Tera ae Kariaiakaki n te Tua n te Bongi n Taabati?

N te bongi n Taabati teuana, ao e nako n te tinakoka Iesu tao i Kariraia. E kaitiboo ikanne ma te mwaane ae mate baina ae te atai. (Ruka 6:6) A kamwataua taraan Iesu taani koroboki ao Baritaio. Bukin tera? A kaota te bae a rangi ni kan ataia ngke a titiraki ni kangai: “E kariaiakaki n te tua te katoki aoraki n te bongi n Taabati?”​—Mataio 12:10.

A kakoauaa mataniwin te Aro n Iutaia bwa e riai te katoki aoraki n te bongi n Taabati, tii ngkana e a kaani mate te aomata. Ngaia are n te katoto, e aki kariaiakaki i aan te tua kaetan te ri ke bautan te mwaoto n te bongi n Taabati, ae baika riki ae e na aki ruanikai iai maiun te aomata. E teretere bwa a aki titirakina Iesu taani koroboki ma Baritaio ibukina bwa a nanoangaa teuae korakora rawawatana aei. Ma a kataia ni kakaaea te anga are a na kabuakakaa iai Iesu.

Ma e ataa Iesu aia iango ae kairua. E ataia naba bwa e rangi n riaon ae riai aia iango ni kaineti ma uruan tuan te bongi n Taabati ao e biri ritinanikun te Baibara. (Te Otinako 20:​8-10) E a tia naba ni kaaitara ma kabuakakaana ae aki eti n ana mwakuri aika raraoi. Mangaia are e a angaraoi bwa e na karaoa ana kamataku ngke e tuanga teuare mate baina ni kangai: “Teirake ao naako nuka.”​—Mareko 3:3.

E rairaki Iesu n taraiia Baritaio ao e taku: “Ngkana iai ami tiibu ae tii temanna, ao e bwaka te tiibu anne i nanon te mwarua n te bongi n Taabati, antai i buakomi ae e na aki taua ma ni kawaerakea?” (Mataio 12:11) Kioina ngkai e bobuaka boon te tiibu, a na aki katikua nakon te bong are imwina bwa mwina e mate ao e na kee iai kaubwaia. Irarikin anne e taekinaki n te Baibara ae kangai: “E tabeakinia raoi ana man aika manana te aomata ae raoiroi.”​—Taeka N Rabakau 12:10.

E katerea te reirei mai iai Iesu ni kangai: “Ai batira riki ngkanne kakawakin te aomata nakon te tiibu! Mangaia are e boni kariaiakaki karaoan te mwakuri ae raoiroi n te bongi n Taabati.” (Mataio 12:12) Ngaia are e aki urua te bongi n Taabati Iesu ngke e kamarurunga te aomata iai. A aikoa kona ni kakewea te iango ane riai anne mataniwin te Aro are kaotiotaki iai te nanoanga ao a aki kakarongoa.

E tarataranako Iesu ma te mata n aki kukurei ao te nanokawaki ibukin aroia n imanono ao n aki wanawana. E taku ngkanne nakon teuaei: “Arora baim.” (Mataio 12:13) Ngke e aroria, ao e a maiu naba. E rangi ni kimwareirei iai te mwaane arei, ma tera aron rotakia taani kani kamwanea Iesu?

A aki kaota te kukurei Baritaio ni maiuni bain teuaei, ma a otinako ao a boowi n te tai naba arei ma “ana aomata Erote bwa a aonga ni kamatea Iesu.” (Mareko 3:6) Boni kaain naba te botaki aei Tarukaio. A boni kakairiribai i marenaia Tarukaio ma Baritaio, ma ngkai a a katiteuanaaki ni kaitaraa Iesu.