Aron Iehova ni Kaanira

1. Tera ae a kainnanoia aomata, ao antai ae kona ni kakororaoa kainnanoia anne?

E KORAKORA irouia aomata namakinani kainnanoan ae a riai ni kaania ma aomata riki tabeman. A taekinaki aomata bwa a “kaan i marenaia ngkana e rangi ni korakora aia itangitangiri ao n rangi ni kinaia.” Ti kukurei n ara iraorao ma ara utu ao raoraora ake a tangirira, ti kakawaki irouia ao a ota n te bwai ae ti tangiria. Ma e ngae n anne, te Aomata are ti kani karikirakea ara iraorao ae te kabanea ni kaan ma ngaia, bon ara tia Karikiriki ae Kakannato.—Te Minita 12:1.

2. Tera are e beritanna Iehova nakoira, ao bukin tera bwa a bati aika a aki kakoauaa te berita anne?

² E kaumakira Iehova n ana Taeka bwa ti na “kaania,” ao e berita nakoira bwa ngkana ti karaoa anne, ‘e na kaanira’ naba. (Iakobo 4:8) Ai boni kaungananora te iango anne! Ma e ngae n anne, a bati aomata aika a iangoia bwa a aki riai ni kakoauaa ae e kani kaanira te Atua, ike a a namakinna iai bwa a aki tau ni kawaria ke e rangi n raroa nako mairouia. E koaua bwa ti kona ni kaania Iehova?

3. Tera ae ti riai ni kakoauaa ibukin Iehova?

³ Te koaua iai bwa Iehova e “aki raroa mairoura n tatabemanira nako” ngaira aika ti kani ukeria, ai ngaia are ti boni kona ni karekea ataakina. (Wareka Mwakuri 17:26, 27; Taian Areru 145:18.) Ana kantaninga Atuara bwa a riai naba ni kaania aomata aika aki kororaoi ao e tauraoi ma ni kukurei ni butimwaeia ma te tangira n ai aroia raoraona ni kaan. (Itaia 41:8; 55:6) Ibukin te bwai are e a tia n riki nakon te tia areru, e a kona ni korea taekan Iehova ni kangai: “Ngkoe ae Ko ongo tataro, A na bane ni kawariko aomata. E a kabaia te aomata ae Ko rineia, ma ni kairia nako Im.” (Taian Areru 65:2, 4, BG) Iai te katoto n rongorongon Uean Iuta are Ata n te Baibara, ibukin te aomata temanna are e kaania te Atua ae kaotaki iai te bwai are e karaoia Iehova.a

KAREKEA REIREIAM MAN TE KATOTO RIMOA

4. Tera ana katoto te Uea ae Ata ibukia kaain te baronga are Iuta?

⁴ E kaotiota te ingaingannano ae moan te tamaroa te Uea are Ata ibukin te taromauri ae itiaki, n arona ni kamwaawaia kabekaau n te tembora aika kakabooaki ao bouannanti ake a a rangi ni kakamanenaaki n te aba anne. (1 Uea 15:9-13) Ibukina bwa e inaomata teuanne n taetae, e a kaumakia aomata bwa a na “ira nanoni Iawe ae Atuaia aia bakatibu ma ni kawakin ana tua ma ana moti.” A kakabwaiaaki iroun Iehova ana moan ririki n tautaeka Ata ake tebwina ni kabane n te rau. Ao tera ae e kakoauaa Ata ibukin te rau anne? E tuangia aomata ni kangai: “Ti taua naba taekan te aba kioina ngkai ti kakaonimaki nakoni Iawe ae Atuara; ai ngaia ae e kakaonimaki naba nakoira ma n anganira te rau ni itera nako.” (2 Rongorongo 14:1-7, BK) Iangoia bwa tera ae riki imwina.

5. Tera ae riki nakon Ata are e a tuoaki iai onimakinan te Atua irouna, ao tera mwina?

⁵ Iangoia bwa aongkoa ngkoe te Uea are Ata. E a tabe ngkai te I-Itiobia are Tera ni buakana te baronga ae Iuta ma 1,000,000 mwaitiia mwaane ao 300 taiani kaa ni buaka. (2 Rongorongo 14:8-10) Tera ae ko na karaoia ngkana ko nora te aeka n taanga ni buaka ae moan te bubura aika a borein nakon am baareti? Bon tii 580,000 kaain am taanga ni buaka! Bon 2 okiokini mwaitiia kaain am taanga n ana taanga ae 1, ko na mimi ngkai e kariaia te Atua niniakim ae aron anne? Ko na kataia ni kaitaraa te kangaanga ae karina aei n oini wanawanam? Ke ko na onimakina Iehova bwa e na kamanoko? E kaotiotaki n te bwai are e karaoia Ata bwa e boni kaan ana iraorao ma Iehova ao e onimakinna. E tataro ma nanona ni koaua ni kangai: “Iehova ae Atuara, Ko na buokira; ba ti onimakiniko, ao ti a roko n eka nako te koraki ae bati aei n aram. Iehova, bon Atuara Ngkoe; e na aki kataea am kai te aomata.” Tera ae e karaoia te Atua nakon ana onnon Ata? “Ao Iehova E oroiia I-Tiobia.” Akea temanna mai buakoia taani kairiribai ae maiu n te buaka anne!—2 Rongorongo 14:11-13, BG.

6. Ti na kanga ni kakairi iroun Ata?

⁶ E kanga Ata ni kona n onimakina ana kairiri ma ana kamanomano te Atua ma nanona ni kabane? E taekinaki n te Baibara bwa “Ata e kakaraoa ae riai i matan Iehova” ao “moan te eti naba nanon Ata nakon Iehova.” (1 Uea 15:11, 14, BG) Ti riai naba ni beku ibukin te Atua ma nanora ni kabane. Moan te kakawaki karaoan anne iroura ngkana ti na karekea ara iraorao ae kaan ma ngaia ngkai ao n taai aika a na roko. Ai kakaitaura ngaira ngkai e a kamani mwakuri Iehova bwa e na katikira nakoina ao ni buokira ni karekea ao ni kateimatoa ara itoman ae kaan ma ngaia! Iangoi aanga aika uoua ake e a tia te Atua ni karaoa iai anne.

E A TIA NI KATIKIRA IEHOVA NI KAANIRA MA NGAIA RINANON TE KAREA NI KABOOMWI

7. (a) Tera ae e a tia ni karaoia Iehova are ti a katikaki iai nakoina? (b) Tera te kawai ae te kabanea ni kakawaki are e katikira iai te Atua nakoina?

⁷ E kaota tangiraia botannaomata Iehova rinanoni karikani mwengara are tamaroa ae ara aonnaba. E teimatoa ni kaotiota tangirara ni kateimatoaani maiura n arona ni katauraoi baika ti kainnanoi aika moan raraoi. (Mwakuri 17:28; Te Kaotioti 4:11) Ma ae kakawaki riki, e bon tabeakin Iehova baika ti kainnanoi ibukin ara onimaki. (Ruka 12:42) E karaui naba nanora bwa e ongoraei ara tataro. (1 Ioane 5:14) Mangaia are te kawai ae te kabanea ni kakawaki are e katikira iai te Atua nakoina, ike ti a kaaniaki iai ma ngaia, boni man ana tangira are e kaotiotia rinanon te karea ni kaboomwi. (Wareka 1 Ioane 4:9, 10, 19.) E kanakoa “Natina ae te rikitemanna” Iehova nakon te aonnaba bwa ti aonga ni kamaiuaki man te bure ao te mate.—Ioane 3:16.

8, 9. Tera taben Iesu n ana kantaninga Iehova?

⁸ E a tia Iehova ni karekea te anga are a na kona naba iai ni kakabwaiaaki man te karea ni kaboomwi aomata ake a maiu imwain ana tai Kristo. Man te tai are e taetae ni burabeti Iehova ni kaineti ma te tia Kamaiu ibukin te botannaomata n taai aika a na roko, E bon iangoa te karea ni kaboomwi bwa kaanga e a kamani kabwakaaki ibukina bwa e ataia ae e na boni koro bukin ana kantaninga ibukin te botannaomata. (Karikani Bwaai 3:15) N tienture ake imwina riki ao e a kaotiota ana kakaitau te abotoro Bauro nakon te Atua ibukin “te kainaomataaki ae reke man te kaboomwi, are e kabwakaaki boona irouni Kristo Iesu.” E reitia ni kangai Bauro: “E eti [aron te Atua] ni kabwarai buure ake a karaoaki rimoa, ngke e taotaona nanona.” (I-Rom 3:21-26) Ai boni kakawakira taben Iesu are ti a kaaniaki iai nakon te Atua!

⁹ A tii kona aomata aika nimamannei ni karekea ataakin Iehova rinanon Iesu ao ni kaaniaki ma ngaia n aia iraorao ae kaan. Tera aroni kamatataan te koaua aei n te Baibara? E korea ae kangai Bauro: “E kaota oin ana tangira te Atua nakoira, bwa e ngae ngke taani bure ngaira ma e mate Kristo ibukira.” (I-Rom 5:6-8) E kabwakaa te karea ni kaboomwi Iesu tiaki ibukina bwa ti tau ni karekea, ma ibukina bwa ti tangiraki. E taku Iesu: “Akea te aomata ae kona n nakoiu ngkana e aki katikia te Tama are e kanakomaiai.” E taku n te tai riki teuana: “Akea ae e na nakon te Tama ma tii ane rirou.” (Ioane 6:44; 14:6) Bon rinanon te taamnei ae raoiroi are e katikia iai aomata Iehova nakoina rinanon Iesu, ao ni buokiia bwa a na karekea aia iraorao ae kaan ma Ngaia bwa a aonga ni kona ni maiu n aki toki. (Wareka Iuta 20, 21.) Ma iangoa te anga riki teuana are e katikira iai Iehova nakoina.

E KATIKIRA IEHOVA NI KAANIRA MA NGAIA RINANON ANA TAEKA

10. Tera reireiara man te Baibara ae buokira ni kaanira riki ma te Atua?

¹⁰ N aron ae ti a tia ni maroroakinna n te kaongora aei, iai kiibu aika mwaneweaki ao ni kaotaki mani bokin te Baibara aika 14 aika kakaokoro. Ti na kanga n ataia ae ti kona ni kaanira ma ara tia Karikiriki ngkana akea te Baibara? Ti na kanga n reiakina taekan te karea ni kaboomwi, ao taekani katikakira nakon Iehova rinanon Iesu ngkana akea te boki anne? Bon rinanon te taamnei ae raoiroi are e a tia iai Iehova ni kaira korean te Baibara, ike e a kaotia iai nakoira aroarona ae anainano n ikotaki naba ma ana kantaninga aika rianako. N te katoto, n Te Otinako 34:6, 7, (BG) ao e kabwarabwaraa taekana Iehova nakoni Mote bwa ‘te Atua ae on n te atataiaomata, ae akoi, ae iremwe n un, ae e bati te nanoanga ma te koaua i Rouna; ae E kawakina te nanoanga i mwaiia ngaa, ma ni kabara buakaka ma riaoan tuua ma buure.’ Antai ae e na aki kani katikaki nakon te aomata ae aron anne? E ataia Iehova bwa ngkana ti kabatiaa riki reiakinan taekana rinanon te Baibara, ane ti na boni kinaa raoi riki iai ao n namakina kaaniara riki ma ngaia.

11. E aera ngkai ti riai ni kakorakoraira n reiakin aroaron te Atua ao kawaina? (Nora te taamnei ni moan te kaongora aei.)

¹¹ Ni kabwarabwaraan arora ni kona n uaiakina reken ara iraorao ae kaan ma te Atua, e taekinaki ae kangai n te moantaeka n te boki ae Kaaniko Riki ma Iehova: “Karekean te reitaki n te iraorao e reke mani kinaakin te aomata, mataaiakinan ao taraakin aroarona aika kakaokoro, bwa a kakawaki. Mangaia are e rangi ni kakawaki bwa ti na reiakin aroaron te Atua ma anuana aika a kaotaki n te Baibara.” Ma ai kakaitaura ngaira ngkai e a tia Iehova ni kariaia korean ana Taeka n te aro are a a kona n ota iai aomata!

12. E aera Iehova ngke e kamanenaia aomata bwa a na korea te Baibara?

¹² E kona Iehova ni katauia anera bwa a na korea te Baibara. Ni koauana, a rangi n tabeakinira ma ara mwakuri naba. (1 Betero 1:12) Akea te nanououa, bwa a kona anera ni korei ana rongorongo te Atua nakoia botannaomata. Ma a na iangoi bwaai n aron iangoaia irouia aomata? A na kona n taekini baika ti kainnanoi, mamaarara ao tiara? A bon aki, bwa Iehova e atai tian ara konabwai ni kaineti ma aei. Kioina ngkai Iehova e katauia aomata bwa a na korea te Baibara, ti a kona n rangi n ota riki ibukia. Ti kona n ota n aia iango ma aia namakin taani korea te Baibara ao aomata riki tabeman aika mwaneweaki n te Baibara. Ti a kona n ota ni bwaran nanoia, raraomaia, maakuia, aki kororaoia n ikotaki naba ma uataboani kimwareireia ao tokanikaia. N aron te burabeti are Eria, bon aomata naba “n ai arora” taani korea te Baibara ni kabane.—Iakobo 5:17.

13. Tera aron am namakin n ana tataro Iona?

¹³ N te katoto, iangoia bwa tao e kona te anera ni kabwarabwarai raoi ana namakin Iona ngke e birinako te burabeti anne mani mwiokoana mairoun te Atua ke e aki. Ai bon raoiroira riki ngke e kariaia Iehova bwa e na korea Iona rongorongona i bon irouna, n ikotaki naba ma ana tataro nakon te Atua ae nako mai nanona mai kabini marawa! E taku Iona: “Ngke e nimamate tamneiu i nanou, ao I uringa Iehova.”—Iona 1:3, 10; 2:1-9, BG.

14. E aera ngkai ko kona n ota n te bwai are e koreia Itaia ibukina?

¹⁴ Iangoa naba te bwai are e tua Iehova nakon Itaia bwa e na koreia ibukina. Imwin noran te miitara ibukini mimitongin te Atua, e a kaungaaki te burabeti aei bwa e na korei ana bure: “Akea ngai! ba I a mate; ba te aomata ngai ae a kamwara matanriau, ao I maeka i buakoia aomata aika a kamwara matanriaia: ba a nora te Uea ae Iehova Tabaota matau.”! (Itaia 6:5, BG) E aki kona n taekina anne te anera i bon ibukina, ma e kona Itaia, ao ti kona n taekina aron ana namakin.

15, 16. (a) E aera ngkai ti kona n ota n aia namakin raora n aomata? Taekini katoto. (b) Tera ae na buokira ni kaanira riki ma Iehova?

¹⁵ A na kona n taekinna anera ae a “aki tau,” n aron Iakoba ngke e taekina anne ke n aron naba are e namakinna Betero bwa “te tia bure” ngaia? (Karikani Bwaai 32:11, BK; Ruka 5:8) A na “maaku” anera aika raoiroi n aroia taan rimwin Iesu, ke a na kainnanoa ‘kaninikoriaaia’ ngkana a aitara ma te karitei n tataekinan te rongorongo ae raoiroi n aroni Bauro ao aomata riki tabeman? (Ioane 6:19; 1 I-Tetaronike 2:2) A na bon aki, bwa a kororaoi anera n aaro nako ao a korakora riki nakoia aomata. Ma e ngae n anne, ngkana a kaotiotii aeka n namakin akanne aomata aika aki kororaoi, ti waekoa naba ngkekei n ota n aia namakin ngkai bon aomata naba ngaira. Ngkana ti wareka Ana Taeka te Atua, ni koauana ti kona ni ‘kimwareirei ma aomata aika kimwareirei, ao n tang ma aomata aika tang.’—I-Rom 12:15.

¹⁶ Ngkana ti iaiangoi baika a taekinaki n te Baibara ibukin aron Iehova nakoia ana toro rimoa aika kakaonimaki, ti na atai iai baika rangi ni bati aika moan raraoi ibukin Atuara, are e taotaona nanona ao ni mwamwannano ni kaania aomata aika aki kororaoi. Ngaia are ti na rikirake n rangi ni kinaa Iehova ao e na rikirake ni korakora tangirana iroura. Ibukin anne, ti a kona ni kaanira riki ma ngaia.—Wareka Taian Areru 25:14.

KAREKEAN TE ITOMAN AE AKI KONA N URUAKI MA TE ATUA

17. (a) Tera te reirei ni kariri ae manena are e anganaki Ata iroun Ataria? (b) E kanga Ata ni kakeaa bongan ana taeka n reirei Ataria, ao tera mwina?

¹⁷ Imwin tokanikain te Uea are Ata i aon aia taanga I-Tiobia, e a anganaki teuanne te reirei ni kairiri ae manena ma ana aomata iroun Ataria are ana burabeti te Atua. E taku Ataria: “E boni mena Iehova i roumi, ngkai kam mena i Rouna; ao ngkana tao kam ukoukoria, ao E na reke i roumi; ma ngkana tao kam kitanna, ao E na kitaningkami.” (2 Rongorongo 15:1, 2, BG) Ma rimwi riki, e a kabwaka Ata ni mutiakina te reirei ni kairiri ae manena anne i nanoni maiuna. Ngke e a maakuia ana kairiribai man te tautaeka n uea n Iteraera mai meang Ata, ao e a rairaki nakoia kaain Turia ibukini buokana. N oneani mwin are e na manga wetea Iehova bwa e na buokiia, e bon ukoukora ana boraraoi ma beekan. N etina, e bon tuangaki Ata ni kangai: “Ko arona te nanobaba n anne; ba a na roroko nako naba buaka i roum i mwini ngkai.” Ao bon anne are e riki n nikiran ana ririki n tautaeka Ata. (2 Rongorongo 16:1-9, BG) Tera reireiara n aei?

18, 19. (a) Tera ae ti riai ni karaoia ngkana ti a tia ni kariaia kararoaara teutana mairoun te Atua? (b) Ti na kanga ni kaanira riki ma Iehova?

¹⁸ Ti riai n aki kitana Iehova. Ngkana ti kariaia bwa ti na raroa teutana mairouna, ti riai ni kaboraoi ara mwakuri ma ae taekinaki n Otea 12:6, (BG) ae kangai: “Rairaki nakon Atuam: kakawakina te atataiaomata ma te kaeti-taeka, ao kaantaninga Atuam n aki toki.” Ti bia kaanira riki ma Iehova n aki toki n iaiangoan te karea ni kaboomwi ma nanora ni kakaitau ao taningamaraura n ukeuke n reirei n ana Taeka ae te Baibara.—Wareka Te Tua-Kaua 13:4.

¹⁹ E korea ae kangai te tia areru: “E raoiroi i rou te kaania te Atua.” (Taian Areru 73:28, BG) Ti bia bane n teimatoa n reiakini baika boou ibukin Iehova, ao ni karaoan anne, ti na rikirake n tangiria riki. Ao e bia kaanira riki Iehova ngkai ao n aki totoki!