Mwakoro 8

E a Tabe ni Kakororaoaki Ana Kaantaninga te Atua

1, 2. E kanga te Atua ni karekea te anga ae e na toki iai te karawawataki?

A A TABE ni kairiraki utu i nanon tienture aika bati n aia tautaeka aomata aika karitei ao taimonio. Ma e ngae n anne, e aki mwaninga taekan karawawatakira te Atua. I nanon tienture ni kabane, e a tia ni karekea te anga ae a na kainaomataki iai aomata man rotakia n te buakaka ao te karawawataki.

² E moana kaotan ana kaantaninga te Atua n tain te karitei i Eten, ae taekan katean te tautaeka ae na kaoka te baretaiti n te aonnaba bwa mwengaia aomata. (Karikani Bwaai 3:15) Imwina riki, e a riki ana tautaeka te Atua ae na roko aei bwa atun ana reirei Iesu ae ana tia taetae te Atua. E taku bwa tii te tautaeka aei kabwaiaia aomata.​—Taniera 2:44; Mataio 6:​9, 10; 12:21.

3. E arana te tautaeka Iesu are e na tei ibukin te aonnaba bwa tera, ao bukin tera?

³ E arana ana tautaeka te Atua ane e na tei anne Iesu bwa “te tautaeka n uea i karawa,” kioina ngkai e na kairiri mai karawa. (Mataio 4:​17, NW) E aranna naba bwa “uean te Atua,” kioina ngkai te tia Kateia bon te Atua. (Ruka 17:20) I nanon tienture aika bati, e kairiia aomata te Atua bwa a na korei taetae ni burabeti i aon taekaia te koraki ake a na kaaina te tautaeka anne, ao baike a na kakororaoaki iai.

Te Uea ae Boou Ibukin te Aonnaba

4, 5. E kanga ni kaotia te Atua bwa e a tia n rinea Iesu bwa te Uea?

⁴ A kakororaoaki taetae ni burabeti aika bati iroun Iesu, i nanon te tai ae kaania uoua tenga te ririki n nako, ni kaineti ma taekan te aomata are e na Uea n Ana Tautaeka n Uea te Atua. E kakoauaki bwa e bon rineia te Atua bwa te tia Kairiri n te tautaeka are i karawa i aon te botannaomata. Ao imwin maten Iesu, e a kautia te Atua nako karawa bwa e na riki bwa te taamnei ae aki mamate ae rangi ni mwaaka. A bati taani kakoauaa mangautina.​—Mwakuri 4:10; 9:​1-9; I-Rom 1:​1-4; 1 I-Korinto 15:​3-8.

⁵ Imwina ao e a “tekateka i angatain te Atua” Iesu. (Ebera 10:12) E a tataningaa te tai are e nang kamwakaa te Atua bwa te Uea n Ana Tautaeka i karawa. E kakororaoaki n aei te taetae ni burabeti are n Taian Areru 110:​1, are e tuangaki iroun te Atua ni kangai: “Tekateka i angaataiu, ni katiaai moa ba N na karaoiia taan ribaiko ba neni katokani waem.”

6. E kanga ni kaotia Iesu bwa e tau n riki bwa te Uea n Ana Tautaeka te Atua?

⁶ E kaotia Iesu ni menana i aon te aba bwa e tau nakon te aeka n nakoa aei. Bwa e ngae ngke e bwainikirinaki, ma e motinnanoia bwa e na kateimatoaa ana kakaonimaki nakon te Atua. Ni karaoan aei, e kaotia iai bwa e kewe ana bukibuki Tatan are akea te aomata ae kona ni kakaonimaki nakon te Atua ngkana e kataaki. E kaotaki iroun Iesu ae te aomata ae kororaoi, ae te ‘kauoman n Atam,’ bwa e aki kaairua te Atua ni karikaia aomata aika kororaoi.​—1 I-Korinto 15:​22, 45; Mataio 4:​1-11.

7, 8. Baikara baika raraoi ake e karaoi Iesu i aon te aba, ao tera ae e kaotia iai?

⁷ Te tia kairiri raa ae e a tia n noraki nakoraoin ana waaki n aron are e karaoia Iesu, n ana tai ni karaoa ana mwakuri ni minita i nanon tabeua te ririki? E kamwakaaki Iesu iroun taamnein te Atua ae raoiroi bwa e na kona ni katoka te aoraki, te mwauku, te mataki, te bonokau ao te baennewe. E kautiia naba maate! E kaota iai te bae e na kona ni karaoia ibukia aomata ni kabutaa te aonnaba ngkana e a anganaki mwaakana n Tautaeka.​—Mataio 15:​30, 31; Ruka 7:​11-16.

⁸ A bati baika raraoi ake e karaoi Iesu i aon te aba, n te aro are e a taku te tia rimwina ae Ioane: “Iai bwaai riki aika bati ake E karaoi Iesu, ao ngkana tao a na bane ni koreaki, ao I taku ba e aki tau aonaba ba neni booki aika a na koreaki.”​—Ioane 21:25.a

9. E aera ngkai a babaneakina Iesu aomata aika raoiroi nanoia?

⁹ E akoi Iesu ao e nanoanga, ao e rangi ni korakora tangiraia aomata irouna. E buokiia aika maiu ni kainnano ao aika karawawataki, ma e aki inanonano nakoia ake a kaubwai ke ake a kakannato. A butimwaea ana kakao ae tatangira Iesu, aomata aika raoiroi nanoia ngke e kangai: “Bane mai nako Iu, ngkami akana kam kua ao kam rawawata, ao N na motiki rawami. Amoa amou i aomi, ao reirei i Rou; ba I nimamanei ao I nanorinano; ao e na reke i roumi iai motikan rawaia tamneimi. Ba e aoraoi amou, ao e bebete uotau.” (Mataio 11:​28-30) A babaneakina Iesu aomata aika karinea te Atua, ao a kakaantaningaa te tai are e na kairiri iai.​—Ioane 12:19.

Raao n Tautaeka

10, 11. Antai aika a na ibuobuoki ma Iesu n tautaekana te aonnaba?

¹⁰ Kioina ngkai iai raao ni kairiri n aia tautaeka aomata, iai naba n Ana Tautaeka te Atua. E na buokaki Iesu irouia tabemwaang n tautaekana te aonnaba, bwa e a tia ni berita nakoia raona ni kaan bwa a na kairiri ma ngaia bwa uea i aoia aomata.​—Ioane 14:​2, 3; Te Kaotioti 5:10; 20:6.

¹¹ Mangaia are a na kautaki nako karawa aomata aika karako mwaitiia, bwa a na ikotaki ma Iesu. A na kaaina Ana Tautaeka te Atua ae e na kakabwaiaia aomata n aki toki. (2 I-Korinto 4:14; Te Kaotioti 14:​1-3) Mangaia are, e katauraoa te tautaeka Iehova teutana imwin teutana i nanon taai aika nako, ae na karekea kakabwaiaan te botannaomata n aki toki.

E na Toki te Kairiri ae te Inaomata Mairoun te Atua

12, 13. Tera ae e a tauraoi ni karaoia Ana Tautaeka te Atua?

¹² E a tia te Atua ni moana kaetan te waaki i aon te aonnaba ngkai. N aron ae maroroakinaki ni Mwakoro 9 n te boroutia aei, e kaotaki n te taetae ni burabeti n te Baibara bwa e kateaki Ana Tautaeka te Atua n 1914 i aan ana kairiri Kristo, ao e a tauraoi ngkai ni kamauna ana waaki Tatan ni kabane. E a tauraoi te Tautaeka aei n ‘tautaeka i buakoia ana kairiribai Kristo.’​—Taian Areru 110:2.

¹³ E taku Taniera 2:44 ni kaineti ma aei: “N aia bong uea akanne [tautaeka aika ngkai] ao E na katea ueana [i karawa] Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, [e na aki manga kariaiakaki tein aia tautaeka aomata] ma e na ururu [Ana Tautaeka n Uea te Atua] ma ni kamaunai uea akanne ni kabane, ao e na tei matoa n aki toki.”

14. Baikara kakabwaia tabeua aika a na roko ngkana e a toki aia kairiri aomata?

¹⁴ E nang kairiri Ana Tautaeka te Atua n te aonnaba ni kabutaa, ngkana a a katokaki waaki ni kairiri ni kabane ake a inaomata mairoun te Atua. E nang aki kona ni kamangaoaki te Tautaeka aei ni babakanikawaiaki irouia aomata, ibukina bwa e na kairiri mai karawa. E nang manga okira arona te mwaaka n Tautaeka are e moani waakinaki ngkoa mai karawa iroun te Atua. Kioina ngkai e na tautaekanaki te aonnaba ni kabutaa n ana kairiri te Atua, ai akea ngkanne ae na manga mwamwanaki n Aaro aika kewe, ke aia rabakau aomata ni karekeiango ma aia waaki n tautaeka. A na aki manga noraki waaki aikai.​—Mataio 7:​15-23; Te Kaotioti, mwakoro 17 nakon 19.

[Kabwarabwara ae nano]

[Taamnei n iteraniba 18]

E kamarurungia aoraki Iesu ma ni kautiia maate ni menana i aon te aba, bwa e kaotia ae e na karaoia n rokon te waaki ae boou

[Taamnei n iteraniba 19]

E na kamaunai aeka ni kairiri ni kabane Ana Tautaeka n Uea te Atua, aika inaomata mairouna