KARAKI 101

E A Kamateaki Iesu

NORA ngkanne te bwai ane e kakaiaki arona anne! E nang kamateaki Iesu. A a tauria i aon te kai ni kammaraki. A bobitiaki baina ma waena. E aera ngkai iai aika a kani karaoa aei nakon Iesu?

Ibukina bwa iai tabeman aomata aika a riribaia. Ko ataiia bwa antai? Temanna irouia bon te anera are buakaka are Tatan te Riaboro. Boni ngaia are e konaa aon Atam ma Nei Ewa ni kairiia bwa a na aki ongeaba iroun Iehova. Ao bon Tatan ae manga kaira naba nanoia ana kairiribai Iesu bwa a na karaoa te iowawa ae kakaiaki aei.

Imwain bobitian Iesu i aon te kai, ao a karaoa te mwakuri ae aki riai nakoina ana kairiribai. Ko uringia ngkoa ngke a roko n te oo-n-aroka are Ketetemane n taua n uotia nako? Antai taiani kairiribai akanne? Eng, boni mataniwin te Aro. Ngkai ti na noria bwa tera ae riki imwina.

Ngke e a kairaki nako Iesu nakoia mataniwin te Aro, ao a a biri nako ana abotoro. A a kitana Iesu ma ana kairiribai, bwa a a maaku. Ma a aki bati ni kararoaiia abotoro aika Betero ao Ioane. A ririmwin Iesu bwa a na noria bwa tera ae e na riki nakoina.

A kaira Iesu ibonga nakon te unimwaane are Annati, are te ibonga ae rietata rimoa. A aki maan aomata n tiku ikekei. A a manga kaira ngkanne Iesu nakon ana auti Kaiaba, are ai te ibonga ae rietata n te tai arei. A bati mataniwin te Aro ake a ikotaki n ana auti.

N ana auti Kaiaba ao e a karaoaki iai te boowi. A karinaki aomata bwa a na taekin keewe ibukin Iesu. A taku mataniwin te Aro ni kabane: ‘E riai ni kamateaki Iesu.’ Imwina ao a bawarea ubuna, ao a oreia n timoini baia.

Ngke e a tabe ni waaki nako te baei, ao e mena i tinaniku Betero n te katawanang. E kamwaitoro te tairiki arei, mangaia are a a kaura te ai aomata. Ngke a tabe aomata ni kaabueia i rarikin te ai, ao e a taraa naba Betero te aine ae te tia mwakuri ao e taku: ‘Bon raon naba Iesu te mwaane aei.’

E kaeka ni kangai Betero: ‘Bon tiaki raou!’

Tenua te tai ae e tuangaki iai Betero bwa bon raon Iesu, ma e kakewekewe Betero ni katoa tai. Ngke e taekina aei Betero n te katenua n tai, ao e a tanrikaki naba Iesu n taraia. E a namakina te nanokawaki Betero imwin taekinan te kewe tenua te tai, ma ngaia are e a nako ni kararoaa n tang.

Ngke e a moanna ni kaborake taai n ingabongin te Kanimabong, ao a a kaira nako Iesu ibonga nakon autin te Tanirim ae te tabo ni boowi ae bubura. Ikai are a a maroroakina iai te bwai are a nang karaoia nakon Iesu. Imwina ao a a kairia nakon Bontio Birato, are te tia tautaeka i Iutaia.

A tuanga Birato ni kangai ibonga: ‘E buakaka te aomata aei. E riai ni kamateaki.’ E taku Birato imwin titirakinan Iesu: ‘I aki kona ni kunea kakoauaan ae e a tia ni karaoa ae buakaka.’ Imwina e kanakoa Iesu Birato nakon Erote Antibati. Erote bon te tia tautaeka i Kariraia, ma e mena moa i Ierutarem. E aki naba kunea Erote bwa e a tia Iesu ni karaoa ae bure, mangaia are e a manga kaokia nakon Birato.

E tangiria Birato bwa e na kabwaraa Iesu, ma a rawa iai ana kairiribai Iesu ao a tua kainaaomatakin temanna te bure man te karabuti. Teuaei boni Baraba ae te tia iraa. Tao e a tawanou ngke e a kaotinakoaki Iesu iroun Birato. E taku nakoia aomata: ‘Nora! Ami uea!’ Ma a tatakarua mataniwia ibonga ni kangai: ‘Kairia nako! Tiringnga! Tiringnga!’ Mangaia are e a kainaaomataa Baraba Birato, ao e a kairaki nako Iesu bwa e na kamateaki.

Tao imwin tawanou teutana n te Kanimabong, ao e a bobitiaki Iesu i aon te kai. Iai uoman taani kamwarua ake a tauraki naba bwa a na kamateaki i rarikin Iesu. A nukaa Iesu ma ko aki kona n noriia n te taamnei. Imwain raoi maten Iesu ao e taku te tia kamwarua are temanna nakoina: ‘Uringai ngkana ko a roko n am tautaeka n uea.’ Ao e kaeka Iesu ni kangai: ‘I berita nakoim bwa ko na mena ma ngai i Baretaiti.’

E aki ngkanne kakukurei te berita anne? Ko ataia bwa te baretaiti raa ae nanonna Iesu ikai? E mena ngkoa iia te baretaiti are e karaoia te Atua n te moantai ni karikibwai? Eng, e mena n te aonnaba. Ao n te tai are e a uea iai Iesu i karawa, e nang kauta ngkanne te mwaane aei bwa e na nora kakukurein te Baretaiti ae boou n te aonnaba. Tiaki ti na kukurei n anne?

Mataio 26:​57-75; 27:​1-50; Ruka 22:​54-71; 23:​1-49; Ioane 18:​12-40; 19:​1-30.