9 Kinaakim

AE NANONAKI IAI

E bati riki ae nanonaki n aroarom ae ko kinaaki iai nakon aram ao teim. E irekereke ma aroaroni maium, baika ko kakoauai, ao anuam. Ni koauana, aroarom ae ko kinaaki iai e oti bwa te aeka n aomata raa ngkoe, i nanom ao n taraakim.

BUKINA NGKAI E KAKAWAKI KINAAKIM

Ngkana e rangi ni kakawaki iroum kinaakim, ko na bon tei ibukini baika ko kakoauai, ao n aki kariaia tabonrorom bwa a na taua arom.

“A bati aomata aika ai aroia taore ake ko nonoriia n te titooa. A aki rinei kunnikaia aika a na bwaini, ma a rinei tabemwaang.”—Adrian.

“I a rabakau n tei ibukin te eti e ngae ngke e kangaanga. I a kinaia raoraou ni koaua mani baika a kakaraoi ao baika I kakaraoi i rarikia.”—Courtney.

TE BOTO N REIREI MAN TE BAIBARA: “Katoka katotongan aron te waaki ae ngkai i aon te aba, ma kam na onikaki n aromi ni kabooui ami iango.”—I-Rom 12:2.

TE BWAI AE KO KONA NI KARAOIA

Iangoia bwa te aeka n aomata raa ngkoe ngkai, ao ko kan riki bwa te aeka n aomata raa, n arom n iaiangoa raoi korakoram, mamaaram, ao baika ko kakoauai. Te anga ae raoiroi ni moanakin aei boni mani kaekaan titiraki aikai.

Korakorau: Baikara au tarena ao baika I mwaatai iai? Baikara baika I korakora iai? (N te katoto: I roroko raoi i aon te tai? I taubaang? I mwakuri korakora? I tituaraoi?) Baikara baika raraoi aika I kakaraoi?

TE IBUOBUOKI: E kangaanga bwa ko na atai baika raraoi aika ko a tia ni karaoi ke n taekin? Titirakina am karo temanna ke raoraom ae ko onimakinna bwa baikara baika ko korakora iai ae e noria ao bukin tera.

TE BOTO N REIREI MAN TE BAIBARA: “Ke e tuoa oin ana mwakuri temanna ma temanna, ao e na karekea iai bukini kimwareireina i bon irouna, ma tiaki n te kabotaua ma temanna.”—I-Karatia 6:4.

Mamaarau: Baikara aroarou aika I riai ni kanakoraoi riki? N ningai ae N na bae ni karaoa iai ae kairua ngkana I kataaki? Baikara aanga ake I kona ni kaotiota riki iai te taubaang?

TE BOTO N REIREI MAN TE BAIBARA: “Ngkana ti kangai, ‘Akea ara bure,’ ao ti burebureira i bon iroura.”—1 Ioane 1:8.

Baika I kakoauai: Tera te kaetieti ibukin te aroaro ni maiu ae riai ae I kakairi iai, ao bukin tera? I kakoauaa te Atua? Tera te bae I kakoauaa iai bwa bon iai ngaia? Baikara mwakuri aika I iangoi bwa a kairua, ao bukin tera? Baikara baika I kakoauai bwa a na riki n taai aika a na roko?

TE BOTO N REIREI MAN TE BAIBARA: “E na teimatoa n tararuaiko te konabwai n iaiango raoi, ao e na kakawakiniko te ataibwai.”—Taeka N Rabakau 2:11.