Te Kauring ae Irekereke ma Maium

NGKE e mena i aon te aba Iesu Kristo, ao e karaoa te kauring are e a neboaki iai te Atua. Bon tii aei te toa ae riai ni kaakaraoaki irouia Aaro, n aron are e a tia n tua Iesu nakoia taan rimwina bwa a na karaoia. Bon Ana Katairiki te Uea ae e ataaki naba bwa te Toa.

Iangoia bwa aongkoa akea ae e noriko ae ko mamataku ni bwaai ake a riki imwain te botaki ni karokoa ae e a karaoaki te toa anne. E botaki Iesu ma ana abotoro n te ruu are i eta i Ierutarem ibukin bukamaruan aia Toa ae te Riao I-Iutaia. A a tia ni kana amwaraken te Toa are te Riao, ike e a kanaki iai te tiibu te tei ae umunaki, aroka aika mao, te kariki ae aki-karikaki, ao te wain ae uraura. E a tia n nako n te tai anne te abotoro are Iuta Itekariota are e aki kakaonimaki ao are e nang waekoa ni kamwanea ana Toka. (Mataio 26:17-25; Ioane 13:21, 26-30) Bon tii Iesu ma ana abotoro aika kakaonimaki ake 11 ake a mena iai. E boni mena Mataio i buakoia n te tai anne.

Ni kaineti ma ana rongorongo Mataio are e boni kakoauaa ni matana, ao aei aron Iesu ni karaoa Ana Katairiki te Uea: “E anaa te berena [te kariki ae aki-karikaki] Iesu, ao E tataro, ao E tabeutaia, ao E angania ana reirei, ao E kangai, Anaia, kanna; rabatau aei. Ao E anaa te mangko [ni wain], ao E tataro ni katituaraoi, ao E angania, ao E kangai, Kam na bane ni moi n aei; ba rarau aei, ae raran te berita nabangkai, ae kawawaeaki i bukiia aomata aika bati ba bwaini kabaran aia bure.”​—Mataio 26:26-28.

Bukin tera bwa e karaoa Ana Katairiki te Uea Iesu? Bukin tera bwa e kabongana te kariki ae aki-karikaki ao te wain ae uraura, ngke e karaoa aei? Te koaua bwa a riai ni katoong banna aikai taan rimwin Kristo ni kabane? Iratai tain kaakaraoan te toa? Ao te koaua bwa e boni kakawaki ibukim?