Mwakoro 5

Te Bwaintangira ae Kakukurei ae te Inaomata n Rinea ae TI na Karaoia

1, 2. Tera te bwaintangira ae kakukurei ae ti anganaki?

TI RIAI ni mataata n aron te Atua ni karikira bwa ti aonga n ataia bwa bukin tera ngkai e tuai ni katoka te karawawataki, ao tera ae e na karaoia iai. E bati ae e karaoia riki irarikin karikan rabwatara ma kaburorora. E anganira konabwai aika okoro, ae te rabakau n iango ao ni kaotiotii ara namakin.

² Te bwai ae kakawaki ae ti anganaki, bon te inaomata n rinea ae ti na karaoia. Eng, e karina i nanora te Atua te inaomata n rinerine. Bon te bwaintangira ae kakukurei mairouna.

Aroni Karikara

3-5. E aera ngkai ti kukurei n inaomatara n rinea ae ti na karaoia?

³ Ti na nora ngkai irekereken te inaomata aei ma bukina ngkai e tuai ni katoka te karawawataki te Atua. Ti na moanna man iangoan ae kangai: Ko kukurei ngkana ko anganaki inaomatam bwa ko na rinea ae ko kani karaoia, ko kan taekinna, kanam, oneam, nakoam, am tabo ni maeka ao aroni maium? Ke ko kukurei ngkana e baireaki iroun temanna bwaai ni kabane ake ko na taekin ke ni karaoi?

⁴ Akea te aomata ae kona ni kariaia bwa e na enaki. Bukin tera? Ibukina bwa bon aron karikara iroun te Atua. E tuangira te Baibara bwa e karikaki te aomata ‘ni katotongan te Atua,’ ao teuana aroaron te Atua bon te inaomata n rinea ae e tangiria. (Karikani Bwaai 1:26; Te Tua-Kaua 7:6) Ngke e karikiia aomata, e angania naba te bwaintangira ae kakukurei ae te inaomata aei. Anne bukina teuana ae e kona ni maraki nanora iai n tautoronakira irouia taani kairiri aika iowawa ma ni bangaomata.

⁵ Mangaia are e aki manennanti reken te nano ni kan inaomata iroura, bwa bon te Atua n inaomata Atuara. E taku te Baibara: “Ike E mena iai Tamnein te Uea [Iehova], ao e mena iai te aro n inaomata.” (2 I-Korinto 3:17) Mangaia are bon irian maiura mairoun te Atua te inaomata n rinea ae ti na karaoia. Kioina ngkai e ataa aron mwakurin ara iango ma nanora, e ataia naba bwa ti na kukurei riki ngkana ti anganaki inaomatara aei.

6. Tera aron te Atua ni karaoa kaburorora bwa e na mwakuri raoi ma inaomatara n rinea ae ti na karaoia?

⁶ Ibukin kanakoraoan inaomatara n rinea ae ti na karaoia, e anganira te Atua te kona n iango, ni bairei raoi bwaai, ni karaoi ara motinnano, ao n ataa ae eti ma ae kairua. (Ebera 5:14) Mangaia are e riai ni boto kabonganan inaomatara i aon ara rinerine ae oti iai wanawanara. Ti aki karaoaki n aroia mitiin aika robot ake akea aia iango ni bairea ae a na karaoia. Ao ti aki karikaki n aroia maan ae iai wanawanaia ae a bungiaki ma ngaia. Ma bon iai kaburorora ae tamaroa ae riai ni mwakuri ni kaineti ma inaomatara n rinea ae ti na karaoia.

Te Moani Waaki ae te Kabanea n Tamaroa

7, 8. Tera moan rikia ara moani karo mairoun te Atua ae nakoraoi?

⁷ E oti ana mwamwannano te Atua man anganakia ara moani karo ake Atam ma Ewa bwaai ni kabane ake a kainnanoi ibukin maiuia, irarikin te bwaintangira ae te inaomata n rinea ae a na karaoia. A kamaekaki n te onnaroka ae katamaroaki raoi n aron te baretaiti, ao a bati aia bwai. E kororaoi aia iango ao rabwataia, ngaia are a aki kona ni kara ke n aoraki ke ni mate. A boni kona ni maiu n aki toki. A kona naba n riki natia aika kororaoi, ake a kona ni kukurei ni maiu n aki toki. Ao ngkana e a ririkirake mwaitiia aomata, a kona ngkanne ni mwakuri ni katamaroaa te aonnaba bwa e aonga ni baretaiti ni kabutaa.​—Karikani Bwaai 1:​26-30; 2:15.

⁸ E taku te Baibara ni kaineti ma baika katauraoaki: “Ao te Atua E nori bwaai ni kabane aika E karaoi, ao noria, moan te raoiroi.” (Karikani Bwaai 1:31) E taekina naba te Atua te Baibara ni kangai: “E kororaoi ana makuri.” (Te Tua-Kaua 32:4, BK) Eng, e kororaoi moani karikaia aomata iroun te tia Karikiriki. Bon akea te anga ae e na tamaroa riki nakon aei. Ai batira ana mwamwannano te Atua!

E Tiatianaki te Inaomata

9, 10. E aera ngkai e riai n tiatianaki raoi te inaomata?

⁹ Ma te koaua bwa e anga te inaomata te Atua ae akea tiana? Iangoa te kawai ae korakora te kaa iai ma akea tuan te kawai iai, ao a buti aomata n aki akaka i aona. Ko na kani kabutikaa n te tabo anne? Ko na bon aki, bwa e na bae ni mangaongao te kawai anne ao e na bati te kabuanibwai iai.

¹⁰ Anne naba aron ana bwaintangira te Atua ae te inaomata. Ngkana akea tiatianakina, e na mangao iai te botannaomata. E riai n iai tuua ibukin kairan aia waaki aomata. E taku Ana Taeka te Atua: “Kaotingkami ba kam inaomata, ma tai kabongana inaomatami ba karaban aromi aika a bubuaka.” (1 Betero 2:​16, BK) E tangiria te Atua bwa e na tiatianaki te inaomata bwa a aonga ni kabwaia iai te botannaomata ni kabane. E aki tangiria bwa ti na inaomata ni bwaai ni kabane, ma e tiatianaki inaomatara ni kaineti ma riain te ongeaba n te tua.

Antai Ana Tua?

11. Antai ana tua ae ti baireaki bwa ti na irii?

¹¹ Antai ana tua ae ti baireaki bwa ti na irii? E kangai iteran te kibu ae 1 Betero 2:16 (BK): “Kaotingkami ba ana toro te Atua.” E aki nanonaki n aei te tautoronaki, ma nanona bwa ti baireaki bwa e na kakukurei riki maiura ngkana ti aantaeka nakon ana tua te Atua. (Mataio 22:​35-40) Bon tii ana tua ao tiaki aia tua aomata ae katauraoa te kairiri ae te kabanea n tamaroa. “Iehova ae Atuam Ngai, ae I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai.”​—Itaia 48:17.

12. Tera raababan te inaomata ae katauaki n ana tua te Atua ni kaineti ma rinean ae ti tangiria?

¹² E katauaki naba n ana tua te Atua bwa e na raababa te inaomata n rineakin ae ti tangiria. A riki mai iai baika kakaokoro nako aika kakukurei ma ni kaunga nakoia aomata. Iangoi kakaokoron nako amwarake, kunnikai, katangitang, korobanna ao taabo ni maeka ni katobibia te aonnaba. Ti kukurei riki ngkai ti kona ni bairea ae ti tangiria iai, nakon ae a na baireira aomata.

13. Baikara tuua ni kaineti ma waakin bwain te iuniweeti aika ti riai n ongeaba iai ibukin marurungira?

¹³ Mangaia are ti karikaki bwa ti na kukurei riki ngkana ti aantaeka n ana tua te Atua ibukin aroaron te maiu ae riai. Titeboo naba ma ara aantaeka n ana tua ni kaineti ma waakin bwain te iuniweeti. N te katoto, ngkana ti aki kubara tuan ana katikitiki te aonnaba, ao ti kibanako man te tabo ae rietata, ti na bon ikoaki ke ni mate. Ngkana ti aki kubara tuan rabwatara, ao ti katoka amwarakera, mooira, ke ikeikenakin te eea, ti na boni mate.

14. Ti kanga n ataia bwa a aki karikaki aomata bwa a na inaomata man ana kairiri te Atua?

¹⁴ Kioina ngkai ti karikaki ma riaira n aantaeka nakon ana tua te Atua ni waakin bwain te iuniweeti, ti karikaki naba ngkanne ma riaira n aantaeka nakon ana tua te Atua ni kaineti ma te aroaro ni maiu ae riai. (Mataio 4:4) A aki karikaki aomata bwa a na inaomata i tinanikun are e baireia te tia Karikiia, ma n nakoraoi maiuia iai. E taku te burabeti ae Ieremia: “Tiaki ana bwai te aomata ae nakonako te kaeti eueutakina. Iehova, Ko na kataereai.” (Ieremia 10:​23, 24) Mangaia are a karikaki aomata bwa a na tautaekanaki iroun te Atua n aia waaki nako, ma tiaki n ae a na kairiia i bon irouia.

15. Te koaua bwa e karawawataia Atam ao Ewa ana tua te Atua?

¹⁵ E aki karawawata nakoia ara moani karo te ongeaba nakon ana tua te Atua. E na bon nakoraoi iai waakin maiuia n ikotaki ma aomata nako. A na bane ni marurung aomata ngke arona bwa a tiatiana aroia te moan taanga i aan ana tua te Atua. Ti na bon riki ngkai bwa te utu ae katiteuanaki, ao ni maeka n te baretaiti ae kakukurei! E na bon akea te buakaka, te karawawata ao te mate.

[Taamnei n iteraniba 11]

E kororaoi moani karikaia aomata iroun te tia Karikiriki

[Taamnei n iteraniba 12]

Ko kani buti n te kawai ae e korakora te kaa iai

ngkana akea tuan te kawai iai?