Ti Kakabwaiaki N Nanomwakara I Aan Te Rawawata

“Ti taku ba a kukurei ake a nanomwaka.”​—IAKOBO 5:11, NW.

1, 2. E kaotaki man tera bwa tiaki ana kaantaninga Iehova bwa a na karawawataki aomata?

AKEA te aomata ae tangira karawawatana; ao e aki tangiriia naba aomata ara tia Karikiriki ae Iehova ae te Atua, bwa a na karawawataki. Ti kona n ota n aei ngkana ti nenera ana Taeka ae kairaki koreana iroun taamneina ao n ataa ae riki imwin karikan te mwaane ao te aine. Te moan, e karika te mwaane te Atua. “E karaoa rabatan te aomata Iawe ae te Atua man tanon aon te aba, ao e karina te ikeike ni maiu i nanoni bairina, ao e riki bwa te aomata ae maiu.” (Karikani Bwaai 2:7, BK) E kororaoi ana iango ao rabwatan Atam, ao e a aki riai n aoraki ke ni mate.

² Tera aroni maiun Atam? “Ao Iehova ae te Atua E unika te ne n aroka i mainiku, i Eten; ao E kamaeka iai te aomata are E a tia n karaoia. Ao Iehova ae te Atua E karikirakei kaai ni kabane man te tano, aika a raraoi taraaia, ma ni kakanaki uaaia.” (Karikani Bwaai 2:8, 9) Eng, iai mwengan Atam ae tikauarerei. Akea te karawawata i Eten.

3. Tera aia kaantaninga te moan taanga?

³ Ti tuangaki ae kangai ni Karikani Bwaai 2:18: “E taku Iehova ae te Atua, E aki riai te aomata aei ni mena n ti ngaia; N na karaoa te tia buobuokia ba raona ae riai.” Ao e karika buun Atam ae kororaoi Iehova, n te aro are e a kona n reke iai te kaantaninga ibukin te maiu n utu ae kakukurei. (Karikani Bwaai 2:21-23) E tuangira naba ae kangai te Baibara: “E kakabaiaiia nakekei te Atua: ao E taku te Atua nako ia, Kam na bati ni kariki, ao kam na kabatiaingkami, ao kaona aonaba, ao kataea ana kai.” (Karikani Bwaai 1:28) A a tia n anganaki te moan taanga mwiokoaia bwa a na karakaanako te Baretaiti i Eten ni karokoa onrakena ao e na riki ni baretaiti ni kabutaa. Ao a na kariki natia aika kukukurei, ake a na inaomata man te karawawataki. Ai boora atin te moani karikibwai!​—Karikani Bwaai 1:31.

Moan Rikin Karawawata

4. Tera ae teretere man rongorongon rimoa ibukin te botannaomata?

⁴ Ma ngkana ti tarai aroaroia aomata ma ngkekei ni karokoa ngkai, e teretere bwa iai te kairua are e kariki aaro aika rangi ni buakaka. A a tia n riki baika bubuaka, ao a a karawawataki utu ni kabane n te aro ae korakora. I nanon tienture aika bati, a a tia n ituaki n te aoraki kanoan Atam ao Ewa, a rikirake ni kara ao ni mate naba. Ai tiaki te baretaiti te aonnaba ao e a aki onrake irouia aomata aika kukukurei. E kabwarabwaraki raoi aei n I-Rom 8:22: ‘A bane baika karikaki ni ngirangira nako ma n ariri ni maraki ni karokoa te bong aei.’

5. A kanga n irekereke ara moani karo ma karekean te rawawata nakon te botannaomata?

⁵ E aki riai ni bukinaki Iehova ibukin korakoran te karawawata ae e a tia n noraki n te tai ae moan te maan. (2 Tamuera 22:31, BK) Iai naba irekerekeia aomata iai. “A babakanikawai, a karaoi makuri aika riai ni bati n ribaki.” (Taian Areru 14:1) E moanaki naba maiuia ara moani karo n ae tamaroa. Te bwai ae kainnanoaki ibukin teimatoan te maiu anne, bon te ongeaba nakon te Atua, ma a rinea ukoukoran inaomataia Atam ao Ewa mairoun Iehova. Kioina ngke a kitana Iehova ara moani karo, a aikoa kona ngkanne n teimatoa ni kororaoi. A na kekerikaki ni karokoa mateia. Ai bon rikiara te bure.​—Karikani Bwaai 3:17-19; I-Rom 5:12.

6. Tera are e karaoia Tatan ngkai ngaia ae moan karika te karawawata?

⁶ E irekereke te anera are e a riki bwa Tatan te Riaboro ma moan rikin te rawawata. E a tia n anganaki te inaomata ni karaoa ae e tangiria. Ma e aki kabongana raoi inaomatana ngke e a manga kan taromauriaki. Ma e ngae n anne, bon tii Iehova ae riai n taromauriaki, ma tiaki ana karikibwai. Bon Tatan are e kairarangia Atam ao Ewa nakon ukoukoran inaomataia mairoun Iehova, n te aro are a a iangoia bwa a nang “riki ba kaanga te Atua n ata te raoiroi ma te buakaka.”​—Karikani Bwaai 3:5.

Tii Iehova ae Riai n Tautaeka

7. Tera ae kaotiotaki ni mwin te karitei nakon Iehova?

⁷ E oti man mwin te karitei aika bubuaka bwa bon tii Iehova ae te tia Tautaeka i aon Bwaai ni Kabane, ae riai n tautaeka ao tii ana tautaeka ae raoiroi. E a tia ni kaotaki n ririki aika ngaa ma ngaa aika nako bwa e a tia Tatan are “uean aonaba,” ni karikirakea te buakaka, te aki eti ao te tautaeka ae iowawa ae akea teutana kakukureina. (Ioane 12:31) E oti ni maanin aia tautaeka aomata ae buakaka ae mena i aani mwaakan Tatan, bwa akea aia konabwai n tautaeka n te raoiroi. (Ieremia 10:23) Ngaia are a kabwaka n taai nako aeka n tautaeka ni kabane aika kona n iangoi aomata irarikin ana tautaeka Iehova. E a tia ni kaotaki aei n rongorongon rimoa bwa e koaua ao akea te nanououa iai.

8. Tera ana kaantaninga Iehova ni kaineti ma aeka n tautaeka ni kabane, ao e na kanga ni kakoroa nanona?

⁸ Ngkai e a tia Iehova n angania aomata ngaa ma ngaa te ririki bwa a na kairi tautaeka i tinanikun ana kairiri, e oti iai ngkanne bwa iai riaina ni kamaunai aeka n tautaeka akanne mai aon te aba ao n ruamwiia n ana tautaeka. E kangai te taetae ni burabeti ibukin aei: “N aia bong uea akanne [aia tautaeka aomata] ao E na katea ueana [ana tautaeka i karawa ae e na kairaki iroun Kristo] Atuani karawa, ae na bon aki uruaki n aki toki. . . . E na ururu ma ni kamaunai uea akanne ni kabane, ao e na tei matoa n aki toki.” (Taniera 2:44) A na mauna aia tautaeka taimonio ao aomata ao tii ana Tautaeka te Atua i karawa ae na tiku ao n tautaeka i aon te aba. E na Uea iai Kristo, ao e na uaia n tautaeka ma aika kakaonimaki aika 144,000 mwaitiia ake a anaaki mai aon te aba.​—Te Kaotioti 14:1.

Kakabwaia Man Karawawata

9, 10. E kanga ni kakabwaiaki Iesu ma ni baike e karawawataki iai?

⁹ E kakawaki ibukira neneran baika riai n reke irouia te koraki ake a na tautaeka n te Tautaeka n Uea i karawa. Te moan, e kaota aron taun raoi Kristo nakoni mwiokoana ae te Uea. E a tia ni kabanea te tai ae rangi ni maan irarikin Iehova ike e a kakaraoa iai nanon Tamana ngkai bon Ana “tia makuri ae rabakau.” (Taeka N Rabakau 8:22-31) Ngke e baireia Iehova bwa e na roko Iesu nako aon te aba, e kukurei ao e ongeaba iai. Ao ikanne are e a kaatuua iai ana tai n tuangia aomata nako taekan riain Iehova n tautaeka ao Ana Tautaeka n Uea. E katea te katoto ae moan te raoiroi Iesu ibukira ni kabane, n arona n aantaeka ma nanona ni kabane nakon te tautaeka anne.​—Mataio 4:17; 6:9.

¹⁰ E karawawataki i aan te bwainikirinaki Iesu, ao n tokina e a tiringaki. N ana tai ni mwakuri ni minita, ao e nora aron kananoangaia aomata ake irarikina ni kabane. Iai kakabwaiana ibukin noran anne ao ibukin karawawatana naba? Eng. E kangai Ebera 5:8, BK: “E ngae ngke Natin te Atua ngaia, ao e a tia ni maraki, ba e na reireiaki iai te ongotaeka.” E kairaki Iesu bwa e na atataiaomata ma n nanoanga riki ni baike e kaaitara ma ngaai ni menana i aon te aba. E bon rinanon aroaroia botannaomata. E kona ni kaotiota nanoangaia te koraki ake a karawawataki ao n ataa riki tabena ni kaineti ma mwiokoana ibukin kamaiuaia n te tai ae e na roko. Nora aron te abotoro Bauro ni kabwarabwaraa aei n te boki ae Ebera: “E riai i Rouna ba E na karaoaki n ai aroia tarina ni bwaai ni kabane, ba E na riki iai ba mataniwiia ibonga ae nanoanga ae kakaonimaki ni baika riai nakon te Atua, n anga te karea n raoi i bukin aia bure aomata. E a tia ni maraki Ngaia ngke E kaririaki, ao E boni kona ni buokia akana kaririaki.” “Ba ara ibonga ae te mataniwi bon tiaki ae aki kona te nanoangaira i bukini mamarara, ma bon ae kaririaki ni bwaai ni kabane n ai arora, ma E aki bure. Ma ngaia ae ti na tai maku ni kaania te kaintokanuea are e akoaki te aba iai, ba ti aonga n anganaki te nanoangaki, ao ti aonga ni karekea te akoaki ngkana a kai nanora.”​—Ebera 2:17, 18; 4:14​16; Mataio 9:36; 11:28-30.

11. A na kanga ni katauraoaki n riki bwa taan tautaeka, te koraki ake a na uea ma n ibonga nakon taai aika imwaira, ma ni baike a kaaitara ma ngaai i aon te aba?

¹¹ Bon tii te arona naba anne ma ae e kona n taekinaki ibukia te koraki ake “a kabooaki” mai aon te aba ae 144,000 mwaitiia, ake a na uaia n tautaeka ma Kristo Iesu n te Tautaeka n Uea i karawa. (Te Kaotioti 14:4) A bungiaki bwa aomata i aon te aba, a rikirake n te aonnaba ae otabwaniniaki n te karawawataki, ao a karawawataki naba. A mwaiti ake a bwainikirinaki ao tabeman a kamateaki ibukin teimatoaia ni kakaonimaki nakon Iehova ao kukureia ni kakairi iroun Iesu. Ma a ‘aki maamaa n taekina aia Uea, ao n ibuokanibwai n te maraki ibukin te Euangkerio.’ (2 Timoteo 1:8, BK) A noraki man baike a rinanoi i aon te aba bwa a tau n tautaeka i aoia botannaomata mai karawa. A a tia n reiakinaki bwa a na kabatiaa riki te nanoanga, te akoi ao te ingainga ni buokia aomata nako.​—Te Kaotioti 5:10; 14:2-5; 20:6.

Kukureia Ake A Kaantaningaa te Maiu i Aon te Aba

12, 13. A na kanga ni kakabwaiaki te koraki ake a kaantaningaa te maiu i aon te aba man karawawataia?

¹² Te koaua bwa e kona te rawawata ngkai ni kakabwaiaia te koraki ake a kaantaningaa te maiu n aki toki n te aonnaba ae baretaiti, ike a akea iai te aoraki, te nanokawaki ao te mate? E aki tangiraki te maraki ao te uruakinnano ae reke man te rawawata. Ma ngkana ti nanomwaka i aan aeka ni karawawata aikai, ti a kona iai ni karekei anuara aika raraoi aika a na kakukureira.

¹³ Iangoa ae taekinaki n Ana Taeka te Atua ae kairaki koreana iroun taamneina ibukin aei: “Ngkana tao kam maraki i bukin te raoiroi, ao kam a kukurei.” “Ngkana kam taetaebuakaki i bukin arani Kristo, ao kukurei.” (1 Betero 3:14; 4:14, NW) “Kukurei, ngkana a taetaebuakaingkami aomata, ma ni bainikiriningkami, ma n atonga te taetae ae buakaka ni kabanea, n uaraoingkami, i bukiu. Kam na kakatonga, ao kimwareirei: ba a bati ami bwai i karawa.” (Mataio 5:11, 12, NW) “E kukurei te aomata ae teimatoa i buakon te kataaki: ba ngkana e a tia ni kataki, ao e na reke i rouna te bau are te maiu.”​—Iakobo 1:12, NW.

14. N te aro raa, ae e kona iai te rawawata n angania taan taromauria Iehova te kakukurei?

¹⁴ N etina, tiaki te rawawata ae ti nanomwaka i aana ae e na anganira te kakukurei. E reke te kakukurei, te raunnano man ataan ae ti karawawataki ibukin karaoan nanon Iehova ao n tou mwin mwanekan Iesu. N te katoto, n te moan tienture, ao a kabureaki tabeman abotoro ao n uotaki nako matan aia boowi ae rietata I-Iutaia ao a kabuakakaki ibukin tataekinan Iesu Kristo. A kataereaki ao imwina a a manga kabwaraki. Tera aroia iai? E taekinaki n te Baibara bwa “a nako mai matan te Tanirim, ni kimareirei ngke a atongaki ba a riai ni kamaamaaeaki i bukin te Ara arei.” (Mwakuri 5:17-41) A kukurei tiaki ibukin kataereaia ao kammarakaia, ma ibukin ataan ae e riki aei man teimatoaia ni kakaonimaki nakon Iehova ao n tou mwin mwanekan Iesu.​—Mwakuri 16:25; 2 I-Korinto 12:10; 1 Betero 4:13.

15. Ti na kanga ni kakabwaiaki n taai aika a na roko, ibukin nanomwakara nakon te rawawata ngkai?

¹⁵ Ngkana ti nanomwaka i aan te karitei ao bwainikirinara ma te kaantaninga ae riai, e a kona iai n rikirake nanomwakara. Ti buokaki n aei bwa ti na nanomwaka nakon rawawata aika imwaira. Ti wareka ae kangai: “Tariu, kam na taku ba bon te bwai ni kabatiai ami kimareirei ituami ni bwaai ni kariri nako; ngkai kam ata kataan ami onimaki ba e karika te nanomwaka.” (Iakobo 1:2, 3) N aron anne, e kaongoira ae kangai I-Rom 5:3-5, BK: “Ti kamoamoaira naba n rawawatara, ngkai ti ata te rawawata ba e karika te nanomaka, ao te nanomaka e karika te kakaonimaki, ao te kakaonimaki e karika te kantaninga. Ao e aki matebuaka te kantaninga, ba a tia ni kaonaki nanora n ana tangira te Atua, iroun te Tamnei ae e Raoiroi ae ti a tia n anganaki.” Ngaia are ngkana ti kabatiai nanomwakara ngkai ibukin maiura ni Kristian, ti na kataubobongaki raoi ibukin te nanomwaka nakon kataaki riki tabeua n te waaki ae buakaka ae ngkai.

E na Kabooa Mwin Rawawataia Iehova

16. Tera ae e na karaoia Iehova nakoia uea ma ibonga n taai aika a na roko, ni kabooa mwin rawawataia?

¹⁶ E ngae ngkana ti namakina buan kaubwaira man te karitei ke bwainikirinara ibukin nimtan te aroaro ni Kristian, ma a rau nanora man ataan ae e na boni kakabwaiaira Iehova. N te katoto, e korea ae kangai te abotoro Bauro, nakoia aomata tabeman ake a kaantaningaa te nako karawa: “Kam kimareirei naba ni katau kurian ami bwai, ngkai kam ataingkami ba bon iai ami bwai aika raraoi riki aika aki mauna i karawa” ae te tautaeka n Ana Tautaeka n Uea te Atua. (Ebera 10:34) Iangoa kimwareireia ngkana a a mena i aan ana kairiri Iehova ao Kristo, n uataboa tibwatibwan kakabwaia aika kakukurei nakoia aika maeka n te waaki ae boou i aon te aba. Ai koauara ana taeka te abotoro Bauro nakoia Kristian aika kakaonimaki aikai: “I taku ba akea uani marakini boong aikai i rarikin te neboaki are nang kaotaki i nanora.”​—I-Rom 8:18.

17. Tera ae e na karaoia Iehova ibukia te koraki ake a kaantaningaa te maiu i aon te aba, ma ni kakaonimaki n toro irouna ngkai?

¹⁷ N aron anne, n aki ongeia bwa tera ae bua ngkai mairouia te koraki ake a kaantaningaa te maiu i aon te aba, ke tera ae a a tia ni kukurei ni kakeai ibukin aia beku ibukin Iehova, ma e na kabatiai kakabwaiaia ni baike e na karaoi nakon taai aika imwaia. E na angania te maiu ae kororaoi ae akea tokina i aon te aonnaba ae baretaiti. N te waaki ae boou anne, “E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki.” (Te Kaotioti 21:4) Bon te berita ae kakukurei! Akea te bwai ae ti na kona ni kukurei ke n aki kukurei ni kakeaa n te aonnaba aei ibukin Iehova, ae kona ni katiteboaki ma te maiu ae kakukurei ae imwaira, are e na angania ana toro aika kakaonimaki ma n nanomwaka i aan rawawataia.

18. Tera ana berita Iehova ae karaunano are e kaotia nakoira n ana Taeka?

¹⁸ Akea te rawawata teuana ae ti riai n nanomwaka i aana, ae e na tuuka kimwareireira ibukin te maiu ae aki toki n ana waaki ae boou te Atua i aon te aba. A nang bane n oneaki mwin rawawata ni kabane n aroaro aika moan raraoi. E taekinaki ae kangai n Itaia 65:17, 18: “A na aki uringaki baike rimoa, ao a na aki manga rin n te nano. Ma kam na aki toki ni kakatonga ma ni kimareirei n ae I karikia.” Mangaia are a eti ana taeka ai tarin Iesu ae Iakobo aikai: “Ti taku ba a kukurei ake a nanomwaka.” (Iakobo 5:11, NW) Eng, ngkana ti kakaonimaki n nanomwaka i aani karawawatakira, ti a kona ni kakabwaiaki ngkai ao n taai aika imwaira.

Tera Am Kaeka?

• A kanga ni moani karawawataki aomata?

• Tera ae kona n reke imwin te karawawataki nakoia te koraki ake a na tautaeka n taai aika a na roko ao kaain te aba?

• E aera bwa ti kona ni kukurei ngkai n aki ongei karawawata?

[Taamnei n iteraniba 13]

E mena imwaia ara moani karo kakabwaia aika moan raraoi

[Taamnei n iteraniba 15]

E riki noran te karawawataki iroun Iesu bwa katauraoana ibukin rikina bwa te Uea ae raoiroi ao te Ibonga ae Rietata

[Taamnei n iteraniba 17]

Ao abotoro a ‘kimwareirei ngke a atongaki bwa a riai ni kamaamaeaki’ i bukin aia onimaki