KARAKI 1

E Karikii Bwaai Te Atua

A BANE baika raraoi n roko mairoun te Atua. E karaoa taai bwa e aonga n anganira te oota n te ngaina, ao namwakaina ma itoi bwa a na anganira te oota teutana n te tairiki. Ao e karika te aonnaba te Atua ibukira bwa ti na maekanna.

Ma tiaki taai, namwakaina, itoi, ao te aonnaba ake a moani karikaki iroun te Atua. Ko ataia bwa antai ae moani karikaki? E moani karikiia aomata te Atua ae kaanga bon aekakina. Ti aki kona n noriia aomata aikai, n aron naba te Atua ae ti aki kona n noria. A aranaki aomata aikai n te Baibara, bwa anera. E karikiia anera te Atua bwa a na maeka ma ngaia i karawa.

Te moan anera are e karikia te Atua e rangi n rianako okorona. Bon Natin te Atua ae te karimoa, ao e uaia ni mwakuri ma Tamana. E buoka te Atua ni karikii bwaai ni kabane. E buoka te Atua ni karika taai, namwakaina, itoi, ao ara aonnaba.

Tera aron taraakin te aonnaba n te tai anne? N te moantai, akea ae kona ni maeka n te aonnaba. Taraan te aonnaba bon tii marawa ae raababa ni kabutaa te aba. Ma e tangiria te Atua bwa a na maeka aomata n te aonnaba, ngaia are e a moana katauraoana ibukira. Tera ae e karaoia?

Te moanibwai, e kainnanoa te oota te aonnaba. Mangaia are e karaoa te oota te Atua man taai bwa e na kaotaa te aonnaba. E karaoia n te aro bwa e na iai te bong ao te ngaina. Imwina, ao e a karietataa te aba te Atua i aon taari.

N te moantai ao bon akea bwain aon te aba. Kaanga aekakin ae n te taamnei ae ko noria aei. Akea te uee, ke te aroka, ke maan. Akea naba te ika i marawa. E na bati riki ana mwakuri te Atua ibukin karikan bwain te aonnaba bwa e aonga n rangi n taraaraoi, ao n tau ibukia aomata bwa a na maekanna.

Ieremia 10:12; I-Korote 1:​15-17, BK; Karikani Bwaai 1:​1-10.