IBUKIA AKE A ATAEI RIKI
11 Te Taningamarau
AE NANONAKI IAI
A aki mamaaka te mwakuri aomata aika taningamarau. Ma a kani mwakuri korakora ibukini karekeani baike a kainnanoi ao ibukini buokaia tabemwaang, e ngae naba ngkana tiaki te mwakuri ae tangiraki irouia aomata.
BUKINA NGKAI E KAKAWAKI TE TANINGAMARAU
Ti boraoi n iango ma anne ke tiaki, ma e rangi ni bati te tabe n te maiu aei. Ma te taningamarau e na kanakoraoa arom n te aonnaba aei ae a bati iai aika aki kani mwakuri korakora.—Te Minita 3:13.
“I noria bwa ngkana ko mwakuri korakora, ao e na reke iroum te kukurei ao te raunnano. E kairai te raunnano anne bwa N na kani mwamwakuri. Ao e na buokiko te kani mwamwakuri ni karekea naba taekam ae raoiroi.”—Reyon.
TE BOTO N REIREI MAN TE BAIBARA: “Iai te kabwaia n aeka ni mwakuri korakora ni kabane.”—Taeka N Rabakau 14:23.
TE BWAI AE KO KONA NI KARAOIA
Karikirakea te iango ae riai ibukin te mwakuri, n arom ni kakairi ni baika kabwarabwaraaki ikai.
Kataneiako ni mwakuri raoi. Kabanea raoi nanom n te bae ko karaoia, ae tao karaoan tabem ni mwengam, katiaan am bwai n reirei ni mwengam, ke am mwakuri ni kareketianti. Ngkana ko a bwaati raoi te mwakuri teuana, ukeri aanga ake ko na kabaitiia riki iai ke ni katamaroaa riki. Ngkana ko a rikirake ni mwaatai iai, ao ko na boni kimwareirei n am mwakuri.
TE BOTO N REIREI MAN TE BAIBARA: “Ko a tia n nora te aomata ae mwaatai n ana mwakuri? Ane e na tei i mataia ueea, ao e na aki tei i mataia akana mangori.”—Taeka N Rabakau 22:29.
Karababaanako am taratara. N angiin te tai ngkana ko karaoi raoi mwiokoam, a na kabwaia iai tabemwaang. N te katoto, ngkana ko taningamarau ni karaoa tabem ni mwengam, ko a kabebetea iai uotaia am utu.
TE BOTO N REIREI MAN TE BAIBARA: “E kakukurei riki te anga nakon te anganaki.”—Mwakuri 20:35.
Karaoa ae bati riki. N oneani mwini karaoan ae bon tau, kataia ni karaoa ae bati riki nakon are ko tuangaki. N te aro aei, ko bairea iai oini maium ni karaoa ae bati riki tiaki ibukina bwa ko kairoroaki nako iai, ma ibukina bwa ko boni kani karaoia.—Mataio 5:41.
TE BOTO N REIREI MAN TE BAIBARA: E na “aki tebonaki am akoi nakoiu ma e na bon nako mai nanom.”—Biremon 14.
Kabaerantiko. A aki taningaroti aomata aika taningamarau, ma a aki naba baba ni mwakuri. A kabaerantiia raoi ni karekea kimwareireia n aia mwakuri korakora ao n aia tai ni motirawa.
TE BOTO N REIREI MAN TE BAIBARA: “E raoiroi riki te motirawa ae uarereke nakon te mwakuri korakora ae bati ao kaean te ang.”—Te Minita 4:6.