Tera ae E a Riki n te Karinerine Nakon te Utu?

BUKINA NGKAI E KAKAWAKI TE KARINERINE NAKON TE UTU

• E taekinaki n te boki ae The Seven Principles for Making Marriage Work bwa ngkana iai te ikarinerine i marenaia taanga, a a kaotiota iai tangiraia i marenaia “tiaki n tii n aanga aika bubura ma n aanga naba aika uarereke n te bong teuana ma teuana.”

• E noraki n te kakaae teuana bwa ataei ake a reireinia ni karineia tabemwaang, a na rangi ni kukurei riki, e na nakoraoi riki reitakia ma aia karo, ao e na kerikaaki aia kangaanga ni kaineti ma baike a namakini ao n iaiangoi.

TE BWAI AE KO KONA NI KARAOIA

Kaai ni karaoa ami babaire n ami utu. Te moan, taraia raoi bwa a na ota kaain te utu n ae nanonaki n “te karinerine.” Te kauoua, korei aroaro tabeua ake ko nori irouia am utu n tatabemania nako, n ikotaki naba ma anua ake a riai n aki bwabwainaki. Te katenua, maroroakina ami babaire n ami utu bwa kam a aonga n ataa aroni kaotan te karinerine.

Katea te katoto. Ko titiriburea aia mwakuri ae kairua kaain am utu, ni bwainingarea aia iango, ke n aki tabe irouia, ke ni baka n aki ongo ngkana a taetae nakoim?

Te anga n ibuobuoki: Kataia n taraa te karinerine bwa te bwai ae ko na anga nakoni buum ao natim, n aki ongeia bwa a tau ni karekea ke a aki.

Bwaina te karinerine ngkana ko aki boraoi n iango. Ngkana ko taekina arom, rarawa n taekini baika ko taetae ni katautau iai, n aron ae “ko aki toki n” ke “ko aki kona n.” Taeka aika aki raraoi aikai, a kona n un iai kaain am utu ao e kona te aki boraoi n iango ni baika uarereke n rikirake bwa te kangaanga ae bubura.

TE BWAI AE TI KARAOIA

A kaungaia aia utu kaain Ana Tia Kakoaua Iehova bwa a na ikarinerine i marenaia, ao e aki toki n taekinaki anne n taiani kaongora, booki, boroutia, ao taamnei ake ti karaoi, aika kona n anaaki ao a tauraoi n akea booia.

IBUKIA TAANGA NI MARE: Te kaongora ae rereitaki ae Buokan te Utu e kona ni buokiia buumwaane ao buuaine bwa . . .

• a na riki bwa taan ongora raoi

• a na katoka te aki ikaekaeka i marenaia

• a na katoka te kakauntaeka

(Taibina te atu ae “Buokan te Utu” n jw.org)

IBUKIA KAARO: Te kaongora ae rereitaki ae Buokan te Utu e kona ni buokiia kaaro ni kataneiaia natiia bwa . . .

• a na ongeaba

• a na ibuobuoki ni karaoan te mwakuri n te mwenga

• a na taekina “taiaoka” ao “ko rabwa”

(Taibina te atu ae “Kaikawaaia Ataei” ao “Kaikawaaia Rooro n Rikirake” n jw.org)

Nora naba te bukinibaa, ni “Questions Parents Ask,” n te boki ae Questions Young People Ask—Answers That Work, Volume 1. (Taibina te atu ae “Questions Parents Ask” n jw.org)

IBUKIA ROORO N RIKIRAKE: Iai n jw.org, i aan te atu ae Teens and Young Adults kaongora, taamnei, ao beeba n reirei tabeua, ake a na kona ni buokiia rooro n rikirake bwa . . .

• a na nakoraoi aroia ma aia karo ao tariia ma mwaaneia

• a na taetae ma te karinerine nakoia aia karo ibukin aia kaetieti

• a na karekea onimakinaia irouia aia karo

(Taibina te atu ae “Teens and Young Adults” n jw.org)

E aki kabooaki kabonganaan ara atureti n te intanete ae jw.org. Ko aki kainnanoa ae ko na bwakamwane iai, ko na ota, ko na kaainna ke ni karina naba rongorongom iai.