KARAKI 76

E A Kamaunaki Ierutarem

E A RIAON ngkai 10 te ririki imwin are e anaia kaain Iteraera aika rabakau te Uea are Nebukaneta nako Baburon. Ao ngkai nora te bwai ae riki! E a kabuekaki Ierutarem. Ao tibun Iteraera ake a aki mate, a a uotaki bwa taenikai i Baburon.

Uringnga are aio boni kanoan ana kauring ana burabeti Iehova, nakoia aomata bwa e na riki ngkana a aki bitii aroia aika bubuaka. Ma a aki ongo tibun Iteraera irouia burabeti. A teimatoa n taromauri atua ni kewe ao a aki taromauria Iehova. Mangaia are a a bon tau ni katuuaeaki aomata, ao ti ataa aei ibukina bwa e tuangira ana burabeti te Atua are Etekiera taekan aia mwakuri aika buakaka tibun Iteraera.

Ko ataia bwa antai Etekiera? Bon temanna naba mai buakoia rorobuaka n ataei ake e kairiia nako te Uea ae Nebukaneta, tebwi tabun te ririki imwain kamaunakin Ierutarem. Kaain naba te kairaki nako Baburon n te tai arei bon Taniera ma raoraona ake teniman, ake Tiateraka, Metiaka, ao Abeteneko.

I nanon ana tai Etekiera ni mena i Baburon, ao Iehova e a kaotii nakoina baika bubuaka ake a karaoaki n te tembora i Ierutarem. E karaoa aei Iehova n te kakai. E mena rabwatan Etekiera i Baburon, ma e karaoia Iehova bwa e na kona n nori baika a riki n te tembora. Ao a rangi ni kakubanako baike e nori Etekiera!

E tuanga Etekiera Iehova ni kangai: ‘Nori bwaai aika kamwaraa aika a karaoi aomata n te tembora. Nora te oo ane e a onrake ni korobanna, aika taamneia naeta ma maan riki tabeua. Ao noriia tibun Iteraera, bwa ane a a taromauri baikanne!’ E nori baikai Etekiera ao e korei taekaia.

E titirakinaki Etekiera iroun Iehova ni kangai: ‘Ko ataia bwa tera ae a karaoia mataniwia tibun Iteraera ni karabaia?’ Eng, e noriia naba. Boni mwaane aika 70 mwaitiia ake a bane n taromauria naba atua ni kewe. A taku: ‘E aki norira Iehova, bwa e a tia ni kitana abara.’

Imwina ao e a kaotiia aine Iehova nakon Etekiera, ake a mena ni mataroan te tembora are tannako-iang. A tekateka ikekei n taromauria te atua ni kewe are Tammuti. Ao noriia mwaane ake n te tabo are e ririn te aba iai n ana tembora Iehova aika 25 mwaitiia! E noriia naba Etekiera. A bobaraki nako mainiku ma n taromauria taai!

E taku Iehova: ‘Bon akea karineau irouia aomata aikai. A aki aoriia ni karaoi baika bubuaka, ao a a manga rin ni karaoia i nanon au tembora!’ Mangaia are e berita Iehova ni kangai: ‘A nang nora korakoran unu. Ao N na aki nanoangaiia ngkana a kamaunaki.’

Tao bon tenua te ririki imwin kaotakin baikai nakon Etekiera iroun Iehova, ao a a karitei naba tibun Iteraera nakon te Uea are Nebukaneta. Mangaia are e a roko ni buakania. Imwin teuana ao te iterana te ririki, e a uruakaki oon Ierutarem irouia kaain Baburon, ao e a kabuekaki te kaawa ni kabutaa. Angiia aomata a mate, ke a uotaki nako Baburon bwa taenikai.

E aera ngkai e a boni kariaia Iehova bwa e na riki te aro ae kakaiaki aei nakoia tibun Iteraera? Ibukina bwa a a tia n aki ongo iroun Iehova, ao a aki naba ongeaba n ana tua. E kaotaki n aei bwa e kakawaki bwa ti na karaoa n taai nako te bwai are e taku te Atua.

N te moantai ao a kariaiakaki tabeman aomata bwa a na tiku ni maeka i Iteraera. Ao e mwiokoaki ngkoa te I-Iutaia ae arana Ketaria, iroun te Uea are Nebukaneta bwa e na mataniwia aomata. Ma iai tabeman aomata ake a kamatea Ketaria. Ibukin anne ao a a maaku aomata, bwa mwina a roko kaain Baburon n tiringia ni kabane ibukin karaoan te mwakuri are buakaka arei. Mangaia are a kairoroa Ieremia bwa e na iriia, ao a birinako nako Aikubita.

Aio are e a karika te aba ae Iteraera bwa e nang iti kaaina. E aki maekanaki Ierutarem i nanon 70 te ririki. Bon akea naba kaaina temanna. Ma e berita Iehova bwa e na manga kaokiia ana aomata nako abaia imwin 70 te ririki. Ma imwain anne ko ataia bwa tera ae tabe n riki nakoia ana aomata te Atua, n te aba ae Baburon are a uotaki nako iai? Ti na noria.

2 Uea 25:​1-26; Ieremia 29:10; Etekiera 1:​1-3; 8:​1-18.