Tooro Iroun Iehova ma te Nano ae Tabwanin Raoi!

1-3. Tera ae nanonaki n te toro iroun Iehova ma “te nano ae tabwanin raoi”? Kabwarabwaraa.

IBUKINA bwa ti aki kororaoi, ti kai karaoi kairua. Ma ti kakaitau ngkai Iehova e aki karaoa nakoira ae e “kaineti ma ara bure” ngkana ti nanorinano, ti rairi nanora, ao ni bubutiia kabwaraan ara bure ae boto man ana karea ni kaboomwi Iesu. (TaiAre. 103:10) Ma n aron are e taekinna Tawita nakon Toromon, ngkana e na butimwaeaki iroun Iehova ara taromauri ni katoabong, ti riai n “[toro] irouna ma te nano ae tabwanin raoi.” (1Rong. 28:9) Ti na kangaa ni karaoa anne e ngae ngkai ti aki kororaoi?

² Ibukini buokara n aei, ti kona ni kabotaua maiun te Uea are Ata ma te Uea are Amatia. A karaoa ae raoiroi i matan Iehova uean Iuta aikai, ma e tabwanin raoi nanon Ata iai. (2Rong. 15:16, 17; 25:1, 2; TaeRab. 17:3) A aki kororaoi ueea aikai ao a kakaraoi naba kairua. Ma e ngae n anne, e aki kitani kawain Iehova Ata ibukina bwa e ‘tabwanin raoi tangiran’ te Atua irouna. (1Rong. 28:9, kabwarabwara mai nano) Ma e aki tabwanin raoi nanon Amatia nakon Iehova. Imwin tokanikaina i aoia taani kairiribai nakon te Atua, e uotii teuaei atuaia ao e taromaurii.​—2Rong. 25:11-16.

³ E irekereke te toro iroun te Atua ma “te nano ae tabwanin raoi” ao taromaurian Iehova n aki toki. N te Baibara ao te taeka ae “te nano,” e nanonaki n angiin te tai bwa te bwai ae mena i nanora. E irekereke ma baika ti tangiri, ara iango, anuara, kateira, ara konabwai, bukini karaoani bwaai iroura, ao tiara. Ngaia are te aomata ae toro iroun Iehova ma nanona ni kabane, e aki karaoia ni mwamwanaa te aba. E taromauria Iehova ma nanona ni koaua. Ma tera arora? E ngae ngke ti aki kororaoi ma ngkana ti teimatoa n taromauria te Atua ma nanora ae aki mwamwanaa te aba, ti a toro iai irouna ma nanora ae tabwanin raoi.​—2Rong. 19:9.

4. Tera ae ti na maroroakinna ngkai?

⁴ Ibukini kaotaakira n te bae e nanonaki n te toro iroun te Atua ma te nano ae tabwanin raoi, ti na maroroakina maiun Ata ao uean naba Iuta ake tabeman ake a toro iroun te Atua ma nanoia ni kabane n aron Ieotiabata, Etekia, ao Iotia. A bane ni kakaraoi kairua ueea aikai, ma a bon akoaki naba iroun Iehova. E aera bwa e iangoiia te Atua bwa a toro irouna ma nanoia ae tabwanin raoi, ao ti na kangaa ni katotongia?

E “TABWANIN RAOI NANON ATA NAKON IEHOVA”

5. Tera are e karaoia Ata ngke e a kaueaaki?

⁵ Bon te kateniman n uea i Iuta Ata imwini bwenauaakin te natannaomata ae Iteraera nakon te tautaeka n uea ae Iteraera ao te tautaeka n uea ae Iuta. E kanakoi bouannanti ni kabane ngke e a kaueaaki ao e kamwaawaia man te aba mwaanen te tembora aika kakabooaki ibukin te wene ni bure. E kabwakaa naba Maaka are tibuna man nakoana n “ueannaine, ibukina bwa e karaoa neiei ana bouannanti ae kammaira.” (1Uea 15:11-13) E tuangia naba ana aomata bwa “a na ukoukora Iehova . . . ao a na kakairi n te Tua ma te kaetieti.” Eng, e boutokaa te taromauri ae koaua.​—2Rong. 14:4.

6. Tera aron Ata ngke a ninia Iuta I-Itiobia?

⁶ E kakabwaiaa Iuta Iehova ni kateimatoa te rau iai n ana moan ririki n uea Ata ake tebwina. Imwina, e a roko Teera ae te I-Itiobia ma mwaane aika 1,000,000 ao kaa ni buaka aika 300 ni buakana Iuta. (2Rong. 14:1, 6, 9, 10) Tera are e karaoia Ata? E kaota onimakinan raoi Iehova. (Wareka 2 Rongorongo 14:11.) Ni kaekaan ana tataro Ata ma nanona ni koaua iroun te Atua, e a anganaki te tokanikai, ike e a kamaunaia iai ana taanga ni buaka Itiobia. (2Rong. 14:12, 13) E ngae ngke a aki kakaonimaki uean Iteraera nakon Iehova, ma e kona n angania naba te tokanikai i aoia aia kairiribai, ibukin arana. (1Uea 20:13, 26-30) Ma e onimakina raoi te Atua Ata, ao e kaekaaki ana tataro. Ma imwina riki, e a aki bwaina te wanawana Ata. N te katoto, e ukera buokana mairoun uean Turia ao ai tiaki Iehova. (1Uea 15:16-22) Ma e noria te Atua bwa e “tabwanin raoi nanon Ata [nakoina] ni kabane maiuna.” Ti na kangaa ni kakairi n ana katoto ae raoiroi Ata?​—1Uea 15:14.

7, 8. Ko na kangaa ni katotonga Ata?

⁷ Ti bane ni kona n tuoi raoi nanora n noria bwa e tabwanin raoi nakon te Atua ke e aki. Titirakiniko ni kangai, ‘I motinnanoia bwa N na kakukureia Iehova, N na tei ibukin te taromauri ae koaua, ao ni kateimatoa itiakin te ekaretia?’ Iangoa te ninikoria are e kainnanoia Ata bwa e aonga ni kabwakaa Maaka are te “ueannaine” n te aba anne! Tao akea temanna ae karaoi mwakuri n aron neienne, ma e kona n iai taai ake ko kainnanoa iai te ninikoria n aron Ata. N te katoto, tera arom ngkana iai ana bure kaain am utu temanna ke raoraom ni kaan ao e aki raira nanona ike e a riai ni kabaneaki man te ekaretia? Ko na motinnanoia bwa ko na katoka am iraorao ma ngaia? E na kairiko nanom nakoni karaoan tera?

⁸ N aron Ata, ko kona ni kaotia bwa e tabwanin raoi nanom ngkana ko onimakina raoi te Atua ni kaitaraam, e ngae naba ngkana totoko aika taraa n riaon am konaa. Tao ko bwainingareaki ke ni kakanikoaki n am tabo n reirei ngke ko kaotiko ae ngkoe temanna Ana Tia Kakoaua Iehova. Ke a kakanikoko raom ni mwakuri ngke ko motirawa tabebong ibukin te runga, ke ko aki mwamwakuri imwin te tai ibukin rakani boom. Ngkana e riki aei, onimakina te Atua n aron are e karaoia Ata. Tataro nakon Iehova, ninikoria, ao teimatoa ni karaoa ae ko ataia bwa e eti ao n riai. Uringnga are e kakorakoraa ao ni buoka Ata te Atua ao E na boni kakorakorako naba.

9. Ti na kangaa ni kaotia bwa e tabwanin raoi nanora ngkana ti uarongorongo?

⁹ A aki tii iaiangoiia i bon irouia ana toro te Atua ma a buokiia naba tabemwaang. E boutokaa te taromauri ae koaua Ata. Ti kona naba ni buokiia tabemwaang bwa “a na ukoukora Iehova.” Ai kukureira Iehova n norira n taekina taekana nakoia kaain rarikira ao tabemwaang, ao ni karaoia ibukin tangirana ni koaua, ao tabeakinaia raoi aomata ibukin aroia nakon taai aika a na roko!

E UKOUKORA IEHOVA IEOTIABATA

10, 11. Ko na kangaa ni kakairi n aron Ieotiabata?

¹⁰ “E teimatoa n nakonako ni kawain tamana are Ata” Ieotiabata. (2Rong. 20:31, 32) N te aro raa? E katotonga tamana Ieotiabata ni kaungaia aomata bwa a na ukoukora Iehova. E karaoa aei rinanoni bairean te mwakuri n angareirei ae okoro ni “bokin ana Tua Iehova.” (2Rong. 17:7-10) E kawari naba aonon te tautaeka n uea ni baronga aika tebwina mai meang, ae arana Iteraera, ao aonon Eberaim ae maungaunga, bwa e na “kaokiia nakon Iehova.” (2Rong. 19:4) Ieotiabata bon te uea ae “ukoukora Iehova ma nanona ni kabane.”​—2Rong. 22:9.

¹¹ Ti kona ni bane n uataboa te mwakuri n angareirei ae kabutaa te aonnaba, ae e tangiria Iehova bwa e na karaoaki ni boong aikai. Ko kateia bwa tiam ni katoa namwakaina reiakinaia aomata Ana Taeka te Atua, ao kaungaan nanoia bwa a na toro iroun te Atua? Ngkana ko kakorakorako ni karaoia n ikotaki ma ana kakabwaia te Atua, ko a kona iai ni moana te reirei n te Baibara ma temanna. Anne tiam ae ko tatataroia? Ko kukurei ni butimwaea te tibwanga aei n aki ongea kamanenaan oin am tai i bon ibukim? Ao n aron Ieotiabata are kawari aonon Eberaim ni buokiia aomata bwa a na okira te taromauri ae koaua, ti kona naba ni kakorakoraira ni kawariia naake a a maan n aki kaokaoti ni kaungaia. A karaoa naba aia babaire unimwaane n te ekaretia bwa a na kawariia ao ni buokiia naake a kabaneaki ake tao a a tia ni kitan aroia aika bure.

12, 13. (a) Tera aron Ieotiabata ngke e namakina te maaku? (b) E aera bwa ti riai ni kakairi iroun Ieotiabata ni kaotii naba mamaarara?

¹² N aron tamana are Ata, e teimatoa naba Ieotiabata n onimakina te Atua ngke e roko buakanakina n te taanga ni buaka ae bubura. (Wareka 2 Rongorongo 20:2-4.) E boni maaku Ieotiabata! Ma “e a kamatoaa nanona bwa e na ukoukora Iehova.” E tataro ao e kananorinanoa ni kaotia ae “akea [korakoraia] i mataia aomata aika uanao” aikai, ao e aki ataa te bwai ae e na karaoia ma ana aomata. E onimakina raoi Iehova ao e taku: “A kainetiko matara.”​—2Rong. 20:12.

¹³ N tabetai, titeboo ngaira ma Ieotiabata ae ti aki ataa te bae ti na karaoia ngkana ti maaku. (2Kor. 4:8, 9) Ma uringnga are e kaota mamaarana ma ana aomata Ieotiabata n ana tataro i mataia aomata. (2Rong. 20:5) A kona atun utu ni kakairi iroun Ieotiabata n aroia n okira Iehova ibukin ana kairiri ao kakorakoraaia, bwa a aonga n tokanikai i aon aia kangaanga. Tai maamaa ao kariaia bwa a na ongo kaain am utu am bubutii aika aron aikai. Ane a na ataia ae ko onimakina raoi Iehova. E a tia ni buoka Ieotiabata te Atua ao e na boni buokiko naba.

E TEIMATOA NI KARAOA AE ETI ETEKIA

14, 15. E kangaa Etekia ni kaota onimakinan raoi te Atua?

¹⁴ Etekia bon te uea naba temanna ae “e nimta raoi Iehova.” E kaokoro ma tamana Etekia bwa e karaoa ae raoiroi, e ngae naba ngke e katea te katoto ae buakaka ao n taromaurii bouannanti tamana. E “kanakoi taabo aika rietata, e kamaeinikuni boua aika tabu, ao e korea te kai ae tabu ni kabwakaa. E kamantinta naba te naeta are te buraati are e karaoia ngkoa Mote,” kioina ngke a a manga taromauria. E tabwanin raoi nanona nakon Iehova bwa “e teimatoa ni kawakin tuua ake e anga Iehova nakoni Mote.”​—2Uea 18:1-6.

¹⁵ E ngae ngke e ninia Iuta Aturia ae te tautaeka ae mwaaka riki n te aonnaba n taai akanne, ao e kakamaakuia bwa e na kamauna Ierutarem, ma e bon onimakina Iehova Etekia ma nanona ni kabane. E kakanikoa Iehova Uean Aturia are Tennakeriba ao e kakamaaka Etekia bwa e na taenikai. Ma e tataro Etekia ni kaota raoi onimakinani mwaakan Iehova ni kakamaiu. (Wareka Itaia 37:15-20.) E kaekaa ana tataro te Atua ngke e kanakoa te anera temanna bwa e na kamateia I-Aturia aika 185,000.​—Ita. 37:36, 37.

16, 17. Ko na kangaa ni kakairi iroun Etekia ngkai ko toro iroun te Atua?

¹⁶ Imwina riki, e a aoraki Etekia ao e a kuri ni mate. E bubutiia Iehova bwa e na uringa arona n nakonako i matana. (Wareka 2 Uea 20:1-3.) Ti ataia man te Baibara bwa ti a aikoa ngkai kantaningaa katokan arorakira ke kaananauan riki maiura n te kakai. Ma n aron are e karaoia Etekia, ti bane ni kona n taekina aei n ara tataro nakon Iehova: “I a tia n nakonako i matam ma te kakaonimaki ao nanou ae tabwanin raoi.” Ko kakoauaa ae e na tabeakiniko Iehova n taai nako, ao ni kakorakorako naba i aon am kainiwene n aoraki?​—TaiAre. 41:3.

¹⁷ Ngkana ti iaiangoa ana katoto Etekia, ti kona n nora riaira ni kanakoa te bwai ae tuka ara iraorao ma te Atua ke ae e katikiiranako man te taromauri ae koaua. E teretere bwa ti aki kani kakairi irouia kaain te aonnaba ake e a riao babaeakinaia aomata tabeman irouia n te intanete. Ni koauana, a bae ni kukurei Kristian tabeman n reitaki n te intanete ma kaain aia utu ke raoraoia ni kaan. Ma a bati n te aonnaba ake a kamanena anne n te aro ae riao, n aroia n itoman ma mwaane ke aine ake a aki kinaia. Ke a kabanea aia tai ae bati ni mamataku n taamneia aomata akanne ke ni wareki rongorongoia. Iai te kangaanga ni kabanebuakaan ara tai n te bwai ae akea bonganana aei. E kona n rangi ni kamoamoa te Kristian ngkana a bati aika a tatangiri ana taamnei ke ana rongorongo, ao e kona naba n un ngkana a a manga aki tangiri. Ti kona n iangoa te abotoro Bauro ke Akura ma Beritikira bwa a kabanei aia tai aika bati ni katoabong ni kanakoi aia taamnei ke n itoman ma temanna ae tiaki ana toro Iehova? Ti wareka taekani Bauro n te Baibara bwa e “kakorakoraa riki n tataekina te rongorongo.” Ao Beritikira ma Akura a kamanenai aia tai ni kabwarabwaraa “kawain te Atua, ni kaetia riki” nakoia tabemwaang. (Mwa. 18:4, 5, 26) Ti kona n titirakinira ni kangai: ‘I taraia raoi bwa e na aki riao babaeakinaia tabemwaang irou, ao I rarawa ni kabanea au tai ae bati ni baika akea manenaia?’​—Wareka I-Ebeto 5:15, 16.

E KAWAKIN ANA TUA IEHOVA IOTIA

18, 19. Ko na kangaa ni katotonga Iotia?

¹⁸ E kawakin naba ana tua Iehova “ma nanona ni kabane,” te Uea ae Iotia, are tibutorun Etekia. (2Rong. 34:31) Ngke tebwi tabun ana ririki, “e a moana ukoukoran Atuan Tawita,” ao ngke e a koro 20 ana ririki, e a kaitiaka Iuta ni kaaki bouannanti mai iai. (Wareka 2 Rongorongo 34:1-3.) E rangi n ingainga riki Iotia ni karaoa ae e kukurei iai te Atua nakoia uean Iuta aika bati. Ma ngke e kuneaki bokin te Tua Rinanoni Mote ao ni warekaki nakon Iotia, e a ataia ae e riai ni karaoa ae bati riki ibukini karaoan nanon te Atua. E kaumakiia aomata bwa a na toro iroun Iehova. Ibukin anne, a “aki roko n te rairakinako [aomata] man irirakin Iehova” n ana tai ni maiu Iotia.​—2Rong. 34:27, 33.

¹⁹ N aron Iotia, a riai rooro n rikirake ni moana ukoukoran Iehova man aia bongi n ataei. E boni bae n reireinaki Iotia iroun te Uea ae Manate are tibuna, ae e tauraoi ni kabwarai buure Iehova. Rooro n rikirake, kaaningkami ma aika ikawai riki ake a kakaonimaki n ami utu ao n te ekaretia, ao reiakini baika raraoi ake e karaoi Iehova nakoia. Uringnga naba bwa e ringaki nanon Iotia ni warekan te Koroboki ae Tabu ao e a kairaki iai bwa e na bita maiuna. Ko kona ni kairaki ni warekan Ana Taeka te Atua bwa ko na karaoi bitaki ake a na karikirakea kukureim, a na kakorakoraa am iraorao ma te Atua, ao ni kaungako bwa ko na buokiia tabemwaang bwa a na ukoukora te Atua. (Wareka 2 Rongorongo 34:18, 19.) Ko bae naba ni buokaki n am ukeuke n reirei n te Baibara bwa ko na atai aanga ake a na kanakoraoa am beku iroun te Atua. Ngkana ngaia anne, karaoa am kabanea ni konaa iai n aron are e karaoia Iotia.

TOORO IROUN IEHOVA MA TE NANO AE TABWANIN RAOI!

20, 21. (a) Tera ae a boraoi iai ueea aika aman ake ti maroroakinia? (b) Tera ae ti na rinanona n te kaongora ae imwina?

²⁰ Tera kakabwaiaara n rinanoakin aroia uean Iuta aika aman ake a toro iroun Iehova ma nanoia ae tabwanin raoi? A ingainga ni kakaraoa nanon te Atua ao n taromauria ma nanoia ae tabwanin raoi. A teimatoa ni karaoa nanon te Atua. A boni karaoa naba anne n aki ongei kaitaraakia irouia taani kairiribai aika korakora. Ma ae moan te kakawaki, a toro iroun Iehova ibukin tangirana.

²¹ N aron ae ti na noria n te kaongora ae imwina, a bane ni karaoi kairua ueea aika aman ake ti maroroakin taekaia. Ma e ngae n anne, ngke e neneri nanoia te tia Tuoi naano, e noria bwa a tabwanin raoi nanoia nakoina. Ti aki kororaoi naba ngaira. Ma ngkana e neneri nanora Iehova, e na iangoira bwa ti toro irouna ma nanora ae tabwanin raoi? Ti na maroroakina aei n te kaongora ae imwina.