1 | Kamanoa Marurungin Rabwatam

BUKIN TERA BWA E KAKAWAKI?

E kona te aoraki ke te kabuanibwai ae karina n rota marurungia aomata n aanga aika kakaokoro.

• A rawawata aomata n rikini kangaanga aika kakaiaki, ao a rangi ni kai ituaki riki n te aoraki akana taonaki n te rawawata i nanon te tai ae maan.

• A aikoa kona n tararuaaki raoi aoraki n te onnaoraki ngkana a a bati aika rin n tii te taina, ao e kona naba n aki tau te bwainnaoraki ibukia.

• A rotakibuaka aia kataumwane tabeman imwini kabuanibwai aika karina, ao a aikoa kona ni kabooi baike a kainnanoi n aroni kanaia ao aia bwainnaoraki.

Tera ae Ko Riai n Ataia?

• A rotaki ara babaire ngkana ti taonaki n te aoraki ae kakaiaki ao te rawawatannano, n te aro are ti a aki tabe iai ma kateimatoaani marurungira. Ao ibukin anne, e a kona ni korakora riki iai aorakira.

• E kona ni kakaiaki riki aorakira ngkana ti aki tabeakinna, ao e kona naba n ruanikai iai maiura.

• Ngkana e korakora marurungim, ane ko na tauraoi riki ni karaoi babaire aika tamaroa n taai ake a rangi ni bati iai kangaanga.

• N aki ongeia bwa ko kaubwai ke ko maiu ni kainnano, ma ko boni kona naba ni karaoi bwaai tabeua ibukini kamanoani marurungim.

Tera te Bwai ae Ko Kona ni Karaoia Ngkai?

Te aomata ae wanawana, e iaiangoi raoi kangaanga aika kona n riki ao e karaoi baike e na kona ni kamanoaki iai. E kaineti naba aei ma marurungira. N angiin te tai ao ko kona n aki rotaki n te aoraki ke ni kakaiakina, ngkana ko kakaitiaka raoi rabwatam ao mwengam. E raoiroi riki totokoan te aoraki nakoni katokana.

“E karako te kabanemwane ni karekeani bwainnaoraki ao kawaran te taokita, ngkana ti bwabwaina te kakaitiaki nakon rabwatara ao ni mwengara.”—Andreas.a