Te Katenua n Titiraki: E Aera Ngkai E Aki Katoka Rawawatau te Atua?
BON te tia mamanging taman Ian. E ngae ngke a bane n reke baike e kainnanoi Ian n te maiu n rabwata n ana tai e ikawairake, ma e aki reke irouna te tangira are e kainnanoia mairoun tamana. E taku: “I bon aki tangiria ibukin arona ae te mamanging ao aroarona naba nakon tinau.” Ngke e a ikawai riki, e a moanna n nanououa bwa iai te Atua ke akea. E iango ni kangai: “Ngkana bon iai te Atua, e aera ngkai e aki katoka rawawataia aomata?”
Tera bukin tabekan te titiraki anne? E ngae ngkana akea am kangaanga ni maium, ma ibukin norakin rawawataia aomata aika akea aia bure, e na bae n rotaki arom ni kakaonimaki. Ma e ngae n anne, e bae n rangi ni kakawaki iroum te titiraki ibukin te rawawata ngkana ko rinanon naba te kangaanga n aron Ian ke ngkana e aoraki ke e mate ae tangiraki iroum.
Tera aia kaeka tabeman iai? A kakoauaa tabeman bwa e aki katoka te rawawata te Atua bwa e na reireinira iai te nanorinano ao te nanoanga. A namakinna tabeman riki bwa a rawawata aomata ni maiuia ngkai ibukin aia bure ake mai mwaina.
Tera ae kaotaraeaki ni kaeka akanne? E aki kona n rotaki te Atua n rawawataia aomata ike e a kangaanga iai bwa ti na tangiria. E ribuaka te Atua.
Tera ana reirei te Baibara? E kateretereaki n te Baibara bwa e aki riai ni bukinaki te Atua n rawawataia aomata. “E na tai kangai [temanna], I kaririaki mairoun te Atua: ba E aki konaki te Atua ni kaririaki ni baika bubuaka, ao E aki kariria temanna.” (Iakobo 1:13, Te Baibara) Ni koauana, e aki boraoi aroaron te Atua ae taekinaki n te Baibara ma te iango are e riai ni bukinaki ibukin te rawawata. E kanga n riki anne?
Teuana mai buakon aroaron te Atua ae rangi ni kakawaki bon te tangira. (1 Ioane 4:8) Ibukini katuruturuan te reirei ae kakawaki anne, e a kaikonakaki n te Baibara bwa titeboo ana namakin te Atua ma te tina ae kammamma. E titiraki ni kangai te Atua: “E kona te aine ni manuoka natina ae mamma, ba e na aki nanoanga natini birotona? Eng, a boni kona aine ni manuokiia natiia, ao Ngai N na aki manuokiko.” (Itaia 49:15, BG) Ko kona n iangoa te tina ae tatangira ae bon nanona ni kammaraka natina? Ni kaitaraan anne, e kataia te karo ae tatangira ni kabebetea rawawatan natina. N aron anne, e aki karika te rawawata te Atua nakoia aomata aika akea aia bure.—Karikani Bwaai 18:25.
Ma e ngae n anne, a boni karawawataaki naba aomata aika akea aia bure. Ko kona n iango ni kangai: ‘Ngkana ngaia bwa e tabeakinira te Atua ae moan te mwaaka, bukin tera bwa e aki katoki baika a karika te rawawata?’
A bati bukina aika raraoi ngkai e aki katoka te rawawata te Atua. Iangoa teuana moa: A aki toki aomata ni kariki rawawata nakoia tabemwaang. A bati kairiribai ao taani iowawa ake a rawa ni bitii maiuia aika karikii maraki. Ngaia are ni kamaunaakin te bwai are e kakorakoraa rikin te rawawata iroun te Atua, e na boni kamaunaia aeka n aomata akanne.
E korea ae kangai te abotoro Betero ni kabwarabwaraa iai bukin aki kamaunaakia moa te koraki ake a karaoa ae bure: “E aki baenikai Iehova ni kaineti ma ana berita, n aron ae a iangoia tabemwaang bwa e baenikai, ma e taotaona nanona nakoimi, ibukina bwa e aki tangira kamaunaan temanna ma e tangiriia aomata nako bwa a na rairi nanoia.” (2 Betero 3:9) E kaotiotaki ana tangira ao ana nanoanga Iehova ae te Atua man ana taotaonakinnano.
Ma e na waekoa Iehova ae te Atua ni karaoa te bwai teuana. E na ‘manga anga te rawawata nakoia te koraki ake a karawawataia’ aomata aika raoiroi. “A na rinanon te rekenikai ae motikaki . . . ae te kamaunaaki n aki toki,” te koraki ake a karika te rawawata ae korakora.—2 I-Tetaronike 1:6-9.
Ibukini kan ataan riki taekan te Atua ngkai e aki katoka te rawawata ao te bwai ae na karaoia iai, nora mwakoro 11 n te boki ae Tera Ana Reirei ni Koaua te Baibara? E kona n reke n te atureti ae www.pr418.com
[Bwaoki n iteraniba 9]
Tera Are E Taekinna Iesu Ibukin te Rawawata?
E bon aki bukina te Atua Iesu ibukin te rawawata are e otabwaniniaki iai. Ma n oneani mwin anne, e karaoi baikai.
E kaotia Iesu bwa e aki katuuaaeia aomata aika akea aia bure te Atua bwa a na rawawata. E kamarurungia aoraki Iesu, mwauku, ao mataki. (Mataio 15:30) Ti reiakini baika uoua aika kakawaki ni kakai ake e karaoi Iesu: Te moan, e aki karika te rawawata ma e kamanena mwaakan te Atua ni kabebeteia aika rawawata. Te kauoua, e kamarurungia aomata Iesu ibukina bwa e tangiriia. E “korakora nanoangaaia” aomata iroun Iesu ngke e noriia bwa a rawawata. (Mataio 20:29-34) E kaotiota ana namakin Tamana Iesu ibukin te rawawata n te aro ae kororaoi. Ngaia are ti ataia man ana taetaenikawai Iesu ao ana mwakuri, bwa e nanokawaki te Atua n te maraki are E noria ao E kani katokia.—Ioane 14:7, 9.
E kaotaraeaki Tatan te Riaboro iroun Iesu bwa nibwan raoi rawawataia aomata. E taku Iesu: “Te tia tiriaomata ngaia mangke e moani moana ana mwakuri.” (Ioane 8:44) E kaotia naba Iesu bwa “te tia tautaeka i aoia kaain te aonnaba aei” bon Tatan te Riaboro ao ngaia naba are “e burebureiia kaain te aonnaba ni kabutaa.”—Ioane 12:31; Te Kaotioti 12:9.
E anganira te kantaninga Iesu bwa n te tai teuana a nang toki rawawata nako. E reireinia taan rimwina bwa a na tataro ni kangai: “Tamara are i karawa, . . . e bia roko am tautaeka n uea. E na kakororaoaki nanom i karawa ao n te aonnaba naba.” (Mataio 6:9, 10) A nang akea te rawawata n te aonnaba n aron naba are i karawa, ngkana e roko Ana Tautaeka n Uea te Atua.
N te kaotioti are e anga Iesu nakon te abotoro
Ioane, e a kabwarabwaraa iai aron te maiu ibukia te koraki ake a mena i aan Ana Tautaeka n Uea te Atua. N te tai anne, ao “e na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”—Te Kaotioti 1:1; 21:3, 4.