Marurungin te Rabwata
Bon tiaki bokin te bwainnaoraki te Baibara. Ma e boni boutokaa naba te marurung. Iangoi tabeua ana boto n reirei te Baibara aika kona ni kanakoraoa riki marurungin rabwatam.
TARARUAA RABWATAM
ANA BOTO N REIREI TE BAIBARA: “Akea te mwaane ae ribaa oin rabwatana, ma e wantongaia ma n nabeia.”—I-Ebeto 5:29.
AE NANONAKI IAI: E kaungaira ana boto n reirei te Baibara aei bwa ti na kabanea ara konaa n tararuaa marurungin rabwatara. E oti n te kakaae teuana bwa a bati kangaangan te rabwata aika irekereke ma baika ti kakaraoi ni maiura. Ngaia are rineani baika raraoi e kairiri nakon te marurung.
TE BWAI AE KO KONA NI KARAOIA:
Te Amwarake. Tararuaa kanam n arom ni kang amwarake aika kamarurung ao n nima te ran ae tau mwaitina.
Bwaina te Kakammwakuri. Bwainan te kakammwakuri e kona ni kanakoraoa riki marurungim n aki ongeia bwa rorora ngkoe, e ngae naba ngkana ko mwauku ke e wenemaan aorakim. E ngae ngke a kona ni buokiko n am kamarurung raom aika tangiraki iroum ao taan ibuobuoki, ma bon tii ngkoe ae ko kona ni mwakuria!
Karekea Matum ae Tau. Ngkana e aki tau matum i nanon te tai ae maan e kona ni karekei aoraki aika kakaiaki. A bati aomata ake a aki tau matuia ibukini baika a kakaraoi ni katoabong. Ma ngkana ko kakarekea matum ae tau, ko a rinea iai te maiu ae nakoraoi riki.
RARAWA NAKON AROARO AIKA KAAORAKI
ANA BOTO N REIREI TE BAIBARA: “Ti na kaitiakira mani kamwaraan nako te rabwata ma te nano.”—2 I-Korinto 7:1.
AE NANONAKI IAI: Ti na marurung ngkana ti aki kabaarekai rabwatara ni baika kaaoraki, n aroni baika karaoaki man te baakee, ake a karika te aoraki ao te mate.
TE BWAI AE KO KONA NI KARAOIA: Rinea te bong are ko na katoka iai te aroaro ane kaaoraki anne, ao mwaakenna n am karenta. Imwain raoi te bong anne, karenakoi am tikareti, nnen te mannang, am tibwaake, ao bwaai riki tabeua ake a irekereke ma te aroaro ae kaaoraki aei. Kararoai aia tabo naake a kakaraoi aroaro aika ai aron aei. Kaongoia raoraom aika boutokaiko n am motinnano anne.
ANA BOTO N REIREI RIKI TABEUA TE BAIBARA
Ko kona ni karekea am Baibara ngkana ko reitaki ma temanna Ana Tia Kakoaua Iehova n am aono
TOTOKOI RIKINI KABUANIBWAI.
“Ngkana ko katea am auti ae boou, ko riai ni karaoa oon taubukina bwa ko aonga n aki karokoa te bure ni katuturaraa i aon am auti, ngkana e bwaka temanna mai iai.”—TE TUA-KAUA 22:8.
TAOTAONA UNIM.
“Ane e iremwe n un ao e rangi ni bati te ataibwai irouna, ma e kaotiota nanobabana ane e aki taotaona nanona.”—TAEKA N RABAKAU 14:29.
RARAWA NAKON TE BUABEKA.
“Tai mena . . . i buakoia te koraki aika buabeka.”—TAEKA N RABAKAU 23:20.