KARAKI 102

E A Manga Maiu Iesu

KO KINAA neiei ao mwaane aika uoman aikai? Te aine aei boni Maria are te I-Maketara, ae raoraon Iesu. Ao mwaane akana mainaina kunnikaia akanne bon anera. Te ruu ae uarereke ae kaninganingaa Maria aei, bon te tabo are e katukaki iai rabwatan Iesu ngke e mate. Bon te ruanimate ae te bwanganimatang. Ma ai akea ngkai rabwatan Iesu! Antai ae anaia? Ti na noria.

Ngke e a mate Iesu, ao a taku ibonga nakon Birato: ‘Ngke e maiu ngkoa Iesu ao e taku bwa e na manga-uti imwin tenibong. Mangaia are tuua bwa e na kawakinaki raoi te ruanimate. Bwa a aonga n aki kimoaa rabwatana taan rimwina, ao ni kewea te aba bwa aongkoa e a manga-uti man te mate!’ E bon tuangia ibonga Birato bwa a na kanakoia tautia bwa a na teiakina te bwanganimatang are te ruanimate.

Ma ni moaningabongin te katenua ni bong imwin maten Iesu, ao e a tii karina naba n roko ana anera Iehova. E karabinoa nako te atibu man te ruanimate, ao a a rangi ni maaku tautia n te aro are a aikoa kona ni kakammwakuri. Ngke a a nora nanon te bwanganimatang, ao ai akea te mate! Tabeman tautia a nakon te kaawa ao a kaongoia ibonga. Ko ataia bwa tera are a karaoia ibonga? A kabooia tautia n te mwane bwa a na kewe. A taku nakoia tautia: ‘Taekinna bwa aongkoa a roko taan rimwina ni kimoaa rabwatana ngke kam matu.’

N te tai anne ao a roko naba raoraon Iesu aika aine bwa a na nakon te ruanimate. Ai kubanrou ra naakai ngke a a nora te bwanganimatang bwa ai akea kaaina! A a tii karina naba ni kaoti anera aika raneanea kunnikaia ao a titiraki ni kangai: ‘E aera ngkai kam a kakaaea Iesu ikai? E a tia n uti. Naako kawaekoai ngkami kaongoia taan rimwina.’ Ai birimwaaka ra aine aikai! Ma i aon kawaia ao a kateaki iroun temanna te mwaane. Ko ataia bwa antai? Bon Iesu! E taku nakoia: ‘Naako kaongoia taan rimwiu.’

A tuangia taan rimwin Iesu aine aikai bwa a a tia n nora Iesu ma akea ae e kakoauaa aia rongorongo. A kabirimwaakaia Betero ao Ioane nakon te ruanimate bwa a na noria, ma ai akea kaain te ruanimate! Ngke a a nako Betero ao Ioane, ao e tiku imwia Maria are te I-Maketara. Ikai are e a kaninganinga iai, ao e a noriia anera aika uoman.

Ko ataia bwa tera ae riki nakon rabwatan Iesu? E kabuaa te Atua. E aki kauta Iesu te Atua nakon te rabwata are e mate ngkoa iai. Ma e angan Iesu te rabwata n taamnei ae boou, n aekakin rabwataia anera i karawa. Ma ibukin kaotana nakoia taan rimwina bwa e boni maiu, e kona n rabwatanna Iesu n te rabwata are e kona n noraki iai irouia aomata. Ti na reirei taekan aei n te karaki ae imwina.

Mataio 27:​62-66; 28:​1-15; Ruka 24:​1-12; Ioane 20:​1-12.