KARAKI 14

E Kataa Ana Onimaki Aberaam Te Atua

KO NORA te bwai ae e karaoia ikai Aberaam? Iai te biti irouna, ao e taraa n ae e nang tiringa natina. E aera ngkai e karaoa anne? Ti na noria moa bwa e kanga n reke natin Aberaam ao Tara.

Uringnga are e berita ngkoa te Atua bwa e na reke natia te mwaane. Ma e taraa ni kangaanga reken anne, bwa a a bon rangi ni kara Aberaam ao Nei Tara. Ma e boni kakoauaa Aberaam bwa te Atua e kona ni karaoa te bwai ae e taraa n aki kona ni karaoaki. Mangaia are tera ae e riki?

E a koro ngkai teuana te ririki imwin are e karaoa ana berita te Atua. Ngke e a koro 100 ana ririki Aberaam ao 90 ana ririki Nei Tara, ao e a riki natia ae Itaaka. E a tia ni kawakina raoi ana berita te Atua!

Ma ngke e a ikawai Itaaka, ao e a kataaki ana onimaki Aberaam iroun Iehova. E taku: ‘Aberaam!’ E tou Aberaam ni kangai: ‘Aio ngai!’ Imwina e taku te Atua: ‘Kaira natim ae Itaaka, ao nakon te maunga ae N na kaotia nakoim. Ko na kamatea iai natim bwa te karea.’

Ai kananokawaki ra taeka akanne nakon Aberaam bwa e bon rangi n tangira natina. Ao uringnga ngkoa bwa e a tia ni berita te Atua bwa a na maeka ana kariki Aberaam n te aba are Kanaan. Ma e na kanga ni koro bukin anne ngkai e nang manga mate Itaaka? E aki rangi n ota n te bwai ae riki Aberaam ma e bon teimatoa n ongeaba iroun te Atua.

Ngke e a roko n te maunga Aberaam, ao e kabaea Itaaka ao e katokaa i aon te baonikarea are e karaoia. Imwina e buuta te biti bwa e na tiringa natina. Ma n te tai are e nang tiringnga iai, ao e a wewete naba ana anera te Atua ni kangai: ‘Aberaam, Aberaam!’ Ao e kaeka ni kangai Aberaam: ‘Aio ngai!’

E taku te Atua: ‘Tai kammaraka te tei ke ni karaoa te bwai teuana nakoina. Ngkai I a ataia bwa ko bon onimakinai, ibukina bwa ko aki taua natim ae bon tii natim mairou.’

Ai korakora ra onimakinan te Atua iroun Aberaam! E kakoauaa bwa bon akea te bwai ae aki kokonaaki iroun Iehova, ao e kona naba ni kautaki Itaaka iroun Iehova man te mate. Ma bon tiaki ana kaantaninga te Atua bwa e na mate Itaaka. Mangaia are e a katauraoa te tiibu te Atua ae reke korona ni mwangan te kai, ao e tuanga Aberaam bwa e na kareanna n onea mwin natina.

Karikani Bwaai 21:​1-7; 22:​1-18.