TE AONNABA AE RANGI NI BATI IAI TE KANGAANGA

3 | Kamanoa Am Reitaki n Iraorao

BUKIN TERA BWA E KAKAWAKI?

Ibukina bwa e a rikirake te raraoma n te aonnaba ae rangi ni bati iai te kangaanga, ao a a bati aomata aika a aikoa kateimatoai aia reitaki ma aomata.

A kaokoroia aomata mairouia raoraoia.
E a rikirake te ribuaka i marenaia taanga.
A aki bati n tabeakin raraomaia natiia kaaro.

Tera ae Ko Riai n Ataia?

E kakawaki te reitaki ma aomata bwa e kateimatoa marurungim ao riki n taai ni kangaanga.
E kona ni karikii kangaanga aika aki kantaningaaki n am utu, te rawawata ae riki mani kangaanga aika rangi ni bati n te aonnaba.
Ngkana a ongora ke ni mataku ataei n rongorongo aika kakamaaku n rongorongon aonnaba, a kona n rangi ni maaku.

Tera te Bwai ae Ko Kona ni Karaoia Ngkai?

Te Bae Taekinna te Baibara: “E kaotiota te tangira n taai nako te rao ni koaua, ao boni ngaia te tari ae bungiaki ibukin tain te rawawata.”—Taeka N Rabakau 17:17.

Iangoa te aomata temanna ae rangi n ibuobuoki ao n anganga te taeka n reirei ae manena. Ataakin te aomata anne, e kona ni kakorakorako bwa ko na nanomwaaka i aani kangaanga n te bong teuana ma teuana.

AROM NI KAMANOKO—Bwaai n Ibuobuoki

N taai aika rangi ni bati iai kangaanga, kamanoa am reitaki ma aomata n arom ni karaoi bwaai n ibuobuoki aika manena aikai

KATEIMATOA AM MARE

Kateimatoa am mare

Te Bae Taekinna te Baibara: “A raoiroi riki uoman nakon temanna . . . Bwa ngkana e bwaka temanna irouia, ao e kona are temanna ni buoka raona ni kateirakea.” (Te Minita 4:9, 10) A riai taanga ni mare ni katotonga te bwairati ao toana n aroia ni kaai ni mwakuri ngkana a kakibaa te wanikiba bwa a aki unun, ae nanona bwa a na kaai ni karaoi aia mwakuri taanga ao tiaki n ae a na kakauntaeka i marenaia.

Motinnanoia bwa kam na aki karaoa ae buakaka i marenami ngkana iai rawawatami. Bwaina te taotaonakinnano n taai nako.
Kataia ni mamaroroakin ami kangaanga ma buumi, tao te taina n te wiki. Kaatuua am iango i aoni katokan te kangaanga ma tiaki i aon te kauntaeka.
Karekea ami tai ni karaoi baika kam kaai ni kukurei iai.
Kauringi ami tai ake a kakukurei rimoa, tao kam kaai ni mataku n taamneimi ngke kam mare ke aromi riki rimoa aika kakukurei aika kam kani kakauringi.

“A kona n aki boraoi aia iango taanga i aoni bwaai ni kabane, ma tiaki nanon anne bwa a aikoa kona ni kaai ni mwakuri. A kona taanga ni kaai ni karaoi aia motinnano ao imwina a uaia n ira raoi nanona.”—David.

KATEIMATOA REITAKIM MA RAORAOM

Kateimatoa am reitaki ma raoraom

Irarikin are ko karerekea buokam mairouia raoraom, iangoi aanga tabeua ake ko kona iai n anga am ibuobuoki. Ngkana ko kakorakoraia tabemwaang, ko boni kakorakorako naba.
Reitaki ma raoraom tabeman ni katoabong n ongora irouia bwa a uara.
Titirakinia raoraom aroia n tokanikai i aon aia kangaanga aika titeboo ma ae ko rinanona ngkai.

“Ngkana ko aitara ma te kangaanga ae kaanga ai aron te angibuaka, bon taani buokiko raoraom. A kona n notuiko ni kaeta kawaim, e ngae naba ngkana a bon tii kauringko baika ko a kaman atai. A tabeakiniko raoraom, ao a ataia ae ko bon tabeakinia naba.”—Nicole.

RIIKI BWA TE KARO AE RANGI N IBUOBUOKI

Riiki bwa te karo ae rangi n ibuobuoki

Te Bae Taekinna te Baibara: “Waekoa n ongora, . . . iremwe n taetae.” (Iakobo 1:19) N te moantai ao a bae ni maaku natimi ni kaotii baika maakui ke tabeaiangaia, ma ngkana ko bwaina te kakauongo raoi, ko na boni buokiia iai bwa a na taekina aia namakin.

Kaotiota te aroaro ae a na tauraoi iai natimi ni kaotii aia namakin. Tabeman ataei a kai taetae riki ngkana a kukurei, n aron ae kam raraun n te kaa ke kam nakonako, nakon are kam tekateka n itaramata.
Taraia raoi bwa a na aki kabatiai aia tai natimi n ongongora ke ni mataku n rongorongo ke ribooti aika bubuaka.
Kariaia natimi bwa a na nori baika kam karaoi ibukini kamanoan ami utu.
Karaoi ami babaire ibukini kabuanibwai aika karina, ao kataneiai iai ma natimi.

“Maroro ma natimi ao kariaia bwa a na kaotii aia namakin. A kona ni karabaa maakuia, raraomaia, ke unia. Kaotia nakoia bwa ko a tia naba ni kabokorakora ma te aeka n namakin anne, ao tuangia aromi n tokanikai i aona.”—Bethany.