Te Kauoua n Titiraki: Tera ae na Riki Nakoiu Ngkana I Mate?
BON te teinimwaane ae te roro n rikirake Roman ngke e mate raoraona ae tatangiria ni kabuanibwaina n te kaa. E taku: “I rotaki n te rawawata ae korakora ni buan raoraou. Inanon ririki aika bati imwin te kabuanibwai arei, I aki toki n iangoia bwa tera ae na riki nakoira ngkana ti mate.”
Tera bukin tabekan te titiraki anne? E taraa n ae a aki riai ni mate aomata. N aki ongeia bwa iraua ara ririki, ma ti bon aki kani mate. A bati aika a maaka te bwai ae na riki imwin te mate.
Tera aia kaeka tabeman iai? A bati aika a kakoauaa bwa iai te bwai ae maiu nako naba iroun te aomata ngkana e mate. A kakoauaa bwa a na maiu ni kukurei aomata aika raoiroi i karawa, ao a na katuuaaeaki aika buakaka n aki toki ibukin aia bure. A iangoia tabeman riki bwa ni maten te aomata, e a toki naba iai maiuna ao ni mwanuokinaki.
Tera ae kaotaraeaki ni kaeka akanne? E katautauaki n te moani kaeka bwa e aki mate raoi te aomata ngkana e mate. E kaotaki n te kauoua ni kaeka bwa bon akea manenan te maiu. A bae ni kakairi te koraki ake a iangoia bwa akea manenan te maiu, n te aroaro ae e aki kona ni bitaki aei: “Ti na amwarake ma ni moi, bwa ti na mate ningabong.”—1 I-Korinto 15:32.
Tera ana reirei te Baibara? E bon aki reiakinaki n te Baibara bwa iai te bwai ae maiu nako naba iroun te aomata ni matena. E kairaki te Uea are Toromon iroun te Atua bwa e na korea ae kangai: “Akana maiu a bon ataiia ba a na mate: ma a bon aki ata te bwai teuana akana mate.” (Te Minita 9:5, BG) Bon akea aia atatai te koraki ake a “aki ata te bwai teuana” ni baike a otabwaninia. Akea aia namakin ke n aki kona ni mwakuri. Ngaia are a bon aki kona maate ni buokiia ke ni kaikoakiia aika maiu.
Ni kaitaraan te bwai are a kakoauaa aomata aika bati, bon tiaki ana kantaninga te Atua bwa a na mate aomata. E karika te moan aomata are Atam ma te kantaninga are e na maiu n aki toki i aon te aba. Bon tii teuana te tai are e taekina iai te mate te Atua ngke e tuanga Atam tuuaana ibukin te aki ongeaba. E tukaki Atam mani kanakin uaan te kai teuana ao imwina e kauringaki bwa e na “boni mate” ngkana e kanna. (Karikani Bwaai 2:17, BG) Ngke arona bwa a teimatoa n ongeaba Atam ma Ewa, a na boni maiu n aki toki i aon te aonnaba ma kanoaia nako aika kakaonimaki nakon te Atua.
E rineia Atam bwa e na kakeaa bongan ana kauring te Atua. E a bure ngke e aki ongeaba iroun te Atua, ngaia are e a mate. (I-Rom 6:23) Bon akea te bwai teuana ae maiu nako naba iroun Atam ngke e mate, bwa ni matena, ai bon akea ngaia. E taku te Atua nakon Atam: “Ko na amarake n te amarake ma maononi moam, ni karokoa okim nakon te tano; ba ko anaki mai nanona: ba bon te tano ngkoe, ao ko na manga okira te tano.” (Karikani Bwaai 3:19, BG) Ibukina bwa a bane n riki aomata mairoun Atam, ti a ituaki iai n te bure ao te mate.—I-Rom 5:12.
E na boni kakororaoa Ana kantaninga te Atua are e na kaonaki te aonnaba irouia kanoan Atam, e ngae ngke e rineia bwa e na aki ongeaba. (Karikani Bwaai 1:28; Itaia 55:11) E na manga kautiia angiia aomata aika mate Iehova n te tai ae waekoa. E taekina ae kangai te abotoro Bauro ibukin te tai anne: “A na boni mangauti akana raoiroi ma akana aki raoiroi.”—Mwakuri 24:15.
[Taamnei n iteraniba 7]
Ibukini kan ataan riki taekan te bwai ae riki n te mate, nora mwakoro 6 n te boki ae Tera Ana Reirei ni Koaua te Baibara? E kona n reke n te atureti ae
[Bwaoki n iteraniba 7]
Tera Are E Taekinna Iesu Ibukin te Mate?
E bon aki boraoi n iango Iesu ma mataniwi n Aaro tabeman ake n ana bong, ake a taekinna bwa akea mangautiia maate. (Ruka 20:27) E aki naba reiakinia aomata Iesu bwa iai te bwai teuana ae maiu nako naba iroun te aomata ni matena. Ma aikai baike e reiakinia iai Iesu.
Titeboo te mate ma te matu. E taku Iesu ngke e mate raoraona are Rataro: “E a rawea motirawana raoraora are Rataro, ma N na nako ikekei bwa N na kautia mani matuna.” A aki ota taan rimwin Iesu n te bwai ae nanonna. A kaeka ni kangai: “Te Uea, ngkana e motirawa, ao ane e na manga marurung.” E kabwarabwaraaki rongorongona n te Baibara ni kangai: “E taekina maten Rataro, Iesu. Ma a taku ngaiia bwa e taekina motirawana ni matu. Mangaia are, e taku Iesu nakoia n te aro ae mataata n te tai anne: ‘E a boni mate Rataro.’”—Ioane 11:11-14.
A na kautaki maate. Ngke e roko Iesu n ana kaawa Rataro, ao e kabebetea nanoni Mareta are mwanen Rataro ni kangai: “E na mangauti mwaanem.” Imwina, e a karaoa te berita ae ringa te nano Iesu aei: “Boni ngai te mangauti ao te maiu. Ane onimakinai, ao e ngae ngke e mate, ma e na manga maiu.” Bon tiaki tii taeka aika akea nanoia ana berita Iesu. E kauta Rataro Iesu i mataia aomata aika bati, e ngae ngke e a tia ni mate i nanon abong.—Ioane 11:23, 25, 38-45.
N te kaotioti are e anganaki te abotoro Ioane iroun Iesu, e a manga berita riki iai bwa a na kautaki maate. E kabwarabwaraa naba bwa n te tai ae imwaira, a nangi bane ni kainaomataaki maate mani karabuutinakia n te aro ni kaikonaki.—Te Kaotioti 20:13.