KARAKI 65

E A Bwenaua Te Tautaeka

KO ATAIA bwa bukin tera ngkai e raeuaa ana kunnikai teuaei nakon mwakorokoro aika bati? Bon Iehova ae e tuangnga bwa e na raeuaia. Teuaei bon Aiia ae ana burabeti te Atua. Ko ataia bwa tera te burabeti? Bon te aomata ae kaakaongoaki iroun te Atua, taekan baika a na riki imwain rikiia.

E taetae ikai Aiia nakon Ieroboam. Ieroboam bon te mataniwi are e kateia Toromon ni kaineti ma ana kateitei tabeua. Ngke e a kaitiboo Aiia ma Ieroboam i nanon te kawai n aron ae oti ikai, ao e a karaoa naba te mwakuri ae kamimi Aiia. E buuta ana kunnikai ae boou mai aona, ao e a raeuaia naba nakon 12 mwakorokorona. E taku nakon Ieroboam: ‘Anaa mwakorona ae 10 aei bwa am bwai.’ Ko ataia bwa bukin tera ngkai e anga Aiia 10 te mwakorokoro nakon Ieroboam?

E kabwarabwaraa Aiia bwa e nang anaa te tautaeka n uea mairoun Toromon Iehova. E taku bwa Iehova, e na angan Ieroboam baronga ake 10. Nanon aei bwa ai tii uabaronga ake a na tiku bwa e na tautaeka i aoia, natin Toromon are Reoboam.

Ngke e a ongo Toromon te bwai are e tuangaki Ieroboam iroun Aiia, ao e a rangi n un. E kataia n tiringa Ieroboam, ma e biri nako Aikubita Ieroboam. Imwin tabeua te tai ao e a mate Toromon. E uea i nanon 40 te ririki, ma ngkai e a onea mwina n uea natina are Reoboam. Ngke e a ongo Ieroboam i Aikubita are e a mate Toromon, ao e a oki rikaaki nako Iteraera.

Bon tiaki te uea ae raoiroi Reoboam. E korakora riki ana bangaaomata nakoia aomata, nakon ana bangaaomata tamana are Toromon. A kawara Reoboam are te Uea, Ieroboam ma mwaane tabeman aika kakannato, ni butiia bwa e na karaoiroa riki arona nakoia aomata. Ma e aki ongo Reoboam. Ai aron ae e a iowawa riki nakon are mai mwaina. Mangaia are e a kaueaki Ieroboam irouia kaain baronga ake 10, ma a bon taua Reoboam bwa aia uea baronga ake uoua ake kanoan Beniamin ao Iuta.

E aki tangiria Ieroboam bwa a na nako n taromauri ana aomata n ana tembora Iehova i Ierutarem. Mangaia are e a karaoi uoman kaao ataei man te koora, ao e a tuangia kaain te tautaeka n uea ni baronga aika tebwina bwa a na taromauriia. N te tai ae waekoa imwin anne, ao e a onrake te aba n te kakeru ao te iowawa.

Iai naba kangaanga n te tautaeka n uea ni baronga aika uoua. Ngke e tuai ni koro nimaua ana ririki Reoboam n uea, ao e a roko naba uean Aikubita ni buakana Ierutarem. E anai naba kaubwai aika bati man ana tembora Iehova. Mangaia are, e aki maan imwin tian te tembora ao e a bua naba tikiraoina.

1 Uea 11:​26-43; 12:​1-33; 14:​21-31.