KARAKI 9

E Kabaa Te Aake Noa

IAI buun Noa ao natina aika teniman mwaane. Araia bon Tem, Am ao Iabeta. Iai buuia naati aikai ni kabane. Mangaia are waniman kaain ana utu Noa.

Iai ngkai taben Noa ae okoro mairoun te Atua. E tuangnga bwa e na kabaa te aake ae takabubura. Moan te bubura te aake aei n aron buburan te kaibuke, ma taraana kaanga te bwaoki ae ananau. E taku te Atua, ‘Karaoia bwa e na boratentao, ao karaoi naba ruu i nanona.’ Ruu akanne bon ibukin Noa ma ana utu, maan, ao ai ruu ibukin nnen amwarake ake a na kainnanoi.

E tuanga naba Noa te Atua bwa e na bonota raoi te aake bwa e aonga n aki raran. E taku te Atua: ‘N na karokoa te ieka ae korakora ao N na urua te aonnaba ni kabutaa. A na bane ni mate ake a aki mena i nanon te aake.’

E ongeaba Noa ma natina iroun Iehova ao a a moana aia kateitei. Ma a ngare ni kakaniko aomata ake i rarikia. A boni kateimatoaa naba karaoan ae buakaka. Akea ae kakoauaa Noa ngke e tuangia te bwai are e na karaoia te Atua.

E maan te tai ibukin karaoan te aake ibukina bwa e rangi ni bubura. Ma imwin ririki aika bati ao e a tia. Ngkai e a tuanga Noa te Atua bwa e na uotiia maan nako nanon te aake. E taku te Atua bwa e riai n uotaki kakauoman maan, man aeka ni man tabeua, bwa te mwaane ao te aine. Ma ni kaineti ma aeka ni man riki tabeua ao e taku te Atua bwa a na uotaki kakaitiman. E tuangaki naba Noa iroun te Atua bwa e na karinia mannikiba n aekaia nako. E karaoi baike e tuangaki Noa iroun te Atua.

Imwina riki ao a a rin n te aake Noa ma ana utu. Imwina, e a kaina te mataroa te Atua. A kume n tataninga Noa ma ana utu i nanon te aake. Iangoia bwa aongkoa ko mena i buakoia i nanon te aake bwa ko tataninga naba. E na bon roko te ieka are e taku te Atua?

Karikani Bwaai 6:​9-22; 7:​1-9.