KARAKI 67
E Onimakina Iehova Ieotiabata
KO KINAIA mwaane aikai ao ko ataa te bwai ae a karaoia? A a mwananga bwa a na buaka, ao mwaane akana i moa, a anene. Ma tao ko na titiraki ni kangai: ‘E aera ngkai a aki ua-kabaang ma kainiwai taan anene bwa aia bwai ni buaka?’ Ti na noria.
Ieotiabata bon te uea n te tautaeka n uea ni baronga aika uoua, i aon Iteraera. E maiu n te tai are e uea iai Aaba ao Ietebera, n te tautaeka n uea ni baronga aika tebwina mai meang. Ma Ieotiabata bon te uea ae raoiroi ao tamana are Ata bon te uea ae raoiroi naba. Mangaia are a nora aron te maiu ae kakukurei, aomata ake a mena i aan te tautaeka n uea ni baronga aika uoua mai maiaki.
Ma iai ngkai te bwai ae riki are e a kakamaakuia aomata. A ribooti taan uarongorongo nakon Ieotiabata ni kangai: ‘Iai te taanga ni buaka ae mwaiti kurikuri kaaina man aaba aika Moaba, Ammon ao man te Maunga are Teira, aika a na buakaniko.’ A bati tibun Iteraera ake a ikotaki i Ierutarem bwa a na ukoukora ana ibuobuoki Iehova. A nakon te tembora ao e tataro iai Ieotiabata ni kangai: ‘Atuara ae Iehova, ti aki ataa te bwai ae ti na karaoia. A karako korakorara ni kaitaraa te taanga ni buaka ae mwaiti kurikuri kaaina aei. Ti butiiko bwa ko na buokira iai.’
E ongo Iehova, ao e kabongana temanna ana toro bwa e na tuangia aomata ni kangai: ‘Tiaki ami bwai te boo ni buaka, bwa bon ana bwai te Atua. Kam aki riai ni buaka. Ma kam na tii mataku n nora aron Iehova ni kamaiungkami.’
Mangaia are n te ingabong are imwina ao e a tuangia aomata Ieotiabata ni kangai: ‘Onimakina Iehova!’ Imwina ao e kamenaia taan anene i moaia tautia, ao a a tabe n anene n neboa Iehova i nanon aia tai ni mwaati rake. Ko ataa te bwai ae riki ngke a a kan roko n te tabo are a na boo ni buaka iai? E a karaoiia tautia ake taiani kairiribai Iehova, bwa a na manga boni buaka i marenaia. Ao ngke a a roko tibun Iteraera, a a bane tautia n inroa ni mate!
E aki ngkanne wanawana Ieotiabata ngkai e onimakina Iehova? Ti wanawana naba ngaira ngkana ti onimakinna.
1 Uea 22:41-53; 2 Rongorongo 20:1-30.