KARAKI 26

E Kakaonimaki Iobi

KO NANOANGAA te aomata ae aoraki aei ke ko aki? Arana bon Iobi, ao te aine anne boni buuna. Ko ataia bwa tera ae e tuanga Iobi? E kangai: ‘Taetaebuakaa te Atua bwa ko aonga ni mate.’ Ti na noria bwa e aera ngkai e taekina te aeka n taeka aei neiei, ao bukin tera ngkai e a rangi ni karawawataki Iobi.

Iobi bon te aomata ae kakaonimaki are e ongeaba iroun Iehova. E maeka n te aba ae Uti, ae uakaan ma Kanaan. E rangi n tatangiraki Iobi iroun Iehova, ma bon iai temanna ae e riribaia. Ko ataia bwa antai?

Bon Tatan te Riaboro. Uringnga are Tatan bon te anera ae buakaka ae e riribaa Iehova. E a tia ngkoa ni kona ni kairiia Atam ma Nei Ewa bwa a na aki ongeaba iroun Iehova, ao n ana iango e kona ni kairiia aomata ni kabane bwa a na aki naba ongeaba iroun Iehova. Ma e konaa? E aki. Iangoia mwaane ma aine ake a kakaonimaki, ake ti a tia n reiakin taekaia. Iraman ae ko atai araia?

Imwin maten Iakoba ao Ioteba i Aikubita, ao Iobi are e a manga riki bwa te aomata ae te kabanea ni kakaonimaki nakon Iehova n te aonnaba ni kabutaa. E kani kaotia Iehova nakon Tatan bwa e aki kona ni kabwakaia aomata ni kabane, mangaia are e taku: ‘Taraa Iobi. Nora aroni kakaonimakina irou.’

E kaeka Tatan ma te ngurengure ni kangai: ‘E kakaonimaki ibukina bwa ko kakabwaiaa, ao a bati ana bwai aika raraoi iai. Ma ngkana ko anai ana bwai ni kabane, ao e na taetaebuakaiko.’

Mangaia are e taku Iehova: ‘Karaoa ane ko taku. Anai ana bwai ni kabane. Karaoi baika bubuaka nakon Iobi ake ko kani karaoi. Ti na noria bwa e na taetaebuakai iai ke e aki. Ma uringnga bwa ko aki riai n tiringnga.’

Te moanibwai, e kairiia aomata Tatan bwa a na kimoaa ana kao ma ana kamero Iobi, ao a tiringaki ana tiibu. Imwina a a manga tiringaki natina ake 10 n te angibuaka. Imwina e a manga kaaorakaki Iobi iroun Tatan n te aoraki ae rangi ni kakaiaki. E a rangi ni karawawataki Iobi. Anne bukina are e kangai iai buun Iobi: ‘Taetaebuakaa te Atua bwa ko aonga ni mate.’ Ma e aki karaoa anne Iobi. A roko naba aomata aika teniman ake aongkoa raoraon Iobi, n tuangnga bwa e riki aei ibukin buakakan maiuna. Ma e bon teimatoa naba Iobi n rangi ni kakaonimaki.

E rangi ni kukurei Iehova iai, ao imwina e a kakabwaiaa Iobi, n aron ae ko kona n noria n te taamnei. E kamarurungnga man aorakina. E a manga reke riki natin Iobi 10 aika a rangi n titikiraoi, ao e a manga reke naba ana kao, ana tiibu ao ana kamero, ma e a bati riki nakon are mai mwaina bwa e a taboro mwaitiia.

Ngkoe naba ko na teimatoa ni kakaonimaki nakon Iehova n aron Iobi? Ngkana ko teimatoa ni kakaonimaki, ao e na kakabwaiako naba te Atua. Ko nang kona ni maiu n aki toki ngkana e a katikiraoaki te aonnaba aei ni kabutaa, n aekakin te oo-n-aroka are Eten.

Iobi 1:​1-22; 2:​1-13; 42:​10-17.