Te Wanawana ae Boni Kona n Reke Iroum
“E kairaki korean te Koroboki ae Tabu ni kabane iroun te Atua.” (2 Timoteo 3:16) N te kibu aei, e nanonaki n te taeka ae “kairaki” bwa e karini ana iango te Atua ae Moan te Mwaaka i nanoia taani korea te Baibara.
E Kaoko te Atua Bwa Ko Aonga ni Kakabwaiaaki Mani Wanawanana
“Bon Iehova ngai ae . . . reireiniko bwa ko aonga ni kabwaia, are Teuare kaiririko n te kawai ae ko riai n nakonako iai. Ko bia kaman irii nanon au tua! Ao e na riki raun nanom n ai aron te karaanga ao am raoiroi n ai aron naoni marawa.”—ITAIA 48:17, 18.
Iangoi taeka aikai bwa ana taeka ni kakao nakoim te Atua. E tangiriko bwa e na reke iroum te raunnano ao te kukurei ae teimatoa, ao e kona ni buokiko ni karekei.
E Kona n Reke Iroum Wanawanan te Atua
“E riai naba n tataekinaki moa te rongorongo ae raoiroi nakoia natannaomata ni kabane.”—MAREKO 13:10.
Te “rongorongo ae raoiroi” e nanonaki naba iai ana berita te Atua are e na katoka te rawawata, e na karika te aonnaba bwa te bwaretaiti, ao e na manga kamaiuia ara koraki aika tangiraki ake a a tia ni mate. A tataekina te rongorongo ae boto i aon te Baibara ni katobibia te aonnaba Ana Tia Kakoaua Iehova.