Kawakinan Raoi Arora Ni Kristian

“E taku Iehova, Bon taani kakoaua au taeka ngkami.”​—ITAIA 43:10.

1. Aekakira aomata ake e katikiia Iehova bwa a na iraorao ma ngaia?

NGKANA ko roko n te Tabo n Taromauri, ao taraiia raoi aomata aika a mena iai. Antai aika a roko iai? Tao iai rooro-n-rikirake aika a tabe n ongora n reirei aika raraoi man te Baibara. (Taian Areru 148:12, 13) Tao ko na noria naba bwa iai atun utu tabeman aika kakorakoraia ni karaoa nanon te Atua, e ngae ngkai a mena i buakoia aomata aika kamangora kakawakin te maiu n utu. Tao ko na noriia kaara aika tangiraki, aika kakaonimaki ni beku iroun Iehova n aki ongea aorakin te kara are a ituaki iai. (Taeka N Rabakau 16:31) E korakora tangiran Iehova irouia ni kabaneia, ao e kukurei Iehova ni katikiia bwa a na iraorao ma ngaia. E taekina ae kangai Natin te Atua: “Akea ae e kona n nakoiu ngkana e aki katikia te Tama are e kanakoai.”​—Ioane 6:37, 44, 65, BK.

2, 3. E aera ngkai e kona ni kangaanga kawakinan arora ni Kristian?

² Te koaua bwa ti taonaki n te kimwareirei ngkai ti mena i buakoia aomata aika tangiraki ma ni kakabwaiaki iroun Iehova. Ma e ngae n anne, e kona ni kangaanga ataakin kawakinan arora ni Kristian i nanoni boong aika “kamamate” aikai. (2 Timoteo 3:1) E moamoa riki aei irouia ataei ake a tabe n ikawairake n utu ni Kristian. E taku te roro-n-rikirake temanna: “E ngae ngke I kaakaei botaki ni Kristian, ma akea tiau ae irekereke ma te onimaki ae I uaiakinna, ao e tuai naba reke irou te kani beku iroun Iehova.”

³ Temwangina, a boni kani beku iroun Iehova, ma tao a anaaki riki nanoia n aia kairoro tabonroroia ke bwain te maiu aei, ke a kaririaki ni baika bure. Ngkana ti karawawataki ni baika aki-raraoi, ti kona ni moanna ni kabuaa arora ni Kristian. N aron anne, a mwaiti kaain te aonnaba aei aika a iangoi kaetieti n te Baibara ibukin te aroaro ni maiu ae riai, bwa a bane taia, ke a aki manena ibukin taai aikai. (1 Betero 4:4) A taku tabeman bwa e aki rangi ni kakawaki taromaurian te Atua n aron are e a tia ni kataua. (Ioane 4:24) N ana reta Bauro nakoia kaain Ebeto, e taekina iai te “tamnei,” are nanona te aroaro ae ituia angiia kaain te aonnaba. (I-Ebeto 2:2) Te taamnei aei e kairoroia aomata bwa a na kaboraoa aia iango ma aia iango aomata aika aki ataa Iehova.

4. E kanga Iesu ni kaatuua riain kawakinan arora ni Kristian?

⁴ Ma ti ataia ngaira aika ana toro Iehova aika a a tia ni katabuaki nakoina, bwa e na rangi n nanokawaki ngkana iai i buakora ae ataei ke ae kara, ae a kabuaa arona ni Kristian. E riai ni boto arora ni Kristian ae raoiroi, i aon ana kaetieti Iehova ao baika e kaantaningai mairoura. E riai aei ibukina bwa ti karikaki bwa katotongana. (Karikani Bwaai 1:26; Mika 6:8) Te Baibara e kabotaua arora ni Kristian ae riai ma te kunnikai ae kona n noraki irouia aomata. E taekina ae kangai Iesu ibukin taai aikai: “Norai, I a nako mai n ai aron te tia ira. E a kabaia ane kamarurungnga ni kawakini kunnikaina, ba e kawa n nakonako n akea karabana, ao a na nora ae e maamaa iai.”a (Te Kaotioti 16:15) Ti aki manga kani buuti aroaro ao kaetieti ni Kristian ake ti a tia ni bwain, ibukin kairara irouia ana aomata Tatan. Ngkana ngaia anne ae riki, ao ti na kabuai ara “kunnikai” aikai. E na kananokawaki ma ni kamaamaa ngkana e riki anne.

5, 6. Bukin tera ngkai moan te kakawaki ae ti na aki nanououa ni kaineti ma waakin ara onimaki?

⁵ Baika ti karaoi ni maiura a rangi n irekereke ma kawakinan raoi arora ni Kristian. N te aro raa? Ngkana e kabuaa arona ni Kristian te tia taromauria Iehova, e kona naba ni kabuaa iai tiana aika raraoi ake e uaiakin ibukin maiuna. E okioki te Baibara ni kauringira bwa e aki raoiroi ngkana ti nanououa n aron anne. E reirei ni kangai te tia rimwin Kristo ae Iakobo: “Ane nanokokoraki ai aron naoni marawa ae kabutaaki n te ang, ao e kaueeaki. Ba e na tai taku te aomata anne ba e na anganaki te bwai teuana mairoun te Uea; bon te aomata ae nanououa, ae aki teimatoa n arona nako.”​—Iakobo 1:6-8; I-Ebeto 4:14; Ebera 13:9.

⁶ Ti na kanga ni kawakini arora ni Kristian? Tera ae e na buokira ni katamaroaa riki tangiran te kakabwaia ae kakawaki ae reke iroura, ngkai ti a taromauria Teuare Moan te Rietata? Taiaoka n iangoi aanga aikai.

Kateimatoaa Raoi Arom ni Kristian

7. Bukin tera ngkai e manena butiakin Iehova bwa e na tuoira?

⁷ Teimatoa ni kakorakora riki am iraorao ma Iehova. Te bwai ae te kabanea ni kakawaki ae reke iroun te Kristian, bon ana iraorao ma te Atua. (Taian Areru 25:14; Taeka N Rabakau 3:32) Ngkana iai baika ti nanououa iai ni kaineti ma arora ni Kristian, ti riai ni waekoa n tuoa aron raoiroin ao korakoran ara iraorao ma te Atua. E raoiroi ana bubutii te tia areru ae kangai: “Iehova, Ko na tarataraai, ao nora arou ba ua ra; Ko na katai au iango aika raba ma nanou.” (Taian Areru 26:2) E aera ngkai moan te kakawaki karaoan te tutuo aei? Ibukina bwa ti babanga ni motika raoi taekan nanora ao ara iango aika raba, i bon iroura. Bon tii Iehova ae kona n ota raoi n aomatara ae i nanora, ae taekan baika kaira ara mwakuri, ara iango, ao nanora.​—Ieremia 17:9, 10.

8. (a) Ti na kanga ni kakabwaiaki man tuoara iroun Iehova? (b) Tera buokam ae ko a tia n anganaki ni kaineti ma rikirakem n te aro ni Kristian?

⁸ Ngkana ti butiia Iehova bwa e na tuoira, nanona ngkanne ti butiia bwa e na kataira. E kona ni kariaia rikin bwaai aika a kaotii nanora ni koaua. (Ebera 4:12, 13; Iakobo 1:22-25) Ti riai ni butimwaei kataaki aikai ibukina bwa a anganira ara tai ni kaota aron korakoran tangiran Iehova iroura. E na oti iai bwa ti ‘moanibaa n raoiroi, ma ni kororaoi, n aki kai nanora n te bwai teuana.’ (Iakobo 1:2-4) Ao n te tai are ti rinanon iai te kataaki, e na rikirake ngkanne ni korakora ara onimaki.​—I-Ebeto 4:22-24.

9. Bukin tera bwa ti riai ni kakoauaa i bon iroura bwa a koaua baika taekinaki n te Baibara?

⁹ Reirei n te Baibara bwa ko aonga ni kakoauaa. E kona n riki ni mamaara arora ngaira aika ti beku iroun Iehova, ngkana ti aki kabotoa arora i aon te atatai man te Baibara. (I-Biribi 1:9, 10) Kristian ni kabane aika ataei, ikawai, ke kaara, a riai n rauaki nanoia bwa baika a kakoauai, bon te koaua ae taekinaki n te Baibara. E kaungai nanoia raona n onimaki Bauro ni kangai: “Kam na katai bwaai ni kabane ba ua ra; kam na taua ae raoiroi.” (1 I-Tetaronike 5:21) Kristian aika ataei aika a maaka te Atua aia karo, a riai n ataia bwa a aki kona ni karabaia i aan aia onimaki aia karo. Tawita e kaunga nanon natina ae Toromon bwa e na ‘ataa Atuan tamana ao n toro irouna n te nano ae moan te raoiroi.” (1 Rongorongo 28:9) E na bon aki tau ngkana te tei ae Toromon e tii taraa aron rikiraken onimakinan Iehova iroun tamana. Ma e riai ni karekea oin ana atatai ibukin Iehova. E boni karaoa anne. E butiia te Atua ni kangai: “Ko na anganai te rabakau ma te ataibwai ngkai, ba N na otioti nako ma n rinrin i matan te botanaomata aei.”​—2 Rongorongo 1:10.

10. Bukin tera ngkai e aki bure tabekan titiraki aika riai mairouia aomata aika e raoiroi nanoia?

¹⁰ Te onimaki ae korakora e riai n aanaki i aon te atatai. E taekina ae kangai Bauro: “E reke te onimaki n te ongora.” (I-Rom 10:17) Tera ae e nanonaki iai? E nanonaki bwa ngkana ti kakaamwarakeaki n Ana Taeka te Atua, e na kakorakoraki riki iai iroura onimakinan Iehova, ana berita, ao ana botaki. Tabekan titiraki ma nanora aika raoiroi, e na karekei kaeka aika karaunano. Ao irarikin anne, manga nora ana reirei n ibuobuoki Bauro aei n I-Rom 12:2: “Kam na riki n ata Nanon te Atua, are raoiroi, are kakukurei, are koro-raoi.” Ti na kanga ni karaoa anne? Rinanon karekean “atakin te koaua” iroura. (Tito 1:1) E na buokira taamnein Iehova bwa ti na ota naba n reirei aika e matoatoa reken te ota iai. (1 I-Korinto 2:11, 12) Ti riai n tataro ni bubutii buokara mairoun te Atua ngkana iai te bwai ae ti aki rangi n ota iai. (Taian Areru 119:10, 11, 27) E tangirira Iehova bwa ti na ota n ana Taeka, ni kakoauaa, ao n ongeaba iai. E butimwaei titiraki aika riai mairouia aomata aika e raoiroi nanoia.

Kamatoaa Nanom bwa Ko na Kakukureia te Atua

11. (a) Tangiran tera ae e kona ni mwamwanaira? (b) Ti na kanga ni kona n ninikoria n rarawa nakon kairara irouia tabonrorora aika aki-raoiroi?

¹¹ Kakukureia te Atua, ao tiaki aomata. E boni koaua bwa arora, e rotaki naba teutana irouia aomata aika ti iraorao ma ngaiia. A bane ni kainnanoi raoraoia aomata, ao a rauaki ma ni kukurei nanora ngkana ti tabeakinaki irouia tabemwaang. I nanon rikirakeia aomata ao i nanoni maiuiia imwina riki, ao e kona ni korakora rotakia irouia tabonroroia, n te aro are a kan katotongia raoraoia ma ni kakukurei nanoia. Ma raora ao tabonrorora, a aki moanibwaia kaakaraoan ae ti na kabwaia iai n taai nako. N taai tabetai, a bon tii tangiria bwa a na raonaki ni karaoa te mwakuri ae buakaka ae a kani karaoia. (Taeka N Rabakau 1:11-19) N te tai are e a ira iai nanoia tabonrorona aika aki-raoiroi te Kristian, e na bae ni kataia ni karabaa moa arona ni Kristian. (Taian Areru 26:4) E kauring ni kangai Bauro: “Tai katotonga katein aonteaba aei. (I-Rom 12:2, BK) E anganira te korakora Iehova ae ti kainnanoia ibukin kaitaraan te kairiri ae buakaka mairouia tabonrorora.​—Ebera 13:6.

12. Tera te boto n reirei ao tera te katoto ae kona ni kakorakoraira bwa ti na aki kakeaa ara koaua ni kaineti ma onimakinan te Atua?

¹² Ngkana te kairiri mairouia tabeman e na karika te kangaanga nakon arora ni Kristian, ti riai n uringnga bwa e kakawaki riki te kakaonimaki nakon te Atua, nakon akoakira irouia aomata ke karaoan ae tangiraki irouia. E kaotaki te boto n reirei ae tararuaa maurin ara onimaki ae kangai n Te Otinako 23:2: “Ko na tai kakairi iroun te koraki ae bati ni karaoa ae buakaka.” E bon rawa Kareba n irarang irouia angiia tibun Iteraera rimoa ngke a nanououa ni kaineti ma ana konabwai Iehova ni kakoroa bukin Ana berita. E bon aki nanououa bwa a kona n onimakinaki ana berita te Atua, ao n tokina, e rangi ni kakabwaiaki iai. (Warekaia Iteraera 13:30; Iotua 14:6-11) Ko kukurei naba n rawa ni butimwaei iango aika bwainaki irouia angiia aomata, bwa ko aonga ni kawakina am iraorao ma te Atua?

13. Bukin tera bwa ko wanawana ngkana ko kaotiotia nakoia aomata tabemwaang ae te Kristian ngkoe?

¹³ Kaotiotia ae bon te Kristian ngkoe. Aron kawakinan arora ni Kristian ae te kabanea n raoiroi, boni man moantaaira ni karaoi mwakuri aika irekereke ma arora ni Kristian. A taekina ae kangai tibun Iteraera rimoa aika kakaonimaki, ngke a riribaaki ibukin kani karaoan nanon Iehova: “Ana toro Atuani karawa ma aonaba ngaira.” (Etira 5:11) Ngkana ti rotaki n aroia taani kairiribai ke n aia taeka, ti kona n taonaki n te maaku n te aro ae ti aikoa kona ni manga mwakuri. Te nano ni kan kakukureia aomata ni kabane e na kauarerekea naba bonganan ara mwakuri. Mangaia are tai maaku. E raoiroi ngkana ko katereterea nakoia aomata bwa bon Ana tia Kakoaua Iehova ngkoe. Bwaina te karinerine ngkana ko kamataatai raoi baika ko iangoi bwa a kakawaki, am koaua, ao nanom ni Kristian. Kaongoia aomata tabemwaang bwa ko a tia ni bairea ae ko na maiuakina ana kaetieti Iehova aika moan raraoi ni kaineti ma te aroaro ni maiu ae riai. Katereterea bwa ko na bon kakaonimaki nakon arom ni Kristian. Kaotia bwa ko kamoamoaa ngkai ni bwainan te aroaro ni maiu ae riai. (Taian Areru 64:10) Kaotiotan ae te Kristian ngkoe ae ko matoatoa n am onimaki e na kakorakorako riki, e na kamanoko man baika karuanikai, ao e kona ni kairiia aomata nakon kan ataakin taekan Iehova ao ana aomata.

14. E riai bwa a na bwara nanora n te kakaniko ke te kairiribai? Kabwarabwaraa.

¹⁴ Te koaua bwa tabeman a na kakaniko ke n riribaiko. (Iuta 18) E na tai bwara nanom ngkana iai tabeman aika a aki kukurei ngkana ko kabwarabwarai taekan baika ko iangoi bwa a kakawaki, nakoia. (Etekiera 3:7, 8) E ngae ngkana e rangi n ingainga nanom iai, ma ko na aki anai nanoia aomata ngkana a bon rawa ni kan anaaki nanoia. Uringa ngkoa Barao. E bon aki kona ni kakoauaa Barao bwa e taetae Mote ibukin Iehova, e ngae ngke a kanakoaki rekenikai n ikotaki naba ma maten ana karimoa. Mangaia are tai kariaia maakakia aomata bwa e na taona nako nanom ni kani kaotiko bwa te Kristian ngkoe. Mwiokoa Iehova ma n onimakinna bwa e na buokira n tokanikai i aon te maaku.​—Taeka N Rabakau 3:5, 6; 29:25.

Karekea Reireiam man Baika Riki Rimoa, ao Kawenea Aani Maium ae E na Roko

15, 16. (a) Tera kaubwaira ae reitaki ma ara onimaki? (b) Ti na kanga ni kabwaia ngkana ti kabongana te Baibara ni kananoi ara iango i aoni kaubwaira aika reitaki ma ara onimaki?

¹⁵ Tatangiri kaubwaira aika reitaki ma ara onimaki. A na kabwaia Kristian ngkana a kabongana te Baibara n iaiangoi kaubwaia aika reitaki ma te onimaki are a anganaki. E nanonaki naba n te kaubwai aei, te koaua man Ana Taeka Iehova, te kaantaninga ibukin te maiu are aki toki, ao te mwakuri ae rine ae ti anganaki ae ti na kaotiotia ibukin te Atua ma n tataekina te rongorongo ae raoiroi. Ko ataa tabem ae ko anganaki ae ko na karaoia i buakoia taani Kakoauaa te Atua aika rangi ni kakabwaiaki, ake a mwiokoaki n te mwakuri ni kakamaiu ae uarongorongoan te Tautaeka n Uea? Uringnga bwa bon Iehova are e kangai: “Bon taani kakoaua au taeka ngkami.”​—Itaia 43:10.

¹⁶ Ko kona n titirakiniko ni kangai: ‘I iangoa te kaubwai aei bwa te bwai ae rangi ni kakawaki? E rangi ni kakawaki irou n te aro are I a moanibwaia riki kaakaraoan nanon te Atua nakoni bwaai ni kabane? E rangi ni korakora tangirana irou, n te aro are I a kakorakoraki iai bwa N na eki nako kariri ni kabane?’ Iangoan kaubwaira aei, e kona naba ni karikirakea i nanora te mweeraoi n taamnei ae reke tii i nanon ana botaki Iehova. (Taian Areru 91:1, 2) Iaiangoan baika riki n ana botaki Iehova i nanon ririki aika tibwa nako, e na kaotia nakoira bwa akea te bwai ke te aomata ae kairiribai ae e kona ni kamaunaia ana aomata Iehova mai aon te aba aei.​—Itaia 54:17; Ieremia 1:19.

17. Tera riki ae ti riai ni karaoia, irarikin iaiangoan kaubwaira ae ti anganaki ae reitaki ma ara onimaki?

¹⁷ Tiaki nanona bwa ti na tii iangoa aron kaubwaira ae reitaki ma ara onimaki ae ti anganaki, n akea riki te bwai ae ti na karaoia. Ti riai ni bane ni karikirakea i nanora te iraorao ae kaan ma te Atua. Ngke e a tia ni korakai ni mwakuri Bauro ibukin kateimatoan aia onimaki Kristian ake i Biribi, e a manga korea ae kangai nakoia: “Ma ngaia aei, ngkami aika kam tangiraki i rou, ngkai kam irira nanou, tiaki ti ngke I mena i roumi, ma a bati riki iran nanou i roumi, ngkai I aki mena i roumi, ao kam na mamakuri kamaiuami ni maku ma n ruru.” (I-Biribi 2:12) Ti aki kona n onimakina temanna bwa e na karekea kamaiuara.

18. E na kanga kabatiaan karaoan mwakuri aika irekereke ma te ekaretia ni Kristian, ni kakorakoraa riki nanora ni kani kawakin arora ni Kristian?

¹⁸ Kabatiaa karaoan mwakuri ni Kristian. E a tia n noraki bwa “e reke aron te aomata man te mwakuri are e karaoia.” A a tia Kristian ni boong aikai ni mwiokoaki ni karaoan te mwakuri ae moan te kakawaki, ae tataekinan euangkerion Ana Tautaeka n Uea te Atua ae e a tia n tei. E kangai Bauro: “I tuangingkami, ngkami bekan: bon aia Abotoro bekan ngai, ao I kamoamoaai n au makuri.” (I-Rom 11:13, BK) Ara mwakuri n uarongorongo e kaokoroira ma kaain te aonnaba aei, ao karaoan te mwakuri aei e kakawaki ni kaineti ma arora ni Kristian. Kabatiaan karaoan mwakuri aika irekereke ma te ekaretia ni Kristian, n aron kaakaean botaki, buokan katean taabo n taromauri aika boou, buokaia aomata aika kainnano, ao mwakuri n aron aikai, a na kakorakorai riki nanora ni kan kawakin arora ni Kristian.​—I-Karatia 6:9, 10; Ebera 10:23, 24.

Te Aro ni Kristian E Karekei Kakabwaia

19, 20. (a) Baikara kakabwaia aika ko a tia n anganaki ngkai ko a riki bwa te Kristian? (b) E boto i aon tera, reken arora ni koaua?

¹⁹ Iangoi kakabwaia aika mwaiti ake a a tia n reke iroura ibukina bwa ti waakina te Aro ni Kristian ni koaua. Ti kakabwaiaki ngkai ti kinaaki iroun Iehova, ngaira n tatabemanira nako. E taekina ae kangai te burabeti are Maraki: “Ngkanne a taetae i boni irouia te koraki ake a maka Iawe, ao e ongo aia taeka Iawe. Ao e koreaki i matana te boki ike a tauaki iai muia akana a maka Iawe ma ni karinea.” (Maraki 3:16, BK) Ti kona n riki bwa raoraon te Atua. (Iakobo 2:23) A katamaroaki aroaroni maiura ngkai ti kaakaraoi mwakuri aika materaoi ma ni manena, ao n uaiakin tiia aika raraoi. Iai naba iroura kaantaningan te maiu are aki toki.​—Taian Areru 37:9.

²⁰ Uringnga bwa arom ao manenam ni koaua e boto i aon ana taratara Iehova ni kaineti ma raoiroim, ao tiaki i aon aia taratara aomata. Tao tabeman a na taraira ni kaineti ma te kaetieti n aomata ae aki-kororaoi. Ma ana tangira te Atua ao arona n tabeakinia aomata e katereterea aron kawakinara. Bwa e oti iai bwa bon ana bwai te Atua ngaira. (Mataio 10:29-31) Ao tangiran te Atua iroura e kona n anganira arora ni koaua ma ni kaota te kawai ae ti riai n toua i nanoni maiura. “Ma ane e tangira te Atua, ao e ataki iroun te Atua.”​—1 I-Korinto 8:3.

[Kabwarabwara ae nano]

Ko Uringnga?

• Bukin tera ngkai moan te kakawaki ae Kristian a na kawakina raoi aroia ni Kristian?

• Ti na kanga ni kateimatoaa raoi arora ni Kristian?

• Ngkana ti iangoia bwa antai ae ti na kakukureia riki nanona, baikara bwaai aika kona ni buokira ni karaoa te motinnano ae riai?

• Tera irekereken kawakinan arora ni Kristian, ma maiura nakon taai aika imwaira?