KARAKI 21
A Riribaa Ioteba Tarina
NORA te teinimwaane ae nanokawaki ma ni bwara nanona aei. Bon Ioteba. A a tia ni kaboonakoa tarina nakoia mwaane aika a na nako Aikubita aikai. E na riki bwa te kaaunga ikekei Ioteba. E aera ngkai a karaoa te mwakuri ae buakaka aei tarina nako aikai? Ibukina bwa a bakantang iroun Ioteba.
E rangi ni korakora tangiran Ioteba iroun tamaia are Iakoba. E kaota naba ana inanonano nakoina ngke e karaoa ana kunnikai ae bati karana. Ngke a nora aron Iakoba n rangi n tangira Ioteba tarina aika 10 aika ikawai aikai, ao a a moanna ni bakantang ao n riribaa Ioteba. Ma iai riki bukin ribaakina irouia.
Iai miin Ioteba aika uoua. Ni miin Ioteba aika uoua aikai ao e miia bwa a bane ni bobaraki iai tarina aikai nakoina. Ngke e tuangia tarina Ioteba taekan miina, ao e a rikirake riki aia kairiribai.
N te tai teuana ngke a tabe tarin Ioteba n tararuaa ana nanai n tiibu tamaia, ao e kanakoaki Ioteba iroun Iakoba bwa e na noriia tarina bwa tera aroia. Ngke a nora tariia are Ioteba bwa e a roko ao a taku tabeman mai buakoia: ‘Ti na tiringnga!’ Ma e taku tariia are te karimoa are Reuben: ‘Ti aki riai ni karaoa anne!’ A aikoa tiringnga ma a taua Ioteba ao a kabwakaa i nanon te mwarua. Imwina ao a tekateka n iangoia bwa tera ae a na karaoia nakoina.
N te tai anne ao a rirarikiia raoi mwaane aika tibun Itimaera. E taku Iuta nakoia tarina aikai: ‘Ti na kaboonakoa nakoia tibun Itimaera akekei.’ Ao anne are a karaoia. A kaboonakoa Ioteba n te boo ae 20 te mwakoro n tirewa. Ai bangaaomata ra taari aikai!
Tera ngkanne ae a na tuanga tamaia taari aikai? A tiringa te kooti ao a kararaaea iai ana kunnikai Ioteba are rangi n tikiraoi arei. Imwina a uota rikaaki te kunnikai nakon mwengaia ao a taku nakon tamaia are Iakoba: ‘Ti kunea te kunnikai aei. Noria raoi bwa ai kan ana kunnikai Ioteba.’
Ngke e nora te kunnikai Iakoba, ao boni ngaia ao e a tii tang naba ni kangai: ‘E kanna te man ni kaakang.’ Anne te bwai ae a tangiria taari aikai bwa e na iangoia tamaia. E rotaki nanon Iakoba n te rawawata ae korakora. E tang i nanon boong aika bati. Ma e bon aki mate Ioteba. Ti na noria bwa tera ae riki nakoina n te tabo are e uotaki nako iai.