KARAKI 18
E Nako Aran Iakoba
KO KINAIA mwaane ake e taetae nakoia Iakoba n te taamnei aei? Imwin mwanangan Iakoba i nanon boong aika bati, ao e a kaitiboo ma ngaiia i rarikin te mwanibwa. A bon tabe n tararuaa aia tiibu. E titirakinia Iakoba ni kangai: ‘Kaain iia ngkami?’
A kaeka ni kangai, ‘Aran.’
E manga titirakinia ni kangai Iakoba, ‘Kam kinaa Raban?’
A kaeka ni kangai, ‘Eng ao noria, natina te aine ane e nakomai anne ae Nei Rakera ma ana nanai n tiibu.’ Ko nora Rakera ane i kiraroa anne?
Ngke e noraki Rakera iroun Iakoba, ma ana nanai n tiibu ai tamana are Raban, ao e a nako naba ni karabinoa nako te atibu man te mwanibwa n te aro are a na kona ni mooi tiibu. Imwina e kaboria Iakoba ma Rakera ao e kaotia bwa antai ngaia. E rangi ni kukurei neiei, n te aro are e a nako n tuanga tamana are Raban.
E rangi ni kukurei naba Raban bwa e na tiku Iakoba irouna. Ao ngke e a tuatua Iakoba bwa e kani mare ma Rakera, ao e kukurei iai Raban. Ma e ngae n anne, e tuanga moa Iakoba bwa e na mwakuri n ana tawaana itua te ririki ibukin Rakera. Ibukina bwa e tangira Rakera Iakoba, e kukurei ni karaoa aei. Ma ngke e a roko tain te mare, ao ko ataa te bwai ae riki?
E a anga Raban natina are Rea bwa e na mare ma Iakoba, ao e aki anga Rakera. Ngke e a manga kukurei Iakoba ni mwakuri iroun Raban itua riki te ririki, ao e a manga anganaki Rakera bwa buuna. N taai akekei ao e kariaia te Atua bwa a na karekeia buuia mwaane ae raka i aon temanna. Ma ngkai, e taku te Baibara bwa e riai n tii temanna buun te mwaane.