KARAKI 19

A Mwaiti Natin Iakoba

TARAA te utu ae bubura aei. Bon natin Iakoba aika 12 mwaane. Ao iai naba natina aine. Ko atai araia naati aikai? Ti na nori araia tabeman.

E kariki Rea ao natina mwaane aika Reuben, Timeon, Rewi ao Iuta. Ngke e a noria Rakera bwa e a aki kakariki, ao e a rangi n nanokawaki. Mangaia are e a anga ana toro te aine ae Birea nakon Iakoba, ao e karikiia uoman mwaane Birea, bwa Tan ao Nabetari. Imwina e anga naba ana toro te aine Rea ae Tireba nakon Iakoba, ao e karikiia naba uoman mwaane Tireba, bwa Kata ao Atera. E a manga bungia uoman riki natina mwaane Rea, bwa Itakara ao Teburun.

N tokina ao e a kariki Rakera. E arana natina bwa Ioteba. Ti na manga rinanon riki taekan Ioteba aika bati, ibukina bwa e a riki rimwi bwa te aomata ae kakannato. Aikai bon natin Iakoba aika 11 mwaane ake a bungiaki, ngke e maeka Iakoba iroun taman Rakera are Raban.

Iai naba natin Iakoba aine, ma e tii kaotaki aran temanna n te Baibara. Aran neiei bon Rina.

E a roko te tai are e a iangoa iai te nako Iakoba ni kitana Raban, ao n oki nako Kanaan. Mangaia are e a ikotiia kaain ana utu are bubura arei, ao ana nanai n tiibu ao ni kao, ao e a moana te mwananga ae abwabwaki.

Tabeua te tai imwin rokon Iakoba ma ana utu i Kanaan, ao e a manga bungia naba natina Rakera. E riki aei n tain te mwananga ae abwabwaki. E rotaki buaka Rakera iai n te aro are e a mate imwin bungina. Ma e marurung natina ae te mwaane. E aranna Iakoba bwa Beniamina.

Ti riai n ururingi araia natin Iakoba mwaane aika 12 aikai, ibukina bwa a riki mairouia te natannaomata are I-Iteraera. Ni koauana, a aranaki barongan I-Iteraera ake 12, mairouia natin Iakoba mwaane aika 10, ao natin Ioteba ake uoman. E maiu Itaaka i nanon ririki aika bati imwin rikiia naati mwaane aikai, ao e bae n rangi ni kukurei ngkai a a rangi ni bati tibuna mwaane. Ma ti na nora ngkai te bwai ae e riki nakon tibuna te aine are Rina.

Karikani Bwaai 29:​32-35; 30:​1-26; 35:​16-19; 37:35.