KARAKI 50

Aine Uoman Aika Ninikoria

NGKE a a reke n te kangaanga tibun Iteraera, ao a a tang nakon Iehova. E kaekaa aia tataro Iehova n arona ni karekeia aia tia kairiri aika a ninikoria bwa a na buokiia. E arania taani kairiri aikai te Baibara bwa taani moti. Iotua bon te moan aomata n riki bwa te tia moti, ao aikai araia tabeman ake a a manga tia moti imwina, Oteniera, Euta ao Tiamka. Ma iai naba aine uoman ake a buokiia Iteraera bwa Tebora ao Iaera.

Tebora bon te burabeti n aine. E anganganna Iehova rongorongo ibukin taai aika a na roko, ma ngaia are e tutuangia aomata te bwai are e taekinna Iehova. Nei Tebora bon te tia moti naba. E tetekateka i aan te aroka ae te baam n te aba ae katabuki, ao a kakawaria aomata ni karekea buokaia irouna n aia kangaanga.

N te tai aei ao uean Kanaan bon Iabin. Iai ana kaa ni buaka aika 900 mwaitiia. E rangi ni korakora ana taanga ni buaka, ngaia are a bati tibun Iteraera ake a kairoroaki bwa a na riki bwa ana toro Iabin. Mataniwin ana taanga ni buaka te Uea ae Iabin bon Titera.

N te bong teuana ao e kananako Nei Tebora bwa e na kawaekoaki te tia Moti are Baraka, ao e tuangnga ni kangai: ‘E taku Iehova: “Karekeia 10,000 mwaane ao kairiia nakon te Maunga are Tabora. Ikanne are N na anga Titera nako nanoni baim. Ao N na anganiko te tokanikai i aona ao i aoia ana koraki.” ’

E kaeka Baraka nakon Tebora ni kangai: ‘N na nako ngkana ko irai.’ E iraki Baraka iroun Tebora, ma e taku nakoina: ‘Ko na aki atongaki n te tokanikai aei, ibukina bwa Iehova e na anga Titera nako nanon bain te aine.’ Ao e boni koro bukin aei.

E ruo man te Maunga are Tabora Baraka bwa e na nako ni kaitiboo iai ma ana tautia Titera. E a karina naba ni karokoa te ieka Iehova, ao a bati tautia ake taiani kairiribai ake a bwabwa. Ma e reke birinakon Titera ngke e ruo man ana kaa ni buaka.

Rimwi riki ao e a roko Titera n ana umwa-n-rianna Iaera. E karinna neiei, ao e anganna te miriki. E a karekea te nimatutu nimana aei, n te aro are e a waekoa ni mwanionako ni matu. Imwina e anaa kain rooan te umwa-n-rianna Iaera ao e ewara iai boran te mwaane ae buakaka aei. Imwina riki ngke e a roko Baraka, ao e kaotaki nakoina are e a mate Titera iroun neiei! Mangaia are ko kona n noria bwa e boni koro bukin ana taeka Tebora.

N tokina ao e a tiringaki naba te Uea are Iabin, ao a a tiku n rau tibun Iteraera i nanon tabeua te tai.

Taani Motiki-taeka 2:​14-22; 4:​1-24; 5:​1-31.