A Kunea Birato ma Erote Bwa E Aki Bure

E aki kataia Iesu ni karabaa taekana mairouni Birato ae bon te uea ngaia. Ma e bon aki kona ni karika te kangaanga nakon Rom ana Tautaeka n Uea. E taku Iesu: “Tiaki ana bwai te aba au Tautaeka n Uea. Ngke arona bwa ana bwai te aba au Tautaeka n Uea, ao a na buaka au aomata bwa N na aki kabureaki nakoia I-Iutaia. Ma bon tiaki mai aon te aba au Tautaeka n Uea.” (Ioane 18:36) Eng, iai ana Tautaeka n Uea Iesu ae tiaki man te aonnaba aei.

E aki iangoia Birato bwa e na katuka taekan te kangaanga n arona anne. E titiraki ni kangai: “Nanona ngkanne bwa te uea ngkoe?” E kaotia Iesu nakoni Birato bwa e eti ae e taekinna ngke e kaeka ni kangai: “Ao ane ko a bon taekinna bwa te uea ngai. Bon aio bukini bungiakiu, ao bukin naba rokou nako buakoia kaain te aonnaba, bwa N na kaotioti ibukin te koaua. Ane e ira nanon te koaua ao e ongo bwanaau.”​—Ioane 18:37.

E a kaman taetae Iesu nakon Toma ni kangai: “Boni ngai te kawai ao te koaua ao te maiu.” E a ongo ngkai Birato bukin rokon Iesu i aon te aba bwa e na tataekina “te koaua” riki te koaua ibukin ana Tautaeka n Uea. E motinnanoia Iesu bwa e na teimatoa ni kakaonimaki nakon te koaua anne, e ngae ngkana e na mate iai. E titiraki Birato ni kangai: “E kona n ataaki te koaua?” ma e aki tataningaa kabwarabwaraana riki. E iangoia bwa e a tia n tau ongorana ibukini motikan taekan te aomata aei.​—Ioane 14:6; 18:38.

E okiriia te koraki Birato ake a tataninga i tinanikun te baareti. E bae n tei Iesu i rarikina ngke e tuangia mataniwi n ibonga ao ake a mena i rarikia ni kangai: “I aki kunea te bure iroun teuaei.” A maraki nanoia aomata n te moti anne ao a kairoroa ni kangai: “E kamangaoia aomata n angareirei ni kabutaa aonon Iutaia, ni moa mai Kariraia ni karokoa naba ikai.”​—Ruka 23:4, 5.

E bae ni mimi Birato n aia ribuaka I-Iutaia ni kaineti ma babaia n aia Aro. Ngaia are ngke a tatakarua mataniwi n ibonga ao unimwaane, e a titirakina Iesu Birato ni kangai: “Ko aki ongo aia taeka ni bukibuki aika bati ibukim?” (Mataio 27:13) Ma e aki kaeka naba teutana Iesu. E mimi Birato n teini moana ae rau n aki ongea bukinana aika bati.

A kaotia I-Iutaia bwa e ‘moana ana mwakuri mai Kariraia’ Iesu. Man anne e a ataia iai Birato ae boni kaaini Kariraia Iesu. E a reke iai ana iango bwa e na birinako mani katabeana ni motika taekan Iesu. E mena i Ierutarem n tain te Toa ae te Riao Erote Antibati (natin Erote te Kakannato) ae te tia tautaeka i Kariraia. Ngaia are e a kanakoaki Iesu irouni Birato nakon Erote. Bon Erote Antibati are e tua kabakuan roroan Ioane te tia Bwabetito. Ngke e ongo Erote imwina bwa e karaoi kakai Iesu ao e a maaku bwa e taku bwa tao Iesu aei bon Ioane are e a mangauti man te mate.​—Ruka 9:7-9.

E a kimwareirei ngkai Erote bwa e a reke ana tai n nora Iesu. Ma tiaki ibukina bwa e kani buoka Iesu ke ni kan rinanoa motikan taekana, ke tao ibukin kan ataakin ae a eti i aan te tua bukinana ke a aki. E bon tii kan atai ana waaki ao ni “kan nora te kakai mairouna.” (Ruka 23:8) Ma e aki katokaaki boran Erote iroun Iesu. E bon titirakinaki Iesu iroun Erote ma e aki kaeka teutana. E maraki nanon Erote ma ana tautia iroun Iesu ao a “bwainingareia.” (Ruka 23:11) A karina kunnikaina ae tamaroa ao a kakanikoa. E a kaokia ngkanne Erote nakon Birato. A kakairiribai ngkoa Erote ao Birato ma ngkai a a iraorao.

Ngke e a oki Iesu, ao e a ikotiia mataniwi n ibonga Birato, aia tia kairiri I-Iutaia, ao aomata, ao e taku: “I nenera taekana i matami, ma bon akea te bure ae I kunea irouna, ni kaineti ma baike kam bukinna iai. Ao e bon aki naba reke bukinana iroun Erote, bwa e kaokia nakoira, ao noria! akea te bwai ae e karaoia ae riai matena iai. Mangaia ae N na katuuaaea ao I a kainaomataa naba.”​—Ruka 23:14-16.

E ingainga Birato ni kani kainaomataa Iesu, bwa e ataia bwa a kairia nakoina ibonga tii ibukini bakantangia irouna. Ngke e kataia Birato ni kainaomataa Iesu, ao e a korakora riki kaungaana bwa e na karaoia. Ngke e tekateka i aon te bao ni motikitaeka, ao e a kanakoa ana rongorongo buuna nakoina ae kangai: “Tai kuaa te aomata ane raoiroi anne, bwa I rangi ni karawawataaki ni miiu n te bong aei ibukina [bwa boni mairoun te Atua].”​—Mataio 27:19.

E na kangaa Birato ni kainaomataa te aomata ae akea ana bure aei n aron ae e riai ni karaoia?