KARAKI 99

N Te Ruu Are I Eta

AI TARIKIN ngkai te Kaabong, ai uoua te bong n nako imwina. A mena n te ruu ae bubura aei i eta n te borauatao, Iesu ao ana abotoro aika 12 bwa a na karaoa te Toa are te Riao. Teuae nako aei bon Iuta Itekariota. E na kawariia ibonga n tuangia aroni kamwanean Iesu.

Tebongina i mwaina ao e kawariia naba ibonga Iuta n titiraki ni kangai: ‘Tera ae kam na anganai ngkana I buokingkami ni kamwanea Iesu?’ A kaeka n taku: ‘Tenibwi te mwakoro n tirewa.’ Mangaia ae e nangi nako ngkai Iuta nakoia mwaane akekei, bwa e aonga ni kairiia nakon Iesu. E aki ngkanne rangi ni buakaka anne?

Ngke e a tia karaoan te Toa are te Riao, ao e a manga moana karaoan te toa riki teuana Iesu ae rianako okorona. E angania ana abotoro te bwerena ao e taku nakoia: ‘Kanna bwa e tei ibukin rabwatau ae e na kabureaki ibukimi.’ Imwina e angania te mwangko ni wain ao e taku: ‘Nimma, bwa e tei ibukin raraau ae e na kawawaeaki ibukimi.’ E aranaki aei n te Baibara bwa ‘ana katairiki te Uea.’

A amwarake tibun Iteraera n tain te Toa are te Riao, bwa a kauringaki iai rokon ngkoa ana anera te Atua i Aikubita, are e ‘riaoi’ aia auti, ao e kamateia karimoa n aia auti kaain Aikubita. Ma ngkai e a manga tangiria Iesu bwa a na ururingnga taan rimwina, ao n uringa arona n anga maiuna ibukiia. Anne bukina are e tuangia iai bwa a na kakauringa te katairiki ae rianako okorona aei ni katoa ririki.

Imwin karaoan Ana Katairiki te Uea, ao e a tuangia ana abotoro Iesu bwa a riai ni kaninikoriaia, ma ni kakorakoraa aia onimaki. Ni banen aia botaki ao a anene nakon te Atua ao a a nako naba. E a bwakanako te tai ngkai, bwa tao ai mwin te nukanibong. Ti na noria bwa a na nakea.

Mataio 26:​14-30; Ruka 22:​1-39; Ioane mwakoro 13 nakon 17; 1 I-Korinto 11:20.