E Aera Ngkai Ti Rawawata, Ti Kara, ao Ti Mate?

E Riki Rawawatara Mairouia Ara Moani Karo

“Bwa aron rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate.”​—I-ROM 5:12.

E karikiia ara moani karo ae Atam ao Ewa te Atua ma aia iango ao rabwataia ae kororaoi. E angania naba mwengaia ae te bwaretaiti n te aonnaba, ae arana te onnaroka ae Eten. E tuangia bwa a kona n amwarake mani kaai nako n te onnaroka, ma a na aki amwarake man te kai teuana. Ma a rineia Atam ao Ewa bwa a na kana uaan te te kai anne, ao anne ngkanne ai te bure. (Karikani Bwaai 2:​15-17; 3:​1-19) Ibukina bwa a aki ongeaba iroun te Atua, e a aki kariaia bwa a na tiku n te onnaroka ao e a moanna ni kangaanga iai maiuia. Imwina riki, a a kariki, ao e a kangaanga naba maiuia natiia. A a bane n rikirake ni kara ao ni mate. (Karikani Bwaai 3:23; 5:5) Ti a aoraki, ti a kara, ao ti a mate ibukina bwa ti riki man te utu aei.

A Karawawataira naba Taamnei Aika Buakaka

“A bane kaain te aonnaba ni mena i aani mwaakan teuare buakaka.”​—1 IOANE 5:19.

“Teuare buakaka” are taekinaki bon Tatan. Bon te taamnei ae aki kona n noraki ae karitei nakon te Atua. (Ioane 8:44; Te Kaotioti 12:9) Imwina riki, a a manga raona Tatan taamnei riki ake tabeman. A aranaki bwa taimonio. A kabonganai mwaakaia taamnei aika buakaka aikai ni mwamwanaia aomata ao ni katannakoia mairoun te tia Karikiriki. A kairaraangia aomata aika bati bwa a na karaoi mwakuri aika bubuaka. (Taian Areru 106:​35-38; 1 Timoteo 4:1) A rangi ni kimwareirei Tatan ao taimonio ni karekean te maraki ao te rawawata.

N Tabetai Ti a Manga Boni Karekea Rawawatara

“Te baere e unikia te aomata, e na manga taia naba uaana.”​—I-KARATIA 6:7.

Ti bane ni karawawataaki n itera aika kakaokoro ibukin te bure are rikiara ao ibukin ana kariri Tatan ni kabutaa te aonnaba. Ma n tabetai a a manga boni karekea rawawataia aomata. N te aro raa? Ngkana a karaoi baika bubuaka ke ni karaoi motinnano aika nanobaba, a kona n taia mwina ae buakaka. N te itera are teuana, ngkana a karaoi baika raraoi aomata a kona n taia mwina ae raoiroi. N te katoto, te buu te mwaane ao te tama ae bwabwaina te koaua, e mwakuri korakora, ao e tangiriia ana utu, e na bon taia ae bati ibukini karaoani mwakuri aika raraoi, ao e na karekea te kukurei nakoia ana utu. Ma te aomata ae tatakaakaro n te mwane, e kokoro ni manging, ao e taningaroti, e na boni maiu ni kainnano. Ngaia are ti wanawana ngkana ti ongo iroun ara tia Karikiriki. E tangiria bwa ti na karekei bwaai aika raraoi aika bati n ikotaki ma “te rau ae bati.”​—Taian Areru 119:165.

Ti a Mena Ngkai “ni Kabaneani Boong”

“Ni kabaneani boong . . . , a nang riki aomata bwa taan tangiriia i bon irouia, taani bakimwane, . . . taan aki ongeaba irouia aia karo, . . . taan aki taubaang, taan iowawa, taan riribaa te raoiroi.”​—2 TIMOTEO 3:​1-5.

A bati aomata ni boong aikai aika maiuakini raoi baika a kaman taekinaki aikai. E oti n aroaroia bwa ti a mena ngkai ni kabaneani boong n te aonnaba aei. E a kaman taekinna naba te Baibara bwa a na kanikinaeaki ara tai aikai n taiani buaka, roongo, mwaeiein te aba aika korakora, ao ai aoraki. (Mataio 24:​3, 7, 8; Ruka 21:​10, 11) A karekea te rawawata ae korakora ao te mate baikai.