KARAKI 81
Onimakinan Ana Ibuobuoki Te Atua
NGAA ma ngaa aomata ake a mwananga n te kawai ae abwabwaki mai Baburon nako Ierutarem. Ma ngke a a roko, ao e a urubekebeke Ierutarem. Akea ae maeka iai. A a manga moani katei naba bwaai nako tibun Iteraera.
Teuana mai buakoni moani bwaai ake a katei, bon te baonikarea. Aio te tabo are a kona ni kareania iai maan bwa aia bwaintangira nakon Iehova. Tabeua te namwakaina imwina ao a a moana katean te tembora tibun Iteraera. Ma a aki kukurei iai aia kairiribai ake a maeka n uakaan ma ngaiia. Ngaia are a kataia ni kakamaakuia bwa a na katoka aia kateitei. N tokina ao a a tokanikai kairiribai aikai, ni kaira nanon uean Botia ae boou bwa e na katea te tua ibukin katokan te mwakuri ni kateitei.
Akea bwa a a bwakanako ririki aika bati, ni karokoa ai 17 te ririki imwin okia tibun Iteraera mai Baburon. E kanakoia ana burabeti Iehova aika Akai ao Tekaria bwa a na tuangia aomata bwa a nang manga moana te kateitei. A onimakina te ibuobuoki mairoun te Atua aomata, ao a ongeaba irouia burabeti. A a manga waakina naba aia kateitei, e ngae ngke iai te tua ae katabuaka karaoana.
Mangaia are e a roko te tia mwakuri n te tautaeka ni Botia ae arana Tatenai, bwa e na titirakinia tibun Iteraera bwa antai ana kariaia are a katea iai te tembora. A tuangnga tibun Iteraera bwa ngke a mena ngkoa i Baburon, ao e tuangia ae kangai te Uea are Tairati: ‘Naako ngkai nako Ierutarem, ao katea ana tembora Atuami ae Iehova.’
E kanakoa te reta Tatenai nako Baburon, ao e titiraki bwa bon te koaua bwa e tua aei te uea are e a tia ni mate ngkoa are Tairati, ke e aki. N te tai ae waekoa ao e a roko ana reta, uean Botia ae boou. E kaotaki iai bwa bon te koaua bwa e bon taekina anne Tairati. Mangaia are e korea ae kangai te uea: ‘Katikuia tibun Iteraera bwa a na boni waakina nako katean ana tembora Atuaia. Ma I tua bwa kam na ibuobuoki.’ Tao bon aua te ririki imwina ao e a tia te tembora, ao a a rangi ni kukurei tibun Iteraera.
A a manga bwakanako naba ririki aika rangi ni bati, ni karokoa ae e a kaania 48 te ririki imwin tian te tembora. A a raarikin aomata ake i Ierutarem, ao e a taraa n aki kantara aia kaawa ma ana tembora te Atua. N te aba ae Baburon, ao e a ongo taekan kainnanoakin katamaroaan ana tembora te Atua, te I-Iteraera ae Etira. Mangaia are ko ataa te bwai ae e karaoia?
E nako Etira ni kawara Atatokititi are uean Botia, ao te uea ae raoiroi aei e angan Etira bwaintangira aika bati bwa e na uoti nako Ierutarem. E butiia tibun Iteraera Etira ake i Baburon bwa a na buokia n uotii baikekei nako Ierutarem. Tao 6,000 aomata ake a katau bwa te mwananga. Moan te bati te tirewa ao te koora ake a na uotaki, n ikotaki naba ma bwaai riki tabeua aika kakawaki.
E raraoma Etira ibukina bwa iai mwaane aika buakaka n taabo ake a na rirarikina ni mwanangaia arei. A na bae ni kataia n anai tirewa ma koora mwaane aikai, ao n tiringia. Ngaia are e a weteia aomata Etira n ikotiia, n aron ae ko noriia n te taamnei. Imwina ao e a tataro nakon Iehova bwa e na kawakinia i aoni kawaia ae abwabwaki aei n okira Ierutarem.
E boni kawakinia Iehova. Ao ngke e a koro aua aia namwakaina ni mwananga, ao a a roko raoi i Ierutarem. E aki ngkanne kaotaki n aei bwa e boni kona Iehova ni kamanoia aomata ake a onimakinna ibukin buokaia?