Bwaai n Ibuobuoki Ibukin Te Boki n Reirei ae Maiura ao Ara Mwakuri ni Minita
AOKATI 6-12
BAIKA KAKAWAKI AIKA MENA N ANA TAEKA TE ATUA | RUKA 17-18
nwtsty study notes—Rk 17:12, 14
mwaane aika tengaun aika rebera: N taai ake a karakinaki n te Baibara, a kaokoroia rebera ke a ikotaki ni maeka bwa a aonga ni kona n ibuobuoki i marenaia. (2Ue 7:3-5) N Ana Tua te Atua, a riai rebera ni maeka ni kararoaia. E riai naba ane e rebera ni kaotia nakoia tabemwaang n arona n tatakarua ni kangai: “I kamwara, I kamwara!” (NI 13:45, 46) Ni kaineti ma te Tua, a teiararoa rebera aikai mairoun Iesu.—Nora study note—Mt 8:2 ao Nanon Taeka, “Rebera; Rebera.”
kaotingkami nakoia ibonga: Ngkai e mena Iesu Kristo i aan te Tua ni menana i aon te aba, e ataia bwa e bwabwainaki te nakoa n ibonga are ana bwai Aaron ma kanoana, ao e tuangia rebera ake e kamarurungia bwa a na nakon te ibonga. (Mt 8:4; Mrk 1:44) N te Tua Rinanoni Mote, e riai te ibonga ni kakoauaa raoi bwa e a toki reberan te aomata anne. Imwina, e na mwananga te aomata anne nakon te tembora ma ana bwaintituaraoi ke ana karea, ae mannikiba aika uoman aika maiu aika itiaki, mwaangan te kai ae te tiira, te kunnikai ae uraroo, ao te utoba.—NI 14:2-32.
Ukerani Kaubwai n Taamnei Aika Kakawaki
nwtsty study note—Rk 17:10
akea bongara: Kuriiti, “akea manenara: akea uaara.” Te reirei ae kakawaki n ana kaikonaki Iesu bon tiaki taekan ae a riai tooro, ke taan rimwina n iangoiia bwa akea manenaia ke akea uaaia. Ni kaineti ma te kibu aei, te taeka ae “akea bongara” e nanonaki iai bwa tooro a iangoiia i bon irouia bwa a mangori, ao a aki kantaningaa karineaia ke kamoamoaaia ae okoro. A taku tabeman taan rabakau bwa e kabonganaaki te taeka aei n teina ae karakaraka ae nanona, “bon tooro ngaira aika ti aki riai ni mwannanoaki.”
nwtsty study note—Rk 18:8
te onimaki aei: Ke “te aeka n onimaki aei.” Kuriiti, “te onimaki.” Taeka tabeua ni Kuriiti aika kanimwaki imwain te taeka ae “onimaki” e kaotaki iai bwa e aki nanona Iesu te aeka n onimaki ae taabangaki bwainakina, ma bon te aeka n onimaki ae okoro are iai naba iroun te aine ae e a tia ni mate buuna are n ana kaikonaki Iesu. (Rk 18:1-8) E irekereke naba iai onimakinani mwaakan te tataro ao onimakinan te Atua bwa e na karaoa te kaetitaeka ae riai nakoia naake e rineiia. E aki kaekaa Iesu te titiraki ibukin te onimaki bwa a aonga taan rimwina n iangoia bwa tera aroni korakoran aia onimaki. E tonuraoi te kaikonaki ibukin te tataro ao te onimaki ibukina bwa e a tibwa tia Iesu ni kabwarabwarai kataaki ake a na rinanona taan rimwina.—Rk 17:22-37.
AOKATI 13-19
Ukerani Kaubwai n Taamnei Aika Kakawaki
nwtsty study note—Rk 19:43
oom aika boua aika kakang taboia: Ke “te oo ae te nono.” Te taeka ni Kuriiti ae khaʹrax e tii oti ikai n te Koroboki ae Tabu n te Taetae ni Kuriiti. E kabwarabwaraaki nanona bwa te “kai ae kakang tabona ke te boua ae e ooaki iai te tabo; te kai” ao e nanonaki naba iai “aia kaembwa tautia ae kateaki ni kaai; te oo ae te nono.” A koro bukin ana taeka Iesu n 70 C.E., ngke a katea te oo ke te nono n otabwaninia Ierutarem kaain Rom, i aani kairaia iroun Titus. Iai tenua bukina iroun Titus—e na tukiia I-Iutaia bwa a na aki birinako, a na waekoa n taenikai iai, ao a na matenibaki bwa a aonga n aantaeka. A korei aroka n te tabo anne tautian Rom bwa boua ake a otabwaninia iai Ierutarem.
nwtsty study note—Rk 20:38
bwa n ana taratara te Atua, a bane ni maiu: Ke “bwa n ana iango te Atua, a bane ni maiu.” E kaotaki n te Baibara bwa naake a maiu ma a ianena iroun te Atua, a boni mate n ana iango te Atua. (Ebt 2:1; 1Ti 5:6) N aron naba anne, ana toro te Atua aika akoaki irouna aika mate, a bon teimatoa ni maiu n ana iango Iehova, kioina ngkai bon ana kantaninga bwa e na kautiia.—Ro 4:16, 17.
AOKATI 20-26
Ukerani Kaubwai n Taamnei Aika Kakawaki
nwtsty study notes—Rk 21:33
A na mauna karawa ma aonnaba: A oti ni kiibu tabeua bwa a na teimatoa n aki toki karawa ma aonnaba. (KB 9:16; TA 104:5; TM 1:4) Ngaia are a kona ana taeka Iesu aikai n ataaki bwa te kaikonaki ae karakaraka, ae nanona bwa ngkana e riki te bwai ae bon aki kona n riki bwa e mauna karawa ma aonnaba, ma a na boni koro bukin ana taeka Iesu. (Kabotaua ma Mt 5:18.) E ngae n anne, karawa ma aonnaba ae taekinaki ikai e kona n nanonaki iai karawa ma aonnaba n te aro ni kaikonaki, ae taekinaki bwa “karawa nikawai ao te aonnaba nikawai” n te Kao 21:1.
a na bon aki mauna au taeka: Kabonganaan taeka ni Kuriiti aika uoua aika rairaki bwa “aki” ma te weabe, e katuruturuaki iai aki butimwaean te iango teuana, ae teretere raoi iai bwa a teimatoa ana taeka Iesu.
AOKATI 27–TEBETEMBWA 2
Ukerani Kaubwai n Taamnei Aika Kakawaki
nwtsty study note—Rk 23:31
te aroka ae maiureirei, ao . . . ngkana e a rai: N taraana e taekina Iesu te natannaomata ae I-Iutaia. Kaanga ai aron te aroka ae e a nimamate ma bon iai maiuna teutana ibukina bwa e mena Iesu i rarikia ao a bati I-Iutaia ake a kakoauaa. Ma n te tai ae aki maan, e na kamateaki Iesu, ao a na kabiraki n te taamnei ae raoiroi I-Iutaia aika kakaonimaki ao n riki bwa kaain te Iteraera n taamnei. (Ro 2:28, 29; Kar 6:16) N te tai anne, te natannaomata ae Iteraera ni koaua e a mate n te aro n taamnei, kaanga aron te aroka ae rai.—Mt 21:43.
nwtsty media
Te Neera n Riin Bukin te Wae
Aio taamneini katotongan te ri mani bukini waen te aomata ae e ewaraki n te neera ae 11.5 te tientemita (4.5 inti) abwakina. E kuneaki n 1968 n tain te keniken i meangin Ierutarem. E karaoaki te neera aei n ana tai Rom rimoa. E reke mai iai te bwai ni kakoaua ae kaotaki iai bwa a kabonganaaki neera rimoa ibukini katineaia aomata i aon te kai. Tao titeboo te neera aei ma neera ake a kabongana tautian Rom ni katinea iai Iesu Kristo i aon te kai. E kuneaki te neera aei n te bwaoki teuana ae karaoaki man te atibu, ae aranaki bwa te bwaoki n ri are a kawakinaki iai riia maate aika mwau. E oti iai bwa e kona naba n taunaki te aomata ae tauraki i aon te kai.