Kaaniko Riki ma te Atua

Te Bwai ni Kakoaua ae te Kabanea ni Kakawaki Ibukin Tangirara Iroun te Atua Karikani

Bwaai 22:1-18

E TANGIRA te Atua Aberaam. E tangira naba Itaaka are bon natina ni kara te baatua ae kakaonimaki anne. Ma ngke tao ai 25 ana ririki Itaaka ao e a kaaitara Aberaam ma te kataaki are e a kauntaba ma ana namakin raoi te karo ibukin natina, ngke e a tuangaki iroun te Atua bwa e na kareana maiun natina. Ma e ngae n anne, e bon aki mate Itaaka n tokin te rongorongo. Bwa n te tai are e a tabeka iai ana biti Aberaam bwa e nang kareana iai maiun natina ao e a katokaki naba iroun te Atua rinanon te anera. N rongorongon te Baibara ae ni Karikani Bwaai 22:1-18, e a kaman taetae ni burabetinaki iai bannan tangirara ae korakora iroun te Atua.

E taekinaki ae kangai ni kibuna 1: “E kata Aberaam te Atua.” Bon te mwaane ae kakaonimaki Aberaam, ma ngkai e a kataaki ana onimaki n te aro ae tuai mani kakaraoaki ma imwaina. E taku te Atua: “Ko na kaira natim, ae am rikitemanna, ae ko tangiria, ae Itaaka, ao . . . kareanna iai ba te karea ni kabuokaki i aon te maunga teuana ae N na tuangko.” (Kibuna 2) Uringnga bwa e aki kariaia te Atua kataakia ana toro n te aro ae riaon aia kona. Mangaia are e kaotaki ni kataakin Aberaam aei bwa e onimakinaki iroun te Atua.​—1 I-Korinto 10:13.

E waekoa n ongeaba Aberaam. Ti wareka ae kangai: “E uti mwaka Aberaam n te ingabong, ao e kabaea te ne n tekateka i aon ana aati, ao e kairiia ana rorobuaka aika uoman ma ngaia, ma Itaaka are natina; ao e bwenabwenai aian te karea ni kabuokaki, ao e tei rake, ao e nako.” (Kibuna 3) N taraana, e aki tuanga temanna rongorongoni kataakina Aberaam.

E taorimwiaki aei ni mwanangana ae tenibong maanna, ike e a kona n reke ana tai ni kananoa raoi ana iango iai. Ma e bon aki roko n te kamamaaraki matoan nanon Aberaam. E kaotaki raoi ana onimaki man ana taeka ake e taekini bwa ngke e nora te maunga are e a tia n tuangaki mai kiraroa, ao e a tuangia ana toro ni kangai: “Kam na mena ikai . . . , ao ngai ma te tei ti na nako ikekei; ao ti na taromauri, ao ti a manga okiringkami.” Ngke e titiraki Itaaka bwa e nga te tiibu are e na kareanaki ao e kaekaa Aberaam ni kangai: “E na boni karekea te tiibutetei te Atua.” (Kibuna 5, 8) E kantaningaia Aberaam bwa e na boni manga oki ma natina. Bukin tera? Ibukina bwa “e taku i nanona ba E kona naba te kautia [Itaaka] mai buakoia maate te Atua.”​—Ebera 11:19.

Ngke e a anaa te “biti ba e na kamatea natina” Aberaam i aon te maunga ao e a tuka naba baina te anera. E a anganna ngkanne te Atua te tiibu mwaane, ae baerua i buakon taiani kai, are e a kona ni kareanna Aberaam ni “bonota mwin natina.” (Kibuna 10-13) Iroun te Atua, titeboo ma e a bon tia ni kareanaki Itaaka. (Ebera 11:17) E kabwarabwaraa te tia rabakau temanna i aon te Baibara bwa “E kakoauaaki i matan te Atua bwa nanon Aberaam ae tauraoi ni kareana natina titeboo iai ma e a bon tia ni kareana natina.”

E kakoauaaki bwa e bon eti onimakinan Aberaam iroun Iehova. Ao e reke kaniwangan Aberaam ngke e onimakina Iehova, bwa e okioki te Atua n taekina ana berita ma Aberaam ao ni karababaa riki, ae te berita ae e taekini kakabwaia nakoia botannaomata ni kabane.​—Kibuna 15-18.

N tokina, e totokoa Aberaam mani kareanakin natina te Atua, ma imwina riki ao E a boni kareana oin Natina. E kaikonakaki kukurein nanon Aberaam ni kareana Itaaka nakon aron te Atua ni kareana Natina ae ana rikitemanna ae Iesu ibukin ara bure. (Ioane 3:16) Te bwai ni kakoaua ae te kabanea ni kakawaki ibukin tangirara iroun Iehova boni kareanakini Kristo. Kioina ngkai e a tia te Atua n anga te aeka ni karea anne ibukira, ti a riai ngkanne n titirakinira ni kangai, ‘Baikara aaro n anga karea aika I kukurei ni karaoi ibukini kakukureian te Atua?’