Reirei 12

Tera ae Riki n te Mate?

Te Mate boni kaitaraan te maiu. Te mate kaanga ai aron te mwanionako ni matu. (Ioane 11:11-14) Maate, a aki kona n ongo, n noraba, n taetae nikawai, ke n iangoa te bwai teuana. (Te Minita 9:5, 10) Aaro aika kewe a reirei bwa maate a nakon te aba n taamnei ni maeka ma aia bakatibu. Tiaki ngaia anne ana reirei te Baibara.

Aomata ake a a tia ni mate a aki kona ni buokira, ao a aki kona ni kaikoakira naba. E bati n ataaki irouia aomata aroni katei ma angakarea aika a kakoauaa bwa a na kukurei iai ake a a tia ni mate. E aki kakukurei aio iroun te Atua ibukina bwa e boto i aon teuana mai buakon ana kewe Tatan. E aki kona ni kakukureiia naba maate, kioina ngkai a aki maiu. Ti aki riai ni maakuia ke n taromauria maate. Ti riai n taromauria te Atua n tii ngaia.​—Mataio 4:10.

Maate a na manga maiu. Iehova e na manga kautiia maate bwa a na maiu n te baretaiti i aon te aba. Ma e tuai moa roko te tai anne. (Ioane 5:28, 29; Mwakuri 24:15) Te Atua e kona ni kautiia akana mate, n aron ae ko kona naba ni kauta te aomata ae matu.​—Mareko 5:22, 23, 41, 42.

Te iango are ti aki mate bon te kewe ae kabutaki iroun Tatan te Riaboro. Tatan ao ana taimonio a karaoia aomata bwa a na iangoia bwa a maiu taamneia maate, ao a karekei aoraki ma kangaanga riki tabeua. Tatan e mwamwanaia aomata rinanon taiani mii ao ngkana a butika naba. Iehova e kabuakakaia te koraki ake a kataia n taetae nakoia maate.​—Te Tua-Kaua 18:10-12.