KARAKI 51

Ruta Ao Naomi

N TE Baibara ao ko na kunea iai te boki ae Ruta. E karakinaki iai taekaia kaain te utu teuana, ake a maeka n te tai are iai aia tia moti iai kaain Iteraera. Ruta bon ateiainen te aba ae Moaba; tiaki ngaia kaain ana botannaomata te Atua are Iteraera. Ma ngke e a ataa taekan te Atua ni koaua ae Iehova, ao e a bon rangi n tangiria naba. Nei Naomi bon te unaine are e a tia ni buoka Ruta n reiakinna taekan Iehova.

Bon te I-Iteraera Naomi. Ma e mwaing ngkoa neiei ma buuna ao natiia uoman mwaane nakon te aba ae Moaba, n te tai are e a rangi ni karako iai reken te amwarake i aon Iteraera. N te bong teuana imwina riki ao e a mate buun Naomi. Imwina ao a a mare natin Naomi ma ainen Moaba aika Ruta ao Oreba. Ma imwin tao 10 te ririki, ao a a manga mate natin Naomi aika uoman mwaane aikai. Ai kananokawaki ra aei nakon Naomi ma ateiaine aikai! Tera ngkanne ae e nang karaoia Naomi?

N te bong teuana ao e a iangoia Naomi bwa e nang mwananga n te kawai ae abwabwaki n okiriia oin ana koraki. A kan tiku iroun Naomi, ateiaine aika Ruta ma Oreba ngaia are a a iria. Ma ngke a a boni maan teutana ni mwananga ao e a tanrikaki naba Naomi nakoia ni kangai: ‘Naako okiri mwengaia nako tinami.’

E kaboria Naomi ma ateiaine aikai ni kaboo ma ngaiia. Ikanne are a a moana iai tangia ibukina bwa a rangi n tangira Naomi. A taku: ‘Ti aki tiku! Ti na iriko nakoia am aomata.’ Ma e kaeka ni kangai Naomi: ‘Kam riai n oki natiu. Kam mwengaraoi riki ngkana kam tiku ni mwengami.’ Mangaia are e a okira mwengana Oreba. Ma e rawa n oki Ruta.

E tanrikaki nakoina Naomi ao e taku: ‘Are e a nako Oreba. Naako naba iria ngkoe.’ Ma e kaeka ni kangai Ruta: ‘Tai kataia ni kaokai bwa N na kitaniko! Kariaia bwa N na iriko. Ike ko nako iai, ao N na nako iai, ao ike ko maeka iai ao N na maeka iai. Am aomata au aomata, ao Atuam ai Atuau naba. Ike ko mate iai, ao N na mate naba iai, ao anne te tabo ae N na taunaki iai.’ Ngke e taekina aei Ruta, ao e a toki naba Naomi ni kataia ni kaokia nakon mwengana.

N tokina ao a a roko aine aika uoman aikai i Iteraera. A a tiku ni maeka iai. E a moana naba ngkekei ana karemrem Ruta n te tawaana, ibukina bwa ai tain ikoikotakin te bare. E kariaia te mwaane ae arana Boati bwa e na ikoikoti baare neiei n ana tawaana. Ko ataia bwa antai tinan Boati? Bon Nei Raaba are kaain te kaawa are Ieriko.

N te bong teuana ao e taku Boati nakon Ruta: ‘I a tia n ongo taekam, ma arom n akoa Naomi. I ataia bwa ko kariaia kitanan tamam ma tinam ao abam, ao n nakomai ni maeka i buakoia aomata aika ko aki kinaia mai mwaina. E bia kakabwaiako Iehova!’

E kaeka Ruta ni kangai: ‘Ao ngkoe naba ko akoi nakoiu. Ko a tia ni buokai ni karaua nanou n arom ni kakarabakau nakoiu.’ E rangi n tatangiraki Nei Ruta iroun Boati, ao e aki maan imwin anne ao a a mare naba. Ai kukurei ra Naomi iai! Ma e a kukurei riki Naomi ngke a a kariki Ruta ao Boati, ao a arana natia bwa Obeta. Imwina riki ao e a riki Obeta bwa tibun Tawita, are ti na ongoraeakina taekana rimwi riki.

Bokin te Baibara ae Ruta.