Mwakoro 1
E Tabeakinira Raoi te Atua?
1, 2. Tera te titiraki are a titiraki aomata iai ibukin te Atua, ao bukin tera?
TAO ko a tia n titiraki ni kangai: ‘Ngkana iai te Atua ae tabeakinira raoi, ao e aera ngkai e tuai ni katoka te karawawataki ae bati?’ Ti a bane n tia n rotaki n te karawawataki ke ti ataa te aomata temanna ae karawawataki.
2 N taai aika bwakanako, ao a a tia aomata n rinanon te maraki ma te uruakinnano man te buaka, te iowawa, te kakeru, te babakanikawai, te kainnano, te aoraki ao ai mateia raao aika tangiraki. I nanon te ka-20 n tienture, a a tia ni mate aomata aika raka i aon 100 te mirion mwaitiia n te buaka. Iai naba bubua ni mirion aika ikoaki ke a bua mwengaia ma aia bwai. A a rangi ni bati naba baika riao buakakaia aika riiriki n ara tai aikai, ake a karekea te nanokawaki ae korakora, te tang ae bati, ao ai te bwarannano irouia aomata aika bure warekaia.
3, 4. Tera aia iango aomata aika bati ngkai e tuai ni katoka te karawawataki te Atua?
3 A nanokawaki tabeman iai ao e rio n aia iango ae ngkana iai te Atua, ao nanona bwa e bon aki tabeakinira. Ke tao a iangoia bwa bon akea te Atua. N te katoto, e titiraki ni kangai te mwaane ae rotakibuaka n te bwainikirinaki ibukin kaokoron te reeti, are a a mate iai raoraona ao ana utu n te Moani Buaka Are Kabuta te Aonnaba: “E mena iia te Atua ngkai ti a kainnanoia?” E kaotia naba temanna are reke maiuna imwin tiringaia aomata aika mirion ma mirion irouia kaain te Nazi n te Kauoua ni Buaka Are Kabuta te Aonnaba, bwa e rangi n nanokawaki n norakin te rawawata, ao e rangi n rotakibuaka iai n te aro ae e a kakaiaki uruakin nanona.
4 Mangaia are a aki kona n ota aomata aika bati bwa e aera te Atua ae raoiroi ngkai e tuai ni katoki baika bubuaka. A nanououa bwa e tabeakinira raoi te Atua ke e aki ao iai ngaia ke akea. Ao a bati mai buakoia aika iangoa te karawawataki bwa irian te maiu n taai nako.