Te Riribai—Ko Rotaki Naba Iai?
Te riribai kaanga aron te mannaoraki. A rotakibuaka naake a ituaki iai, ao a kona naba n aki ataia naake iai irouia.
A kona aomata aikai n ribaia tiaki tii kaain abaia, aia reeti, aia baronga, ke te taetae teuana, ma a kona naba n ribaiia kaain te aro teuana, aika tiaki raoia n aine ke ni mwaane, ke aomata aika kaokoro aroia ma ngaiia. Tabeman a iangoia aomata n te aro ae aki raoiroi ni kaineti ma aia ririki, aia reirei, toabuakaia, ke taraakia. Ma irouia a bon aki riribai.
Ko kona naba n rotaki n te riribai? Angiina i buakora ti kai nora aroia tabemwaang n riribai. Ma e kangaanga bwa ti na noria ae iai iroura te riribai. Ni koauana, ti bane ni kona n riribai n aanga tabeua. Ngkana iai aika iangoa te koraki n aomata teuana n te aro ae aki riai, ao imwina a a manga kaitiboo ma temanna i buakoia, ao e taku te tia rabakau i aon aroia te botannaomata ae David Williams, “a na boni kaotiota te inanonano nakon te aomata anne ma a bon aki ataia ae a karaoa anne.”
N te katoto, n te aba ae Balkan ae maeka iai Jovica, ao iai te koraki n aomata iai ae e karako kaaina. E taku teuaei: “Irou akea ae raoiroi i buakoia te koraki aikai. Ma I aki iangoia ae I a riribai. Ao I tataku, ‘I aki riribai ma I bon tii taekina te bae koaua.’”
A bati tautaeka ake a katei tuua ni kaitaraa te kakaokoroaki n te reeti ao aeka n riribai nako. Ma e bon teimatoa naba te riribai. Bukin tera? Ibukina bwa tuua akanne a tii kaineti nakon te baere e karaoia te aomata. A aki kona n rota ana iango ma ana namakin te aomata. E ueke te riribai man ana iango te aomata ao mai nanona. E kona n toki te riribai? Iai angani katokana?
Ni kaongora aika imwina ao a na maroroakinaki iai nimaua booto n reirei, aika a buokaki iai aomata aika bati ni kabokorakora ma aia iango ao nanoia n riribai.