Te Riribai Bon te Kangaanga ae Taabangaki

E BON rotakibuaka Jonathan are kaaini Korea ma e bungiaki i Amerika n te riribai i marenaia reeti ngke e uarereke. Ngke e a ikawai, e a ukoukora te tabo teuana are a na aki motika iai taekana aomata ibukin tein ubuna ke ana reeti. E riki teuaei bwa te taokita n te kaawa ae bubura i Alaska meang n te U.S.A. ao titeboo teiteina ma angiia ana aoraki. Ana kantaninga teuaei bwa e a kitana raoi te tabo ae korakora iai te riribai tao ngkai e a mena n te Arctic Circle ae mwaitoro.

E uruaki ana kantaninga aei ngke e a bwainnaorakia temanna te aine ae 25 ana ririki. E bon tong te aine aei ibukini korakoran aorakina ao ngke e a uti, e taraa ubun Jonathan ao e kakanikoa ma ni kamaraiaa, ike e a otara iai ana riribai ae korakora ibukina bwa e reireiaki mangke e uarereke ribaakia kaaini Korea. Ni kaineti ma Jonathan n te bwai ae riki aei, e a kauringaki n te aro ae kammaraki bwa ana kakorakora ni kitana ana tabo ao menana i buakoia aomata n te tabo aei, e bon aki kainaomataaki iai man te riribai.

E katuruturuaki te bwai ae kananokawaki n te bwai ae riki nakon Jonathan. E a noraki ngkai te riribai ni kabutaa te aonnaba. E taraa n ae ngkana iai aomata n te tabo teuana ao are iai naba te riribai.

E ngae ngke angiia aomata a waekoa ni kabuakakaa te riribai ma e bon taabangaki naba bwainakina. E boni kaminonano te aro aei. A na kanga ni kona ni kaai n riki n tii te taina taabangakin te bwai teuana ao ribaakina? E teretere bwa a bati aika a kabuakakaa te riribai ake a kabwaka n namakinna bwa bon iai irouia. E kona naba n riki anne iroum? Ko na kanga ni kaekaa te titiraki anne?

ANA KANGAANGA TE AOMATA I BON IROUNA

Ngkana ti namakina anne ke ti aki, e na kangaanga ngkanne ataakin ae ti kaikoi aeka n riribai tabeua i nanora. E kabwarabwaraaki bukin rikin aei n te Baibara ni kangai: “Moan te mamamana riki te aba te nano nakoni bwai ni kabane.” (Ieremia 17:​9, Te Baibara) Ngaia are ti kona ni mwamwanaira ngkana ti kakoauaa ae ti butimwaei aroaroia aomata aika kakaokoro nako. Ke ti kona ni karekei aonara bwa iai bukina ae riai ngkai ti kaikoi ara iango aika bubuaka ibukia aomata mani kurubu tabeua.

Ibukini kabwarabwaraan te kangaanga n ataan ae tao ti kaikoa i nanora te riribai ae raba, iangoa te bwai ae kona n riki aei: Ko tabe n nakonako n tii ngkoe n te kawai n te tairiki ae rotongitong. A a mwananga naba ni kainetiko uoman mwaane aika rooro n rikirake aika ko tuai man nonoria. A taraa ni korakora ao e kaanga iai te bwai i bain are temanna.

N am iango a kakamaakuko rooro n rikirake akanne? Ni koauana, ko kona n ataia mani baike a riki ngkoa nakoim bwa ko riai n taratara raoi, ma te koaua bwa baike a riki ngkoa nakoim, e a kakoauaaki iai am iango ae ko na ruanikai irouia rooro n rikirake aika uoman aikai? E kangai te titiraki ae nano riki: Ko iangoiia mwaane aikai bwa kaain te reeti raa ao te aba raa? E kona ni kaotaki raoi nanom n am kaeka nakon te titiraki aei. E kona ni kaotaki iai bwa e a kaman rikirake te riribai i nanom n aanga tabeua.

Ngkana ti kakaonimaki ni kaota raoi ara namakin, ti riai ni kakoauaa ae iai iroura riribai aika kakaokoro korakoraia. E bon taekinaki naba n te Baibara te aeka n riribai ae taabangaki ni kangai: ‘A baireaki taekaia aomata man taraani mataia ke rietatan abwakia.’ (1 Tamuera 16:​7, Te Babaira) Kioina ngkai ti bane ni karawawataaki ni mamaaraia aomata aei ae rangi ni karuanikai mwina n angiin te tai, iai te kantaninga bwa ti kona n tokanikai ke ni katoka te riribai ni maiura? Ao iai te tai teuana ae ti kona n noria bwa e nang akea te riribai n te aonnaba ni kabutaa?