KARAKI 96
E Kamarurungia Aoraki Iesu
N ANA tai Iesu ni mwananga rinanoni kaawa, e kakamarurungia naba aoraki. E a butanako rongorongon ana kakai ni kaawa aika bubura ao aika uarereke. Mangaia are a a uotaki nakoina mwauku ma bonotaninga, ao aoraki aika bati riki. Ao e kamarurungia ni kabane.
Ai tenua ngkai tabun te ririki imwin bwabetitoan Iesu iroun Ioane. E tuangia ana abotoro Iesu bwa e a kaan te tai are e nangi nako iai Ierutarem, ike e na tiringaki iai, ao e na manga-uti man te mate. Ma imwain te tai anne ao e bon tabe naba ni kamarurungia aomata.
N te taina ao e kume n angareirei Iesu n te Taabati. Te Taabati bon aia bong ni motirawa I-Iutaia. Te aine ae ko noria aei, e rangi n aoraki. E kabanea 18 te ririki ni bwaokooko ao e aki kona n eti ikana. Mangaia are e katokaa baina Iesu i aona, ao e a momoana eutana, ni karokoa ae e a boni marurung!
A un n aei mataniwin te Aro ao e takarua temanna ni kangai: ‘Tiaki bon onobong ara bong ake ti riai ni mwakuri iai? Akanne boong ake ti kona ni kamarurungia aomata iai, ma e aki riai karaoana n te Taabati!’
Ma e kangai Iesu: ‘Boni ngkami mwaane aika buakaka. Tiaki nanona bwa akea i buakomi ae e kaakabwaraa ana taongki n te Taabati ao e nako ni kamooia. Mangaia are e riai te aine ae kananoanga aei, ae e a maan ni weneakina aorakina i nanon 18 te ririki, bwa e na kamarurungaki n te Taabati ke e aki?’ A rotaki n te maamaa mwaane aikai n ana kaeka Iesu.
Imwina ao a a nako Ierutarem, Iesu ma ana abotoro. Ngke a a roko i tinanikun te kaawa ae Ieriko, ao a a ongo mataki aika uoman aika a bububuti te amwarake, taekan Iesu bwa e rikekei. Mangaia are a a takarua ni kangai: ‘Iesu, buokira!’
E weteia mataki aikai Iesu ao e titirakinia ni kangai: ‘Tera ae kam tangirai bwa N na karaoia?’ A kaeka ao a taku: ‘Te uea, kanoraabaira.’ E ringi mataia Iesu ao a a bon noraaba naba ngkekei! Ko atai bukin karaoan kakai aika kamimi aikai ni kabane iroun Iesu? Ibukina bwa e tangiriia aomata, ao e tangiria bwa a na onimakinna. Mangaia are ti kona ni koaua raoi bwa ngkana e a tautaeka bwa te Uea, ao bon akea naba temanna n te aonnaba ae e na manga aoraki.
Mataio 15:30, 31; Ruka 13:10-17; Mataio 20:29-34.