‘Kawakiningkami N Te Aro Ae Kam Na Teimatoa N Tangiraki Iai Iroun Te Atua’
“Kawakiningkami n tangirami iroun te Atua, ao kam na kaantaninga nanoangami iroun ara Uea are Iesu Kristo, ba e aonga n reke te maiu are aki toki.”—IUTA 21.
1, 2. E kanga Iehova n tia ni kaota tangirara, ao ti na kanga n ataia bwa e na aki kakawakinira nako naba n ana tangira?
E A TIA Iehova ae te Atua ni kaotiota ana tangira ibukira n aaro aika bati. Akea te nanououa bwa kakoauaan ana tangira Iehova ae te kabanea ni korakora, boni katauraoan te karea ni kaboomwi. E rangi ni korakora ana tangira ibukia aomata n te aro are e kanakoa Natina ae tangiraki nako aon te aba bwa e na mate ibukira. (Ioane 3:16) E karaoa aei Iehova ibukina bwa e tangirira bwa ti na maiu n aki toki ao ni kakabwaiaaki naba n ana tangira!
2 Ma e koaua bwa e nang kakawakinira nako naba n ana tangira Iehova, n aki ongei baika ti rinei ma ni karaoi? Tiaki ngaia anne. Bwa n Iuta kibuna 21, ti wareka iai te taeka ni kaumaki ae kangai: “Kawakiningkami n tangirami iroun te Atua, ao kam na kaantaninga nanoangami iroun ara Uea are Iesu Kristo, ba e aonga n reke te maiu are aki toki.” Te taeka ae “kawakiningkami n tangirami iroun te Atua” e boni kaineti ma riaira ni karaoi mwakuri riki tabeua. Tera ngkanne ae ti riai ni karaoia bwa ti aonga n teimatoa i nanon ana tangira te Atua?
Ti na Kanga n Teimatoa i Nanon Ana Tangira te Atua?
3. Tera are e taekinna Iesu ae moan te kakawaki ibukina, bwa e aonga n teimatoa i nanon ana tangira Tamana?
3 Ti kona n nora kaekaan te titiraki anne man ana taeka Iesu are e taekinna n ana kabanea n tairiki i aon te aba. E taku: “Ngkana kam kawakin au tua, ao kam maeka n tangirau; n ai arou ngkai I kawakin ana tua Tamau, ao I maeka n tangirana.” (Ioane 15:10) E teretere ao e namakinna Iesu bwa kawakinan ana tua Iehova boni moan te kakawaki ibukini kateimatoaan itiakina i matan Tamana. Ngkana arona bwa e koaua aei ibukin Natin te Atua ae kororaoi, e aki ngkanne koaua naba ibukira?
4, 5. (a) Tera te bwai ae moan te kakawaki ae ti kona iai ni kaotia bwa ti tangira Iehova? (b) Bukin tera bwa akea riaina ngkai ti na ribaa iangoan te ongeaba nakon ana tua Iehova?
4 Ae moamoa riki, ti kaotiota tangiran Iehova rinanon ongeabara nakoina. E kamataataa te abotoro Ioane n te aro aei: “Bon tangiran te Atua te baei, ae tauan ana tua iroura; ao a aki rawawata ana tua.” (1 Ioane 5:3) E koaua bwa ni boong aikai, a mwaiti aomata aika a iangoa te ongeaba bwa e aki rangi ni kakawaki. Ma nora te kibu n taeka aei: “Ao a aki rawawata ana tua.” E aki tuangira Iehova bwa ti na karaoa te bwai teuana ae rangi ni kangaanga ibukira.
5 N te kabotau: Ko kona n tuanga raoraom ae ko rangi n tatangiria bwa e na uota te bwai teuana ae ko ataia bwa e rangi n tinebu ibukina? Ni koauana ko na bon aki! E rangi n riao riki ana akoi Iehova ni kabotauaki ma ngaira ao e rangi n riao wanawanana n atai tian ara konabwai. E karaui nanora te Baibara bwa Iehova, “E uringira ba taano ngaira.” (Taian Areru 103:14) E bon aki kona n tuangira ae riaon ae ti kona. Ngaia are bon akea riaina ae ti na ribaa iangoan te ongeaba nakon ana tua Iehova. Ni kaitaraan anne, ti ataia bwa te ongeaba nakon Iehova, e anganira ara tai ae tamaroa bwa ti na kaotia nakon Tamara are i karawa bwa ti bon tangiria ni koaua ao ti kan teimatoa i nanon ana tangira.
Te Bwaintangira ae Okoro Mairoun Iehova
6, 7. (a) Tera mataniwin te nano? (b) Anga te kaikonaki ni kaota aron mataniwin te nano ni buokira bwa ti na teimatoa i nanon ana tangira te Atua.
6 Ibukina bwa ti maeka n te aonnaba ae bati te kangaanga, iai babaire aika mwaiti aika a riai ni karaoaki aika irekereke ma ara kakaonimaki nakon te Atua. Ti na kanga ni koaua raoi bwa babaire aikai a boni boraoi ma ana kantaninga te Atua? E a tia n anganira Iehova te bwai n tangira ae kona n rangi ni buokira ni kaineti ma te ongeaba. Aei boni mataniwin te nano. Tera mataniwin te nano? Bon te konabwai ae okoro n tuoan ara mwakuri nako, aroarora ao ara rinerine. E mwakuri kaanga ai aron te tia moti i nanora, ae anganira te kona n nori ara rinerine ake ti kaaitarai i nanoni maiura, ke te kona n iaiangoi ara mwakuri ake ti a kamani kakaraoi ao te kona n rinanoi bwa a raoiroi ke a buakaka, ke tao a eti ke a kairua.—Wareka I-Rom 2:14, 15.
7 N aanga raa aika e kona ni buokira iai mataniwin nanora? Iangoa te kaikonaki aio. E toua te rereua ae moan te abwabwaki te tia rianna. Bon akea kawai aika a tia n tane, akea taiani kawai ao akea naba boua ni kanikina ibukini kaotan te kawai. Ma e ngae n anne, e bon teimatoa n toua kawaina ni karokoa ana tabo. N te aro raa? Iai ana kambwati. Te kambwati bon te bwai ae kaanga ubun te tai ae koreaki iai te kawai nako meang, maiaki, mainiku, ao maeao, ao te neiran ae maekineti ae kotea meang n taai nako. E na bon aki kona n reke buokana ao e na bua te tia rianna aio ngkana akea ana kambwati. N ai aron anne, n angiin te tai e na minotaki ana iango te aomata ae akea mataniwin nanona, ngkana e kataia n uaiakina te riai, te eti ao te raoiroi ni maiuna.
8, 9. (a) Baikara tian ana konabwai mataniwin nanora aika ti riai n teimatoa n ururing? (b) Tera ae ti kona ni karaoia bwa ti aonga ni kakoauaa raoi bwa e bongana nakoira mataniwin nanora?
8 E tiatianaki mataniwin te nano kaanga ai aron te kambwati. Ngkana e na katuka te maekineti te tia rianna irarikin ana kambwati, ao e na aki ngkanne kotea meang tabon te neiran. N aron anne, tera ae e na riki ngkana ti rangi ni kabatiaa kariaiakani baike e tangiri nanora bwa e na tau aron ara babaire? E kona n kamangaongaoaki mataniwin nanora ni moanibwaiani karaoani baika ti tangiri n oin nanora. Ti kauringaki n te Baibara bwa “moan te mamamana riki te aba te nano nakoni bwai ni kabane, ao e kakaiaki aorakina.” (Ieremia 17:9; Taeka N Rabakau 4:23) Irarikin anne, e na karako ke e na bon akea bonganan ana kambwati te tia rianna ngkana akea ana mwabe ae eti raoi ao n onimakinaki. N te aro naba anne, e kona n aki rangi n ibuobuoki mataniwin nanora ngkana ti aki onimakina ana kairiri Ana Taeka te Atua ae te Baibara ae koaua ao n aki bibitaki. (Taian Areru 119:105) E kananokawaki bwa a mwaiti aomata n te aonnaba aei aika a rangi ni kabatiaa moanibwaiani baika a tangiri n te aro ae aki riai, ao e karako ke bon akea irouia mutiakinani kaetieti ake n Ana Taeka te Atua. (Wareka I-Ebeto 4:17-19.) Ngaia anne bukina ae a bati aomata aika karaoi mwakuri aika bubuaka, e ngae ngke bon iai mataniwin nanoia.—1 Timoteo 4:2.
9 Ti riai ni kananomatoaira bwa ti na aki riki n aron anne! Ma ti bia teimatoa ni kariaia Ana Taeka te Atua bwa e na reiakina ao ni kataneiaa mataniwin nanora bwa e aonga ni bongana raoi nakoira. Ti riai ni kakairi ni mataniwin nanora ae reiakinaki man te Baibara n oneani mwin ae ti na kariaia tangirani karaoan oin nanora bwa e na tau arora. N te tai naba anne, ti riai ni kakorakoraira ni karinei mataniwin nanoia tarira ma mwaanera n te onimaki aika tangiraki iroura. Ti kakorakoraira n rarawa ni kabwakaia n ururingan ae tao e kai rotaki riki mataniwin nanon tarira temanna ni kabotauaki ma ngaira.—1 I-Korinto 8:12; 2 I-Korinto 4:2; 1 Betero 3:16.
10. Baikara iterani maiura aika tenua aika ti na maroroakini ngkai?
10 Ti nang rinanoi ngkai tenua iterani maiura aika ti kona iai ni kaotiota tangiran Iehova rinanon te ongeaba. Ni koauana, e rangi ni kainnanoaki mwakurini mataniwin nanora n iterani maiura aika tenua aikai, ma e moamoa riki e boni kainnanoaki naba kairirana ni kaetieti n te Baibara ake a kairaki koreaia rinanon te taamnei. Aikai aanga aika tenua aika ti kona ni kaotiota iai ongeabara ao tangiran Iehova: (1) Ti tangiriia ake e tangiriia Iehova, (2) Ti kaotiota karineaia ake iai irouia te mwaaka ni kairiri, ao (3) Ti kakorakoraira ni kateimatoa itiakira i matan te Atua.
Tangiriia te Koraki Ake E Tangiriia Iehova
11. Bukin tera bwa ti riai n tangiriia akana e tangiriia Iehova?
11 Te moan, ti riai n tangiriia te koraki ake e tangiriia Iehova. Titeboo aomata ma taian ongantari ni kaineti ma aroia n ikoikotaki. Ti na bae n riki n aroia aomata ake ti ikoikotaki ma ngaiia. E ataia raoi ara tia Karikiriki bwa e kona ni karuanikai ke n ibuobuoki te ikoikotaki ibukia aomata aika aki kororaoi. Ngaia are e anganira te reirei aei ae kawanawana te aba ae kangai: “Ko na nakonako ma aomata aika rabakau, ao ko na rabakau iai: Ma e na maraki te aomata ngkana e raonia akana nanobaba.” (Taeka N Rabakau 13:20; 1 I-Korinto 15:33) Akea mai buakora ae e kan “nanobaba.” Ti kan riki n “rabakau” ngaira n tatabemanira nako. E bon aki kona ni kawanawanaaki riki Iehova nakon arona ae ngkai, ao e aki kona ni kabarekaaki iroun temanna. Ma e ngae n anne, e katea te katoto ae raoiroi ibukira ni kaineti ma te ikoikotaki. Iangoia bwa antai aomata aika aki kororaoi aika e a tia n rineiia Iehova bwa raoraona?
12. Aekakira raoraon Iehova aika e rineiia?
12 E aranaki te baatua are Aberaam iroun Iehova bwa ‘raoraona.’ (Itaia 41:8) E rangi n rianako kakaonimakina, raoiroina ao ongeabana bwa bon te mwaane ae onimaki. (Iakobo 2:21-23) Anne aekan raoraon Iehova ae e rineia. Ni boong aikai, e rineia aeka n aomata akanne bwa raoraona. Ngkana e rineiia raoraona Iehova n aron aikai, e aki ngkanne kakawaki bwa ti na rineia raoi naba raoraora bwa ti aonga n nakonako ma akana wanawana ao n riki ni wanawana iai?
13. Tera ae na kona ni buokira ni karaoi ara rinerine aika raraoi ni kaineti ma rineaia raoraora?
13 Tera ae kona ni buokiko ni karaoa am rinerine ae raoiroi ni kaineti ma aei? E kona ni karikirakea te ungannano reiakinani katoto man te Baibara. Iaiangoa aia iraorao Ruta ao tinani buuna are Naomi, Tawita ao Ionatan ke Timoteo ao Bauro. (Ruta 1:16, 17; 1 Tamuera 23:16-18; I-Biribi 2:19-22) Iai te bwai teuana ae rangi ni kakawaki i buakoni bwaai ni kabane ake e a rangi ni kaan iai aia iraorao naakai: A bane n aanaki n tangiran raoi Iehova. Ko kona ni karekeia raoraom aika a tangira Iehova n ai aroni korakoran tangirana iroum? Karaua nanom bwa ko kona ni karekeia aekakin raoraom akanne n te ekaretia ni Kristian. A na bon aki kaumakiko raoraom akanne bwa ko na karaoa te bwai teuana ae aki kakukureia nanon Iehova. Ma a na buokiko bwa ko na ongeaba iroun Iehova, ni kaaniko riki ma ngaia ao ni karikirakea uaan te taamnei. (Wareka I-Karatia 6:7, 8.) A na buokiko naba bwa ko na teimatoa i nanon ana tangira te Atua.
Karinea te Mwaaka ni Kairiri
14. Baikara bwaai ake a aki toki ni kariki kangaanga nakoira ibukini kaotiotani karinean te mwaaka ni kairiri?
14 Te kauoua n anga ae ti kaotiota iai tangiran Iehova, e irekereke ma te mwaaka ni kairiri. Ti riai ni kaotiota karinean te mwaaka ni kairiri. Bukin tera bwa e rangi ni kangaanga iroura karaoan aei n taai tabetai? Bukina teuana, bwa a aki kororaoi te koraki ake a anganaki te mwaaka ni kairiri. N ikotaki ma anne, ti bon aki kororaoi naba ngaira. Ti kabokorakora ma rikiara ae te karitei.
15, 16. (a) E aera ngkai e kakawaki iroura karineaia te koraki ake e a tia Iehova n angania mwiokoaia bwa a na tararuaia ana aomata? (b) Tera reireiara ae kakawaki n aron Iehova n taraa aia karitei tibun Iteraera nakoni Mote?
15 Tao ko kona n iango ni kangai, ‘Ngkana ngaia bwa e rangi ni kangaanga iroura karinean te mwaaka ni kairiri ao bukin tera bwa ti riai ni karaoia?’ E bon irekereke kaekaan te titiraki anne ma riain Iehova n tautaeka. Antai ae ko na rineia bwa am mataniwi ae am tia tautaeka? Ngkana ti rinea Iehova bwa ara tia Tautaeka, ti riai ngkanne ni karinea mwakana ni kairiri. Ngkana ti aki karaoa anne, ti kona ngkanne n atongnga bwa ara tia Tautaeka? Irarikin anne, ao n angiin te tai e kaotiota mwakana ni kairiri Iehova rinanoia aomata aika aki kororaoi, ake e angania mwiokoaia bwa a na tararuaia ana aomata. Ngkana ti karitei nakoia aomata akanne, tera ngkanne taraakin ara mwakuri iroun Iehova?—Wareka 1 I-Tetaronike 5:12, 13.
16 N te katoto, ngke a ngurengure ao ni karitei nakoni Mote tibun Iteraera, e iangoa aia mwakuri ni karitei aei Iehova bwa e boni karaoaki nakoina. (Warekaia Iteraera 14:26, 27) E aki bibitaki te Atua. Ngkana arona bwa ti na karitei nakoia te koraki ake a a tia n anganaki te mwaaka ni kairiri, ti a boni karitei iai nakoina!
17. Tera te aroaro ae ti riai ni kakorakoraira ni karikirakea nakoia ake iai mwiokoia ni kairiri n te ekaretia?
17 E kaotaraea te aroaro ae eti te abotoro Bauro ae e riai ni karikirakeaki nakoia ake a a tia n anganaki mwiokoaia n te ekaretia ni Kristian. E korea ae kangai: “Kam na iri nanoia ami tia kairiri, ao kam na ri aan aia taeka: ba a tantani ni kani kawakin tamneimi, ngkai a nang karakin aroia ni makuri; ba a aonga n tantani ma te kimareirei, ao a na aki ngirangira iai.” (Ebera 13:17) E boni koaua bwa ti riai ni mwakuri korakora ni karikirakea te nano ae ongeaba ao n aantaeka. Ma uringnga bwa ti tabe ngkai ni mwakuria arora n teimatoa n ana tangira te Atua. E aki ngkanne manena kakorakorakira nakon te tia anne?
Teimatoa n Itiaki i Matan Iehova
18. E aera ngkai e tangirira Iehova bwa ti na teimatoa n itiaki?
18 Te katenua n anga ae ti kaotiota iai tangiran Iehova iroura, boni kakorakorakira n teimatoa n itiaki i matana. N angiin te tai, a mwakuri korakora kaaro bwa a aonga n itiaki natiia. Bukin tera? Bukina teuana bwa e rangi ni kakawaki te itiaki bwa e aonga ni marurung te ataei ao ni mwengaraoi. Irarikin anne, te ataei ae itiaki e kaotiota raoi aroaroia kain te utu, e kaotaraeaki iai te tangira ao te mwamwannano irouia kaaro. E tangirira Iehova bwa ti na itiaki n aaro naba akanne. E ataia bwa e rangi ni kakawaki te itiaki ibukini mwengaraoira. E ataia naba bwa itiakira e kaotiotaki iai aroarona ngkai bon ngaia Tamara are i karawa. Moan te kakawaki anne, bwa e kona n anaaki iai nanoia aomata ni kani beku iroun te Atua, ibukina bwa a norira bwa ti rangi n okoro ma kaain te aonnaba ae kamwara aei.
19. Ti na kanga n ataia bwa e kakawaki itiakin te rabwata?
19 N aaro raa aika ti riai n teimatoa n itiaki iai? Ni koauana, n iterani maiura ni kabane. E kamataata raoi Iehova nakoia ana aomata aika tibun Iteraera ngkoa bwa e rangi ni kakawaki itiakin te rabwata. (Nakoaia Ibonga 15:31) N te Tua Rinanoni Mote, e maroroakinaki iai aaro aika kaitiakan te maange n te aro ae riai, kaitiakani bwaai n amwarake, te tebo bai, te tebo wae ao ai kaitiakani kunnikai. (Te Otinako 30:17-21; Nakoaia Ibonga 11:32; Warekaia Iteraera 19:17-20; Te Tua-Kaua 23:13, 14) A kauringaki tibun Iteraera bwa e tabu Atuaia ae Iehova, ae nanona bwa e “itiaki,” “akea ana kairua” ao e “raoiroi.” A riai naba n itiaki ana toro te Atua ae itiaki.—Wareka Nakoaia Ibonga 11:44, 45.
20. Aaro raa aika ti riai n teimatoa n itiaki iai?
20 Mangaia are, ti riai n itiaki i nanora ao ai uaana naba ma tinanikura. Ti kakorakoraira naba ni kateimatoa itiakin ara iango. Ti kakaonimaki n nimti ana kaetieti Iehova ibukin te aroaro ni maiu ae itiaki, n aki ongea korakorani kakaraoan aaro ni wene ni bure aika kammaira irouia aomata aika a otabwaninira. Ma te kabanea ni kakawaki riki, ti na kamatoaira ni kateimatoa ara taromauri ae itiaki, n rarawa ni kabarekaaki irouia Aaro aika kewe. Ti aki kona ni mwaninga te kauring ae kairaki koreana rinanon te taamnei n te boki ae Itaia 52:11 ae kangai: “Kam na nako, kam na nako, kam na oti nako mai ikanne, tai ringa te bwai teuana ae kamwara; kam na oti nako mai buakona; kam na itiaki.” Ti kateimatoa itiakin ara taromauri ni boong aikai n arora n aki karaoa te bwai teuana ae irekereke ma taromauri aika kewe. N te katoto, e rangi n taabangaki kakaraoani bukamaru ao boongi ni motirawa irouia Aaro aika kewe n te aonnaba aei, ao anne bukina ae ti na taraia raoi bwa ti na aki irekereke iai. E koaua bwa bon te kangaanga teuana kateimatoaan te itiaki. Ma a kakorakoraia ana aomata Iehova ni karaoa anne ibukina bwa a a buokaki iai n teimatoa i nanon ana tangira te Atua.
21. Ti na kanga ni koaua raoi bwa ti teimatoa i nanon ana tangira te Atua?
21 E tangirira Iehova bwa ti na teimatoa i nanon ana tangira n aki toki. Ma ti riai ngaira n tatabemanira nako n taraia raoi bwa ti na karaoa ara kabanea n tamaroa bwa ti aonga n teimatoa i nanon ana tangira te Atua. Ti kona ni karaoa aei rinanon touani mwin ana katoto Iesu ao ni kaotakini kakoauaan tangiran Iehova iroura ngkana ti ongeaba n Ana tua nako. Ngkana ti karaoa aei, ti kona ni kakoauaa raoi iai bwa bon akea te bwai teuana ae e “kona ni karaureira ma ana tangira te Atua, ae e kaotaki i nanon ara Uea ae Iesu Kristo.”—I-Rom 8:38, 39, BK.
Ko Uringnga?
• E na kanga mataniwin nanora ni kona ni buokira bwa ti na teimatoa i nanon ana tangira te Atua?
• Bukin tera ngkai ti riai n tangiriia te koraki ake e tangiriia Iehova?
• Bukin tera ngkai e kakawaki karinean te mwaaka ni kairiri?
• Tera kakawakin te kakaitiaki irouia ana aomata te Atua?
[Te Bwaoki/Taamnei n iteraniba 25]
TE BOKI AE KARIKIRAKEA TE AROARO AE RAOIROI
N tain te Bwabwaro n 2008/2009 ao e otinako iai te boki ae 224-mwaitini baana ae atuna “Keep Yourselves in God’s Love.” Tera te kantaninga ibukin te boki ae boou aei? E katauraoaki ibukini buokaia Kristian bwa a aonga n rikirake n ataa ao n tangira ana kaetieti Iehova ao ni kaatuua iaiangoani kakawakin te aroaro ni Kristian. Neneran te boki ae “Keep Yourselves in God’s Love” e na kakorakoraa kakoauaan are te maeka ni kaineti ma ana kaetieti Iehova, bon te aroaro ae te kabanea n tamaroa ae ti riai ni maiuakinna ngkai, ao e kairira nakon te maiu n aki toki n taai aika a na roko.
Irarikin anne, e katauraoaki te boki aei bwa e na buokira n noria bwa e aki karawawata bwainan te ongeaba nakon Iehova. Ni kaitaraan anne, bon ngaia te anga ae ti kaotiotia nakon Iehova bwa mwaitira aron tangirana iroura. Ngaia are te boki aei, e na kairira bwa ti na titirakinira ni kangai: ‘Bukin tera bwa N na ongeaba iroun Iehova?’
Ngkana a karaoa te kairua ae kananokawaki tabeman ni kitana ana tangira Iehova, n angiin te tai e irekereke ma te mwakuri ae kairua ae a karaoia ao tiaki mani karakon te atatai n te reirei man te Baibara. Ai kakawakira ngkanne bwa ti na kakorakoraa ara tangira ao ni kakaitau ibukin ana tua Iehova ao booto n reirei man te Baibara, ake a kairira i nanoni bongini maiura! Ti kakoauaa raoi bwa te boki ae boou aei, e na buokiia ana tiibu Iehova ni katobibia te aonnaba bwa a na nene ni karaoan te eti ao ni kakoauaa raoi bwa Tatan bon te tia kewe, ma ae moan te kakawaki riki bwa ti na teimatoa i nanon ana tangira te Atua!—Iuta 21.
[Taamnei n iteraniba 23]
‘Ngkana kam kawakin au tua ao kam teimatoa i nanon au tangira, n ai arou ngkai I kawakin ana tua Tamau, ao I teimatoa i nanon ana tangira’