Reken te Kukurei n te Mwakuri Korakora

KARIKIRAKEA TE IANGO AE RAOIROI IBUKIN AM MWAKURI

E ngae ngke e rangi n irekereke am mwakuri ma am iango, korakoram ke i marenani baika uoua aikai, ma ko riai n ataia ae “e reke aron te aomata n te makuri nako.” (Taeka N Rabakau 14:23, BK) Tera aron te aomata ae reke mai iai? Teuana te bwai ae reke iai, e buokira te mwakuri korakora bwa ti na tabeakini baike ti kainnanoi. Ni koauana, e beritanna te Atua bwa e na karerekei kainnanoia te koraki ake a taromauria ma nanoia ni koaua. (Mataio 6:31, 32) Ma e kantaningaira naba bwa ti na taningamarau ni kakorakoraira ni karekea ara mwakuri ibukini maiura.—2 I-Tetaronike 3:10.

Mangaia are, ti kona n iangoa ara mwakuri bwa e na karokoira n tiara. Te mwakuri bon te aro ae riai ibukin tabera. E taku Joshua ae 25 ana ririki: “Katauraoani bwaai ibukim boni kakororaoan tabem. Ngkana ko kona ni kabooi baika ko kainnanoi, ngkanne a a bon reke baika a kantaningaaki man am mwakuri.”

Irarikin anne, e boutokaaki te mwakuri korakora n onimakinan am konabwai. Ni koauana, e bon rangi ni kangaanga te mwakuri korakora. Ngkana ti irii nanon tuan ara mwakuri e ngae naba ngkana e kabotu ke e kangaanga, ma ti kona ni karekea te raunnano n ataakin ae ti teimatoa ni karaoa ae moan te raoiroi. Ti a tia n tokanikai i aon tangiran te rarawa ni mwakuri korakora. (Taeka N Rabakau 26:14) N iangoan anne, ko a namakina te raunnano man te mwakuri. E taku Aaron are mwaneweaki n te kaongora imwain aei: “I kukurei n te namakin ae reke irou imwin au mwakuri korakora n te bong teuana. I kona ni kua ao tao e aki noraki irouia tabeman au mwakuri, ma I ataia ae I a tia ni kakororaoa te mwakuri teuana.”

KABANEA NANOM N AM MWAKURI

E kamoamoaaki n te Baibara te mwaane ae “tataningamarau n ana makuri” ao te aine ae e “beku ni baina ma te nanoraoi.” (Taeka N Rabakau 22:29; 31:13, BG) Ni koauana, e aki kona ni mwaatai te aomata ngkana akea te mwakuri ae karaoia. Ao tabeman i buakora, a kukurei ni karaoi bwaai aika ti aki mwaatai iai. Tao anne bukina ngkai a mwaiti aika a aki kukurei n aia mwakuri, ibukina bwa a aki kakorakoraia bwa a aonga ni mwaatai.

Ni koauana, e kona n reireinaki te aomata bwa e na kukurei n aeka ni mwakuri nako ngkana e karaoi ma ana iango ae eti—ae nanona e na kaatuua ana iango n reiakina arona ni karaoa ana mwakuri n te aro ae nakoraoi. E taku William ae 24 ana ririki: “E na rangi n rau nanom ngkana ko karaoa am kabanea ni konaa ao n nori mwina. E aki kona n reke te namakin anne mani katawean ke karaoan te mwakuri ae karako.”

KAATUUA AM IANGO NI KAKABWAIAAIA AOMATA N AM MWAKURI

Rarawa n te bwai ni kamwane are tii iaiangoani mwaitin te mwane ae rereke iroum. Ma titirakiniko ni kangai: ‘Bukin tera bwa I tangira te mwakuri aei? Tera ae na riki ngkana e aki karaoaki te mwakuri ke e aki eti karaoana? A na kangaa ni kakabwaiaaki aomata n au mwakuri?

E raoiroi riki iaiangoan te kabanea n titiraki anne ibukina bwa e rangi ni karaunano ataakini kakabwaiaaia aomata n ara mwakuri. E taku Iesu: “E kakukurei riki te anga nakon te anganaki.” (Mwakuri 20:35) Iai riki aika kakabwaiaaki n ara mwakuri n aroia naake ti buokiia ao taani kammwakuri, ao iai naba ake a kakabwaiaaki man ara mwakuri korakora. A irekereke naba iai kaain ara auti ao naake a maiu ni kainnano.

Kaaini batara. Ngkana e mwakuri korakora mataniwin te utu ni karerekei kainnanoia kaaini batana, a kakabwaiaaki iai n aanga aika uoua. Te moan, e na taraia raoi bwa a na reke baika a kainnanoi ibukini maiuia n aron te amwarake, te kunnikai ao te auti. E a boni kakoroa iai nanoni mwiokoana mairoun te Atua ngkana e “karekei kainnanoia ana koraki ake e bon riai n tabeakinia.” (1 Timoteo 5:8) Te kauoua, e reireinia kaain ana utu te tia karekea te maiu ae taningamarau, bonganan te mwakuri korakora man ana katoto. E taku Shane ae mwaneweaki n te kaongora are mai mwaina: “Bon te banna ni katoto ae rangi n tamaroa tamau n ana mwakuri ae raoiroi man onimakinaki. E boni kakaonimaki ao ni mwakuri korakora ni kabane maiuna, n angiin ana tai n te kabentaa. Man ana katoto, ao I a tia n reiakina iai kakawakin te mwakuri ma baim, ni katei iai bwaai ake a na bongana ibukia aomata.”

Naake a maiu ni kainnano. E anga ana taeka n reirei te abotoro Bauro nakoia Kristian bwa a na ‘mwakuri korakora bwa e aonga n reke naba aia bwai ae a na angan ane kainnano.’ (I-Ebeto 4:28) Ni koauana, ngkana ti mwakuri korakora ni karerekei baika ti kainnanoi ma ara utu, ti kona naba iai ni buokiia naake a maiu ni kainnano. (Taeka N Rabakau 3:27) Ngaia are man te mwakuri korakora, ti a kona iai n namakina te kukurei ae bati riki ni kaineti ma te anganga.

KARAKAA RIKI

E kangai ana Kabwarabwara Iesu i aon te Maunga: “Ngkana e teboniko temanna ae tautaeka i aom bwa ko na iria teuana te kiromita, iria uoua te kiromita.” (Mataio 5:41) Ko na kangaa ni maiuakina te boto n reirei ae aanaki n taeka aikai n am mwakuri? N oneani mwin are ko na tii karaoa ae uarereke, kakaaei aanga ibukini karakaan riki am mwakuri i aon are tangiraki. Katei tiam, kakorakorako ni kanakoraoa ke ni kabaitiia riki am mwakuri nakon are e kariaaki. Ko na kakatonga e ngae naba ngkana e uarereke am mwakuri.

Ngkana ko karakaa riki am mwakuri, ko a karikirakea riki iai kukureim. Bukin tera? Ibukina bwa ko a boni kairiko iai. Ko anga ae bati riki ibukina bwa ko kani karaoia ao tiaki ibukina bwa e kairoroko temanna. (Biremon 14) N iaiangoan aei iroura, ti a kona iai n ururinga te boto n reirei ae n Taeka N Rabakau 12:24, (BG): “A na tau-taeka baiia akana tataningamarau: Ma a na tau-toronaki akana tataningaroti.” Ni koauana, a na toronaki tabeman mai buakora ke a kairoroaki bwa a na mwakuri korakora. Ma e ngae n anne, e bae n namakinna te aomata ae karaoi tii baika uarereke aika a kainnanoaki bwa e mena n taai nako i aan aia kairoro aomata riki tabeman. Ma te aomata are e karakaa riki, e nanonaki iai karaoan ae mwaiti riki ibukina bwa e motinnanoia bwa e na karaoia. E a namakinna iai bwa e boni kaira maiuna ao e teimatoa iai.

KATEIMATOA AM MWAKURI N TE ARO AE RIAI

E rangi ni manena te mwakuri korakora, ma e rangi n tamaroa bwa ti na ururingnga ae manena riki te maiu nakon te mwakuri. E kaungaira te Baibara bwa ti na tataningamarau. (Taeka N Rabakau 13:4) Ma e aki tuangira bwa ti na riki bwa te aomata ae e a mwamwakuri nako naba. E taekinaki n Te Minita 4:6, (BK) ni kangai: “E raoiroi riki te motirawa ae teutana nakon te makuri ae e korakora ae akea muina ba ti te ang.” Tera te reirei ae kakawaki iai? E aki kona ni kukurei n uaan ana mwakuri te aomata ae mwamwakuri nako naba ngkana e kamanenai ana tai ni kabane ao korakorana. Ibukin anne, ai akea bonganan ana mwakuri bwa “akea muina ba ti te ang.”

E buokira ni kaungaira te Baibara bwa ti na karikirakea te iango ae eti n ara mwakuri. E ngae ngke e taekinaki iai bwa ti riai ni kabanei nanora n ara mwakuri, ma e anganira taeka n reirei naba bwa ti na “koaua raoi bwa baikara bwaai aika kakawaki riki.” (Biribi 1:10) Baikara baika kakawaki riki? A irekereke iai kabanean ara tai ma ara utu ao raoraora. Ao aika a kakawaki riki boni bwaai n taamnei, n aron warekan Ana Taeka te Atua ao kananoan ara iango.

A bae ni kukurei riki n aia mwakuri naake a teimatoa ni kabaeranti maiuia. E taku William are e taekinaki mai mwaina: “Bon te banna ni katoto ae rangi n tamaroa temanna mai buakoia au tia kammwakuri rimoa bwa e kabaeranta ana mwakuri ao e onimakinaki. E mwakuri korakora, ao e nakoraoi reitakina ma naake e buokiia n ana mwakuri. Ma n tokin ana mwakuri n te bong anne, e a ataia bwa e riai ni mwaninga ana mwakuri ao ni kaatuua ana iango irouia ana utu ao ana taromauri. Ao ko ataia bwa tera? Bon te aomata ae moan te kukukurei mai buakoia aomata ake I kinaia.”