaitau. Ti boraoi n iango ma te tia areru are korea aei: “Ai mwaitira baika ko a tia ni karaoi, ngkoe ae Iehova ae Atuau, am mwakuri aika kamimi ma am iango ibukira. Akea ae e kona ni kabotauaki ma ngkoe, ngkana I kataia ni kaotii ao n taekini, a aikoa kona n taekinaki bwa a rangi ni bati!” (TaiAre. 40:5) Ti aki tii namakina te kakaitau, ma ti karaoa ae bati riki nakon anne. Ti kaota ara kakaitau nakon Iehova n ara taeka ao n ara mwakuri. Ibukin anne, ti a kaokoro ma aomata aika bati ni boong aikai. Angia aomata ni boong aikai a aki kakaitau ibukini baike e karaoi te Atua ibukia. Ni koauana, teuana kanikinaean ae ti a maeka ni “kabaneani boong,” bon aroia aomata ni bangaomata. (2Tim. 3:​1, 2) Ti bia aki kakairi n te aroaro anne!

7. Tera ae e tangiria Iehova bwa ti na karaoia, ao bukin tera?

⁷ A aki tangiria kaaro bwa a na unun natiia i marenaia, ma e na nakoraoi reitakia. N aron anne, e tangiriia natina ni kabane Iehova bwa e na nakoraoi naba reitakia. Ni koauana, te itangitangiri i marenara boni kanikinaeara bwa Kristian ni koaua ngaira. (Ioa. 13:35) Ti boraoi n iango ma te tia areru are korea aei: “Ai raoiroira ao ai rereira ikotakia taari ni maeka ma te katiteuanaaki!” (TaiAre. 133:1) Ngkana ti tangiriia tarira, ti kaotia nakon Iehova bwa ti tangiria. (1Ioa. 4:20) Ai kakukureira te riki bwa kaain te utu aika ‘iakoakoi i marenaia, [ao] n atataiaomata’!​—IEbe. 4:32.

KAOTA AM TANGIRA N ONGEABAM

8. Ni kaineti ma 1 Ioane 5:​3, tera bukina ae kakawaki ae ti ongeaba iai iroun Iehova?

⁸ E kantaningaiia naati Iehova bwa a na ongeaba irouia aia karo, ao e kantaningaira naba bwa ti na ongeaba irouna. (IEbe. 6:1) Ti bon riai n ongeaba irouna ibukina bwa bon ara tia Karikiriki, te tia Kateimatoa maiura, ao te karo ae te kabanea ni wanawana. Ma bukina ae kakawaki ae ti ongeaba iai iroun Iehova, bwa ti bon tangiria. (Wareka 1 Ioane 5:3.) E ngae ngke a bati bukina aika ti riai n ongeaba iai iroun Iehova, ma e aki taumatoaira bwa ti na karaoa anne. E anganira te bwaintituaraoi ae te inaomata n rinea ae ti na karaoia, ngaia are e kukurei ngkana ti rineia bwa ti na ongeaba irouna ibukin tangirana.

9-10. E aera ngkai e kakawaki ataakin ana kaetieti te Atua ao maiuakinana?

⁹ A tangiria kaaro bwa a na aki reke n te kangaanga natiia. Anne bukina ae a katei kaetieti ake a na kamanoaki iai natiia. Ngkana a ongeaba naati ni kaetieti akanne, a kaotia iai bwa a onimakinia aia karo ao a karineia. Ai kakawakira riki ngkanne bwa ti na atai ana kaetieti Tamara are i karawa ao ni maiuakini. Ngkana ti karaoa anne, ti kaotia nakon Iehova bwa ti tangiria ao ti karinea, ao ti kakabwaiaaki naba iai. (Ita. 48:​17, 18) Ni kaitaraan anne, a na bon reke n te kangaanga naake a rawa nakon ana kaetieti Iehova.​—IKar. 6:​7, 8.

¹⁰ Ngkana ti maiuakina ae e kukurei iai Iehova, ti na boni kamanoaki man te rawawatannano, ao ruanikaini maiura ma ara onimaki. E ataa ae te kabanea n tamaroa ibukira Iehova. E taku Aurora ae maeka n te United States: “I ataia ae te ongeaba iroun Iehova, e na boni karekea n taai nako te maiu ae te kabanea n nakoraoi.” E boni koaua anne. Ko a tia ni kakabwaiaaki n ongeabam n ana kaetieti Iehova?

11. E na kangaa ni buokira te tataro?

¹¹ Ti buokaki n te tataro bwa ti na ongeaba, e ngae ngke e kangaanga. N tabetai e kangaanga te ongeaba iroun Iehova, ma ti riai n teimatoa ni buakana nanora ni kani kakaraoa ae bure. E bubutiia te Atua te tia areru ni kangai: “Kauekea i nanou te kan ongeaba iroum.” (TaiAre. 51:12) E taku Denise ae te bwaiania ae katoatai: “Ngkana e kangaanga irou te ongeaba n teuana i buakon ana tua Iehova, I tataro ibukini kakorakoraau bwa N na karaoa ae eti.” Ti kona ni kakoauaa bwa Iehova e na boni kaekaa n taai nako te aeka n tataro anne.​—Ruka 11:​9-13.

BUOKIIA TABEMWAANG BWA A NA KINAA TAMARA

12. Ni kaineti ma I-Ebeto 5:​1, tera te bwai ae ti riai ni karaoia?

¹² Wareka I-Ebeto 5:1. Ibukina bwa “naati aika tangiraki” ngaira iroun Iehova, ti kabanea ara konaa ni katotongnga. Ti kakairi n aroarona man arora ni bwaina te itangitangiri, te iakoakoi, ao te ikabwarabure. Ngkana a nori aroarora aika raraoi naake a aki kinaa te Atua, a kona ni kairaki bwa a na kan reiakina riki taekana. (1Bet. 2:12) A bon riai kaaro aika Kristian ni kakairi iroun Iehova n aroaroia nakoia natiia. Ngkana a karaoa anne, a kona natiia ni kani karekea oin aia iraorao ma Iehova.

13. Tera ae ti riai ni kaatuua ara iango iai?

¹³ N angiin te tai a rangi ni kamoamoa ataei irouia tamaia, ao a kani kakarakinia. N aron anne, ti kakatonga naba iroun Tamara are i karawa ae Iehova ao ti tangiriia naba aomata bwa a na kinaa. Ti namakina naba are iroun te Uea ae Tawita are korea aei: “N na kamoamoa iroun Iehova.” (TaiAre. 34:2) Ma tera arora ngkana ti mamaamaa? Ti na kangaa n ninikoria? Ti kona n ninikoria ngkana ti kaatuua ara iango i aoni kukurein Iehova ngkana ti mamaroroakina taekana. E na bon anganira Iehova te ninikoria ae ti kainnanoia. E buokiia taari n te moan tienture bwa a na ninikoria, ao e na boni buokira naba.​—1Tet. 2:2.

14. E aera ngkai e kakawaki bwa ti na uataboa te mwakuri ni karekeia taan rimwini Kristo?

¹⁴ E aki inanonano Iehova, ao e kukurei ngkana e norira bwa ti kaotiota te tangira nakoia tabemwaang n aki ongeia bwa kaain ia. (Mwa. 10:​34, 35) Teuana naba te anga ae te kabanea n tamaroa ibukini kaotan tangiraia tabemwaang, boni man arora n taekina te rongorongo ae raoiroi nakoia. (Mat. 28:​19, 20) Tera ae kona n reke man te mwakuri aei? A kona n nakoraoi riki maiuia naake a ongora iroura ao ni karekea naba kantaningaan te maiu are aki toki n te tai ae e na roko.​—1Tim. 4:16.

TANGIRA IEHOVA AE TAMARA AO KO NA KUKUREI

15-16. Baikara baika ti kona ni kukurei iai ngkai?

¹⁵ Iehova bon te karo ae tatangira, ao e tangiriia kaain ana utu bwa a na kukurei naba. (Ita. 65:14) A bati bukina aika ti kona ni kukurei iai ngkai, e ngae ngke ti kaaitara ma kangaanga. N te katoto, ti kakoauaa raoi bwa e rangi n tangirira Tamara are i karawa. Ti karekea te atatai ae eti n Ana Taeka te Atua ae te Baibara. (Ier. 15:16) Ao ti kaaina te utu ae okoro ae kaainaki irouia aomata aika tangira Iehova, a tangiri ana kaetieti aika raraoi ibukin te aroaro ni maiu ae riai, ao a itangitangiri i marenaia.​—TaiAre. 106:​4, 5.

¹⁶ Ti kona n teimatoa ni kukurei ibukina bwa ti ataia ae e na kakukurei riki te maiu n te tai ae imwaira. Ti ataia ae e na waekoa Iehova ni kamauna te buakaka ni kabane, ao i aan ana Tautaeka n Uea e nang karika te aonnaba bwa te Bwaretaiti. Iai naba ara kantaninga ae tamaroa bwa a na manga kautaki naake a a tia ni mate, ao ti na manga kaitiboo ma ngaiia. (Ioa. 5:​28, 29) Ai kakimwareireira te tai anne! Ao ae kakawaki riki, ti kakoauaa raoi bwa a nang bane kaaini karawa ao te aonnaba n angan Tamara ae tatangira, te neboaki, te karineaki, ao te taromauriaki, ae bon riai n anganaki.